ໃນວັນທີ 18 ກໍລະກົດ 2024 ຢູ່ທີ່ສະພາປະຊາຊົນແຂວງ ໄດ້ຈັດກອງປະຊຸມປະເມີນການຈັດຕັ້ງປະຕິບັດລັດຖະທໍາມະນູນ ແຫ່ງ ສປປ ລາວ ສະບັບປີ 2015  ໂດຍການເປັນປະທານຂອງທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ , ມີບັນດາຫົວໜ້າ-ຮອງຫົວພະແນກການຂົງເຂດເສດຖະກິດ ແລະ ຜູ້ປະກອບການເຂົ້າຮ່ວມ.

         ທ່ານ ສີສະຫວາດ ທັນທະບຸນ ປະທານະນະກຳມະການເສດຖະກິດແຜນການ ແລະ ການເງິນ ໄດ້ຂຶ້ນຜ່ານສະຫຼຸບຕີລາຄາຄືນການຈັດຕັ້ງປະຕິບັດລັດຖະທຳມະນູນໃນໄລຍະຜ່ານມາວ່າ ລັດເຮົາໄດ້ສືບຕໍ່ການຜັນຂະຫຍາຍລັດ ຖະທຳມະນູນ ສະບັບປີ 2015 ເປັນກົດໝາຍໃນຂົງເຂດຕ່າງໆ ມີຈໍານວນ 139 ສະບັບ, ໃນນີ້ຂົງເຂດເສດຖະກິດ 61 ສະບັບ, ຂົງເຂດວັດທະນະທຳ-ສັງຄົມ 36 ສະບັບ, ຂົງເຂດການປົກຄອງ ແລະ ຍຸຕິທຳ 28 ສະບັບ, ຂົງເຂດປ້ອງການຊາດ-ປ້ອງກັນຄວາມສະຫງົບ 9 ສະບັບ, ຂົງເຂດຕ່າງປະເທດ 5 ສະບັບ, ບັນດາກົດໝາຍເຫຼົ່ານີ້ ໄດ້ກາຍເປັນເຄື່ອງມື ທີ່ໄດ້ການ ໄດ້ງານ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃຫ້ນັບມື້ເປັນລະບົບຄົບຊຸດ ຂຶ້ນເທື່ອລະກ້າວ, ເປັນຫຼັກຄ້ຳປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດເປັນເຈົ້າປະເທດຊາດ ຂອງປະຊາຊົນລາວບັນດາເຜົ່າ ແລະ ເປັນພື້ນຖານນິຕິກຳຄ້ຳປະກັນອຳນາດຂອງພັກ, ບັນດາກະຊວງ, ອົງການ ຂັ້ນສູນກາງ ແລະ ອົງການອຳນາດລັດຂັ້ນທ້ອງຖິ່ນ ໄດ້ເອົາໃຈໃສ່ໂຄສະນາເຜີຍແຜ່ ແລະ ສ້າງຂະບວນການກ່ຽວກັບ ວັນລັດຖະທຳມະນູນ ຢ່າງກວ້າງຂວາງດ້ວຍຫຼາຍຮູບແບບ, ໂດຍສະເພາະແມ່ນໄດ້ຈັດຕັ້ງພິທີສະເຫຼີມສະຫຼອງ ວັນປະກາດໃຊ້ລັດຖະທຳມະນູນ, ຈັດຕັ້ງປາຖະກະຖາ ຢູ່ບັນດາກະຊວງ, ອົງການທ້ອງຖິ່ນ, ສະຖາບັນການສຶກສາ, ໂຮງຈັກ-ໂຮງງານ ແລະ ໄດ້ເອົາລັດຖະທຳມະນູນ ເຂົ້າເປັນຫຼັກສູດການສຶກສາຂັ້ນຕ່າງໆ ເພື່ອສ້າງຄວາມຮັບຮູ້ເຂົ້າໃຈ ແລະ ຍົກສູງສະຕິເຄົາລົບລັດຖະທຳມະນູນ ແລະ ກົດໝາຍໃນທົ່ວສັງຄົມໃຫ້ນັບມື້ນັບສູງຂຶ້ນ.

ໃນກອງປະຊຸມ ຜູ້ເຂົ້າຮ່ວມຍັງໄດ້ປະກອບຄຳເຫັນໃສ່ບົດລາຍງານການປະເມີນຜົນການຈັດຕັ້ງປະຕິບັດລັດຖະທຳມະນູນ ແລະ ສະເໜີປັບປຸງລັດຖະທຳມະນູນ ສະບັບປີ 2015 ບາງໝວດ ບາງມາດຕາ ເພື່ອເຮັດໃຫ້ສອດຄ່ອງກັບແນວທາງນະໂຍບາຍຂອງພັກ-ລັດ ວາງອອກໃນແຕ່ລະໄລຍະ.