ປະຕິບັດຕາມແຜນວຽກ ປະຈໍາປີ 2024 ຂອງໂຄງການສ້າງຄວາມເຂັ້ມແຂງໃຫ້ແກ່ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS) ສະບັບເລກທີ 129/ຄລຂ, ລົງວັນທີ 13 ມີນາ 2024, ແຜນດໍາເນີນກິດຈະກໍາຂອງຄະນະເລຂາທິການສະພາປະຊາຊົນແຂວງ ສະບັບເລກທີ 286/ຄລຂ, ລົງວັນທີ 28 ມິຖຸນາ 2024 ແລະ ມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການອະນຸມັດໃຫ້ດໍາເນີນກອງປະຊຸມ ສະບັບເລກທີ 313/ຄປຈຂ, ລົງວັນທີ 21 ມິຖຸນາ 2024.
ໃນວັນທີ 8 – 10 ກໍລະກົດ 2024 ນີ້; ຄະນະທີມງານສະພາປະຊາຊົນແຂວງ ນໍາໂດຍທ່ານ ທອງສີ ເສົາສຸລິພົມ ປະທານຄະນະປະຈໍາ ສະພາປະຊາຊົນແຂວງ ພ້ອມດ້ວຍນັກວິທະຍາກອນ, ນັກສໍາມະນາກອນ ແລະ ກອງເລຂາຊ່ວຍວຽກ ໄດ້ດຳເນີນກອງປະຊຸມຝຶກອົບຮົມສ້າງຄວາມເຂັ້ມແຂງ ໃຫ້ແກ່ບັນດາທ່ານ ສະມາຊິກສະພາປະຊາຊົນແຂວງ ແລະ ພະນັກງານຊ່ວຍວຽກຂັ້ນເມືອງ ທີ່ເມືອງຍອດອູ ແຂວງຜົ້ງສາລີ ເຊິ່ງມີຜູ້ເຂົ້າຮ່ວມທັງໝົດ ຈໍານວນ 46 ທ່ານ, ຍິງ 18 ທ່ານ ໃນນີ້: ສສຂ ຈໍານວນ 21 ທ່ານ, ຮອງຫົວໜ້າຫ້ອງວ່າການ ແລະ ຜູ້ຊ່ວຍວຽກປະຈໍາເມືອງ 7 ເມືອງ ຈໍານວນ 14 ທ່ານ, ກອງເລຂາຊ່ວຍວຽກ ຈໍານວນ 9 ທ່ານ ແລະ ຜູ້ຕິດຕາມຈາກໂຄງການຊ່ວຍເຫຼືອ (STEPS) ຈໍານວນ 2 ທ່ານ.
ກອງປະຊຸມຝຶກອົບຮົມສ້າງຄວາມເຂັ້ມແຂງ ໃນຄັ້ງນີ້ ໄດ້ຮັບຟັງການບັນຍາຍຂອງບັນດາທ່ານນັກສໍາມະນາກອນ ໃນຈໍານວນ 6 ຫົວຂໍ້ ເຊິ່ງມີ: ທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ ຂຶ້ນສະ ເໜີ 1 ຫົວຂໍ້ຄື: ການຮ່າງບົດປະກອບຄວາມເຫັນ, ການສ້າງຄໍາຊັກຖາມ ແລະ ການປະກອບຄຳເຫັນ ຂອງສະມາຊິກສະພາປະຊາຊົນຂັ້ນແຂວງ; ທ່ານ ນາງ ຈັນມະນີ ດວງພາສຸກ ປະທານຄະນະກໍາມະການເສດຖະກິດ, ແຜນການ ແລະ ການເງິນ ຂຶ້ນສະເໜີ 1 ຫົວຂໍ້ຄື: ການຄົ້ນຄວ້າ ແລະ ສ້າງຮ່າງມະຕິວ່າດ້ວຍການຮັບຮອງບົດລາຍງານການຈັດຕັ້ງ ແຜນພັດທະນາເສດຖະກິດ-ສັງຄົມ ແລະ ທ່ານ ສຸວັນຟູ ລາວລີ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ຂຶ້ນສະເໜີ 4 ຫົວຂໍ້ຄື: 1). ການຄົ້ນຄວ້າ ແລະ ຮ່າງມະຕິຮັບຮອງບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ; 2). ການຄົນຄວ້າ ແລະ ການສ້າງຮ່າງມະຕິຮັບຮອງບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບ ປະມານແຫ່ງລັດ ຂອງອົງການກວດສອບແຫ່ງລັດ ປະຈຳພາກເໜືອ 2; 3). ການຄົ້ນຄວ້າ ແລະ ສ້າງຮ່າງມະຕິວ່າດ້ວຍການຮັບຮອງບົດລາຍງານເຄື່ອນເຄື່ອນໄຫວວຽກງານປະຈຳປີ ແລະ ການກວດກາຕາມ ຜົນການກວດສອບ ຂອງອົງການກວດກາລັດແຂວງ; 4). ການຄົ້ນຄວ້າ ແລະ ສ້າງຮ່າງມະຕິວ່າດ້ວຍການຮັບຮອງການຈັດສັນງົບປະມານໂຄງການລົງທຶນ ຂອງລັດປະເພດ V ໃນແຕ່ລະປີ. ພາຍຫຼັງຮັບຟັງການບັນຢາຍຈາກບັນດາທ່ານນັກວິທະຍາກອນແລ້ວ, ບັນດາທ່ານນັກສໍາມະນາກອນໄດ້ມີການປະກອບຄໍາຄິດຄໍາເຫັນ ເພື່ອເປັນການແລກປ່ຽນບົດຮຽນຕໍ່ກັບບັນດາເນື້ອໃນທີ່ໄດ້ນໍາເຂົ້າຝຶກອົບຮົມ ໂດຍສົມທຽບພຶດຕິກໍາຕົວຈິງໃນໄລຍະຜ່ານມາ ເພື່ອສ້າງຄວາມເປັນເອກະພາບ ກາຍເປັນບົດຮຽນທີ່ດີໃນການສືບຕໍ່ຈັດຕັ້ງປະຕິບັດໃຫ້ມີສິດທິພາບ ແລະ ປະສິດທິຜົນສູງກວ່າເກົ່າ, ນອກຈາກນັ້ນ ບັນດາທ່ານວິທະຍາກອນ ຍັງໄດ້ອະທິບາຍຊີ້ແຈງເພີ່ມເຕີມ ເພື່ອກະຈ່າງແຈ້ງຕໍ່ບັນດາບັນຫາທີ່ນັກສໍາມະນາກອນສົນໃຈ.
ພິເສດໃນຕອນທ້າຍຂອງວາລະກອງປະຊຸມຝຶກອົບຮົມ ຍັງໄດ້ເຊື່ອເຊີນບັນດາທ່ານການນໍາຂອງເມືອງ ແລະ ພະນັກງານຫຼັກແຫຼ່ງຂອງເມືອງຍອດອູ ເຂົ້າຮ່ວມກອງປະຊຸມເພື່ອຮັບຟັງການໂອ້ລົມຂອງ ທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ ເຊິ່ງທ່ານເນັ້ນໜັກບາງບັນຫາຕື່ມຄື:ຫຼັງຈາກຮັບການຝຶກອົບຮົມບັນດາເນື້ອໃນຕ່າງໆ ໃນຄັ້ງນີ້, ມອບໃຫ້ສະມາຊິກສະພາປະຊາຊົນຂັ້ນແຂວງ ປະຈໍາແຕ່ລະເມືອງຫັນເປັນວຽກງານຢ່າງລະອຽດ ແລະ ໃນການເຂົ້າຮ່ວມກອງປະຊຸມສະໄໝສາມັນຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງ ຕ້ອງມີການແບ່ງຄວາມຮັບຜິດຊອບໃຫ້ສະມາຊິກສະພາປະຊາຊົນແຂວງ ປະຈໍາເມືອງຂອງຕົນ ໃນການປະກອບຄວາມເຫັນ; ໃຫ້ເອົາໃຈໃສ່ເຄື່ອນໄຫວປະຕິບັດຕາມສິດ ແລະ ໜ້າທີ່ຂອງຕົນ ທີ່ໄດ້ກຳນົດໄວ້ໃນມາດຕາ 30 ຂອງກົດໝາຍວ່າດ້ວຍສະພາປະຊາຊົນຂັ້ນແຂວງ; ຮຽກຮ້ອງມາຍັງ ທ່ານ ສສຂ ເປັນເຈົ້າການຄົ້ນຄວ້າ ແລະ ມີຄໍາເຫັນປະກອບສ່ວນຊ່ວຍຢ່າງເລີກເຊິ່ງ ກ່ຽວກັບມະຕິຮັບຮອງແຕ່ລະວຽກງານ; ສະມາຊິກສະພາປະຊາຊົນແຂວງ ຄວນຄົ້ນຄວ້າຢ່າງຮອບຄອບກ່ຽວກັບການສະເໜີບັນຫາໃດໜຶ່ງທີ່ຈໍາເປັນຕ້ອງຊັກຖາມກັບທີ່ໃນວາລະກອງປະຊຸມສະໄໝສາມັນແຕ່ລະຄັ້ງ ເຊີ່ງການກະກຽມເນື້ອໃນການຊັກຖາມ ສະມາຊິກສະພາປະຊາຊົນແຂວງ ຕ້ອງມີຂໍ້ມູນການຊັກຖາມ; ເພີ່ມທະວີຄວາມຮັບຜິດຊອບຂອງຕົນ ໃນການປະຕິບັດພາລະໜ້າທີ່ເປັນເສນາທິ ການຂອງຄະນະຫ້ອງວ່າການເມືອງ ແລະ ພະນັກງານຊ່ວຍວຽກ ໃນເວລາເຂົ້າຮ່ວມກອງປະຊຸມ ສະໄໝສາມັນແຕ່ລະຄັ້ງ; ພະນັກງານຊ່ວຍວຽກ ປະຈໍາເມືອງ ຕ້ອງເປັນເຈົ້າການ ແລະ ມີຄວາມຮັບຜິດຊອບສູງ ໃນການເປັນເສນາທິການໃຫ້ຄະນະສະມາຊິກສະພາປະຊາຊົນແຂວງ ປະຈໍາເມືອງ; ສະເໜີໃຫ້ອົງການປົກຄອງເມືອງ ແລະ ບັນດາທ່ານສະມາຊິກສະພາປະຊາຊົນແຂວງເອົາໃຈໃສ່ໃນການຍົກສູງປະສິດຕິພາບຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ; ເພື່ອຜັນຂະຫຍາຍທັດສະນະ ແລະ ທິດທາງຍົກສູງປະສິດຕິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍນັ້ນ ມອບໃຫ້ອົງການປົກຄອງເມືອງ, ສະມາຊິກສະພາປະຊາຊົນແຂວງຕ້ອງສູມໃສ່ນໍາພາ ແລະ ຄຸ້ມຄອງປະສິດຕິພາບການຈັດຕັງປະຕິບັດ; ສືບຕໍ່ນໍາພາ – ຊີ້ນໍາໃນການກໍ່ສ້າງພະນັກງານກັບທີ່, ການຫັນພະນັກງານລົງທ້ອງຖິ່ນຮາກຖານຕາມທິດ 3 ສ້າງ ຕິດພັນກັບການກໍ່ສ້າງຮາກຖານການເມືອງ ແລະ ການພັດທະນາຊົນນະບົດຮອບດ້ານ ເພື່ອຊຸກຍູ້ໃນການຜະລິດສິນຄ້າ ແລະ ການແກ້ໄຂຄວາມທຸກຍາກຂອງປະຊາຊົນໃຫ້ໄດ້ດໍາເນີນເປັນປົກກະຕິ, ການປັບປຸງລະບົບການເມືອງຢູ່ຂັ້ນຮາກຖານຕາມ 4 ເນື້ອໃນ 4 ຄາດໝາຍ; ຄະນະພັກ ແລະ ອົງການປົກຄອງແຕ່ລະຂັ້ນ ເພີ່ມທະວີຄວາມເອົາໃຈໃສ່ໃນການປະສານງານ, ສ້າງສີ່ງອໍານວຍຄວາມສະດວກ ແລະ ໃຫ້ການຮ່ວມໄມ້ຮ່ວມມືກັບການປະຕິບັດພາລະບົດບາດ, ສິດ ແລະ ໜ້າທີ ຂອງສະພາປະຊາຊົນແຂວງ; ຄະນະພັກ, ອົງການປົກຄອງແຕ່ລະຂັ້ນສືບຕໍ່ຍູ້ແຮງການຜະລິດ ຕາມທ່າແຮງຄວາມອາດສາມາດບົ່ມຊ້ອນຂອງແຕ່ລະທ້ອງຖີ່ນ.
ກອງປະຊຸມຝຶກອົບຮົມສ້າງຄວາມເຂັ້ມແຂງ ໃຫ້ແກ່ສະມາຊິກສະພາປະຊາຊົນແຂວງ ແລະ ພະນັກງານຊ່ວຍວຽກຂັ້ນເມືອງ ກ່ຽວກັບການປະກອບຄໍາເຫັນ ແລະ ຄໍາຊັກຖາມໃນກອງປະຊຸມສະພາປະຊາຊົນແຂວງ ທີ່ເມືອງຍອດອູ ແຂວງຜົ້ງສາລີ ແມ່ນໄດ້ດໍາເນີນເປັນໄລຍະເວລາ 2 ວັນເຄີ່ງ ແລະ ສໍາເລັດຜົນຕາມຄາດໝາຍທີ່ວາງໄວ້.
ພາບ-ຂ່າວ: ພຸດສະດີ ແສງຈອມຄູນ