ຕອນເຊົ້າຂອງວັນທີ 16 ມີນາ 2023 ນີ້ ທ່ານ ປີເຕີ ເຮມ໋ອນ ເອກອັກຄະລັດຖະທູດ ສະຫະລັດອາເມລິກາ ປະຈຳ ສ ປປ ລາວ ພ້ອມດ້ວຍຄະນະໄດ້ເຂົ້າພົບປະ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນໍ້າທາ ພ້ອມດ້ວຍຄະນະປະຈຳ ສະພາປະຊາຊົນແຂວງຫລວງນໍ້າທາ ເຂົ້າຮ່ວມທັງໝົດ 15 ຄົນ, ຍິງ 4 ຄົນ

ພ້ອມນັ້ນ ທ່ານ ຄຳຟອງ ອິນມານີ ໄດ້ລາຍງານການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດຕ່າງໆ ,ການຕິດຕາມກວດກາ ການຈັດຕັ້ງປະຕິບັດສອງວາລະແຫ່ງຊາດ, ການຕ້ານ ແລະ ສະກັດກັ້ນການຄ້າມະນຸດ ແລະ ບັນຫາທີ່ພົ້ນເດັ່ນອື່ນໆຈໍານວນໜຶ່ງ, ລາຍງານສະພາບລວມ ແລະ ການເຄື່ອນໄຫວວຽກໂຄງການຊ່ວຍເຫຼືອລ້າຈາກອົງການຈັດຕັ້ງສາກົນ ຂອງສະພາປະຊາຊົນແຂວງຫຼວງນໍ້າທາ

ພ້ອມນັ້ນທ່ານ ປີເຕີ ເຮມ໋ອນ ເອກອັກຄະລັດຖະທູດ ສະຫະລັດອາເມລິກາ ປະຈຳ ສ ປປ ລາວ ໄດ້ໃຫ້ຮູ້ເຖິງສະພາບລວມ ແລະ ວຽກງານໂຄງການທີ່ພວມດຳເນີນຢູ່ ໂດຍສະເພາະແມ່ນການຍົກຂີດຄວາມສາມາດຂອງ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານທີ່ເປັນເສນາທິການ, ສົ່ງເສີມໄວໜຸ່ມໃຫ້ມີວຽກເຮັດງານທຳ, ການສະກັດກັ້ນ ແລະ ຕ້ານການຄ້າມະນຸດ, ວຽກງານຕ້ານ ແລະ ສະກັດກັ້ນຢາເສບຕິດ ແລະວຽກງານອື່ນໆ

ພາບ ແລະ ຂ່າວ ໂດຍ ນາງ ອຳພອນ ສີປະເສີດ