ຕອນເຊົ້າຂອງວັນທີ 10 ມັງກອນ 2022 ຄະນະເລຂາທິການສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມວຽກງານປະຈຳປີ 2022 ແລະ ທິດທາງແຜນການປີ 2023 ຂອງຕົນຂຶ້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານຂອງ ທ່ານ ມີໄຊ ມີວິໄລ ກຳມະການປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ, ໃຫ້ກຽດເຂົ້າຮ່ວມ ໂດຍ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານ ຄະນະປະຈຳສະພາປະຊາຊົນແຂວງ, ປະທານ, ຮອງປະທານຄະນະກຳມະການ, ຮອງຫົວໜ້າຫ້ອງວ່າການແຂວງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າຂະແໜງ, ພະນັກງານຊ່ວຍວຽກສະມາຊິກສະພາປະຊາຊົນແຂວງບັນດາເມືອງ ແລະ ພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມທັງໝົດ 34 ທ່ານ, ຍິງ 12 ທ່ານ.
ໃນກອງປະຊຸມ ທ່ານ ຂັດ ໝັ້ນທະໄລ ຮອງເລຂາທິການສະພາປະຊາຊົນແຂວງ ໄດ້ຂຶ້ນຜ່ານຮ່າງບົດສະຫລຸບການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງຫລວງນໍ້າທາ ປະຈຳປີ 2022 ແລະ ທິດທາງແຜນການປະຈຳປີ 2023 ຄະນະເລຂາທິການສະພາປະຊາຊົນແຂວງ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ ພາຍໃນຄະນະເລຂາທິການຢ່າງຕໍ່ເນື່ອງ ແລະ ເປັນປົກກະຕິ ເຮັດໃຫ້ພະນັກງານ-ລັດຖະກອນ ມີແນວຄິດອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກໃນໄລຍະໃໝ່, ເຄົາລົບລັດຖະທຳມະນູນ ແລະ ກົດໝາຍຂອງລັດ, ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບສູງ ຕໍ່ໜ້າທີ່ວິຊາສະເພາະຂອງຕົນເອົາໃຈໃສ່ຄົ້ນຄວ້າສຶກສາຮໍ່າຮຽນ, ຮັດແໜ້ນຄວາມສາມັກຄີພາຍໃນ ແລະ ພາຍນອກດີ, ຄະນະເລຂາທິການສະພາປະຊາຊົນແຂວງຫລວງນໍ້າທາ ມີ 3 ຂະແໜງການຂຶ້ນກັບຄື ຂະແໜງຄົ້ນຄວ້າ-ສັງລວມ, ຂະແໜງຈັດຕັ້ງພະນັກງານ ແລະ ກວດກາ ແລະ ຂະແໜງບໍລິຫານ, ແຜນການ ແລະ ການເງິນ, ສໍາເລັດສະຫຼຸບການເຄື່ອນໄຫວວຽກງານປະຈຳ 1 ເດືອນ, 3 ເດືອນ, 6 ເດືອນ ແລະ 9 ເດືອນ ຂອງສະພາປະຊາຊົນແຂວງ ແລະ ຄະນະເລຂາທິການສະພາປະຊາຊົນແຂວງ; ສໍາເລັດການກະກຽມເນື້ອໃນ, ເອກະສານ, ບົດບັນທຶກກອງປະຊຸມ, ບົດລາຍງານຜົນສຳເລັດກອງປະຊຸມ ແລະ ຮັບໃຊ້ກອງປະຊຸມສະໄໝສາມັນເທື່ອທີ 2 ແລະ ສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ແລະ ກອງປະຊຸມອື່ນໆ ຂອງສະພາປະຊາຊົນແຂວງ ລວມທັງໝົດ 25 ກອງປະຊຸມ; ໄດ້ຕິດຕາມຄະນະ ສສຊ, ສສຂລົງເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ແລະ ສະພາປະຊາຊົນແຂວງ ຊຸດທີ II 5 ເມືອງພາຍໃນແຂວງ, ເຊິ່ງເຄື່ອນໄຫວໄດ້ທັງໝົດ19ຈຸດ, ມີ 27 ບ້ານ, ຜູ້ເຂົ້າຮ່ວມຮັບຟັງທັງໝົດ 2.384 ທ່ານ, ຍິງ 653 ທ່ານ ແລະ ໄດ້ມອບເຄື່ອງຊ່ວຍເຫຼືອຄິດເປັນເງິນຈຳນວນ 10,000,000 ກີບ;ສຳເລັດການປັບປຸງມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະເລຂາທິການສະພາປະຊາຊົນແຂວງ
ພ້ອມນັ້ນໄດ້ຮັບຟັງບົດປະກອບຄຳເຫັນ ແລະ ລາຍງານວຽກງານທີ່ພົ້ນເດັ່ນຂອງຂະແໜງຄົ້ນຄວ້າ-ສັງລວມ, ຂະແໜງຈັດຕັ້ງພະນັກງານ ແລະ ກວດກາ ແລະ ຂະແໜງບໍລິຫານ, ແຜນການ ແລະ ການເງິນ, ຫລັງຈາກນັ້ນບັນດາຜູ້ເແທນກອງປະຊຸມກໍໄດ້ພ້ອມກັນປະກອບຄຳເຫັນໃສ່ຮ່າງບົດສະຫລຸບການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງຫລວງນໍ້າທາ ປະຈຳປີ 2022 ແລະ ທິດທາງແຜນການປະຈຳປີ 2023 ຢ່າງເປັນຂະບວນເພື່ອເຮັດໃຫ້ບົດສະຫລຸບດັ່ງກ່າວມີເນື້ອໃນຄົບຖ້ວນ, ສົມບູນຂຶ້ນກວ່າເກົ່າ.
ໃນຕອນທ້າຍກອງປະຊຸມ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາະຊາຊົນແຂວງ ໄດ້ມີຄຳເຫັນໂອ້ລົມ ແລະ ເນັ້ນໜັກ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນໄລຍະ 01 ປີທີ່ຜ່ານມາ ພ້ອມທັງເນັ້ນໜັກໃຫ້ພ້ອມກັນສືບຕໍ່ເອົາໃຈໃສ່ປະຕິບັດໜ້າທີ່ວິຊາສະເພາະຂອງຕົນດ້ວຍຄວາມຮັບຜິດຊອບສູງ, ຕັ້ງໜ້າຄົ້ນຄວ້າສືກສາຮ່ຳຮຽນ ແລະ ປະຕິບັດໜ້າທີ່ໃນການເປັນເສນາທິການໃຫ້ໄດ້ຮັບຜົນດີ, ຮັບປະກັນການເປັນເສນາທິການທີ່ດີ ແລະ ມີຜົນສໍາເລັດຕາມລະດັບຄາດໝາຍ.
ໂດຍ ນາງ ອໍາພອນ ສີປະເສີດ