ຕອນເຊົ້າຂອງວັນທີ 29 ພະຈິກ 2022 ນີ້ ໜ່ວຍຊາວໜຸ່ມຮາກຖານສະພາປະຊາຊົນແຂວງຫລວງນໍ້າທາ ປະເມີນສະມາຊິກຊາວໜຸ່ມດີເດັ່ນໃນການປະຕິບັດຂໍ້ແຂ່ງຂັນ 4 ບຸກ ປະຈຳປີ 2022 ຂຶ້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານຂອງ ສະຫາຍ ມິກສະຫວັນ ແກ້ວບົວພາ ເລຂາໜ່ວຍຊາວໜຸ່ມຮາກຖານສະພາປະຊາຊົນແຂວງ ມີບັນດາສະມາຊິກຊາວໜຸ່ມພາຍໃນໜ່ວຍເຂົ້າຮ່ວມຢ່າງພ້ອມພຽງ.

ໃນກອງປະຊຸມໄດ້ຮັບຟັງການຜ່ານຂໍ້ຕົກລົງ ສະບັບເລກທີ 1781/ຄຊປປລ.ຂ ຫຼວງນໍ້າທາ ວັນທີ 31 ຕຸລາ 2022 ວ່າດ້ວຍການຮັບຮອງເອົາເລຂາ, ຮອງເລຂາ ແລະ ຄະນະຂອງໜ່ວຍຊາວໜຸ່ມຮາກຖານສະພາປະຊາຊົນແຂວງ ເຊິ່ງເລຂາຄະນະຊາວໜຸ່ມ ປະຊາຊົນ ປະຕິວັດລາວແຂວງຫຼວງນໍ້າທາຕົກລົງ ຮັບຮອງເອົາ ສະຫາຍ ມິກສະຫວັນ ແກ້ວບົວພາ ເປັນເລຂາ; ສະຫາຍ ນາງ ສຸມີທາ ສຸກສີປະເສີດ ເປັນຮອງເລຂາ, ພ້ອມທັງເປັນປະທານກວດກາ; ສະຫາຍທອງລຸນ ອູ່ຄໍາຫລ້າ ເປັນຄະນະ, ພ້ອມນັ້ນຍັງໄດ້ຮັບກົດລະບຽບຂອງຊາວໜຸ່ມປະຊາຊົນປະຕິວັດລາວ ສະໄໝທີ VIII; ກົດຫມາຍວ່າດ້ວຍຊາວໜຸ່ມລາວ ທັງນີ້ກໍເພື່ອເປັນການເຜີຍແຜ່ເຊື່ອມຊືມໃຫ້ບັນດາສະມາຊິກຊາວໜຸ່ມພາຍໃນໜ່ວຍໄດ້ຮັບຮູ້, ເຂົ້າໃຈ ແລະ ພ້ອມກັນຈັດຕັ້ງປະຕິບັດ.

ຫຼັງຈາກນັ້ນສະມາຊິກຊາວໜຸ່ມພາຍໃນໜ່ວຍໄດ້ຜັດປ່ຽນກັນຂຶ້ນຜ່ານຮ່າງປະເມີນສະມາຊິກຊາວໜຸ່ມດີເດັ່ນໃນການປະຕິບັດຂໍ້ແຂ່ງຂັນ 4 ບຸກ ປະຈຳປີ 2022 ຂອງຕົນ ພ້ອມທັງໃຫ້ຄະແນນຕົນເອງ, ໝູ່ຄະນະ ແລະ ໜ່ວຍ ເຊິ່ງໄດ້ໃຫ້ຄະແນນທາງດ້ານແນວຄິດ, ດ້ານການຝືກຝົນຫຼໍ່ຫຼອມຕົນເອງ, ດ້ານການຈັດຕັ້ງ, ດ້ານວິຊາສະເພາະ.

ໃນຕອນທ້າຍກອງປະຊຸມ ສະຫາຍ ມິກສະຫວັນ ແກ້ວບົວພາ ເລຂາໜ່ວຍຊາວໜຸ່ມຮາກຖານສະພາປະຊາຊົນແຂວງ ໄດ້ມີຄຳເຫັນໂອ້ລົມ ແລະ ເນັ້ນໜັກ ເຊິ່ງກ່ອນອື່ນໄດ້ສະແດງຄວາມຊົມເຊີຍຕໍ່ຜົນງານໃນໄລຍະຜ່ານມາຂອງສະມາຊິກຊາວໜຸ່ມພາຍໃນໜ່ວຍ ແລະ ເນັ້ນໜັກໃຫ້ສະມາຊິກທຸກສະຫາຍຈົ່ງພ້ອມກັນເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະຕາມການມອບໝາຍ, ເອົາໃຈໃສ່ຄົ້ນຄວ້າ, ເຊື່ອມຊຶມບັນດາແນວທາງນະໂຍບາຍ, ບັນດາເອກະສານສຳຄັນຕ່າງໆ ເພື່ອນຳໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງໃຫ້ສຳເລັດ.

ພາບ ແລະ ຂ່າວ ໂດຍ ນາງ ອຳພອນ ສີປະເສີດ