ກອງປະຊຸມ ຄົ້ນຄວ້າປະກອບຄຳຄິດເຫັນ ຕໍ່ການປະເມີນຜົນ ການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ຂົງເຂດວັດທະນະທຳ-ສັງຄົມ ໄດ້ຈັດຂຶ້ນໃນວັນທີ 16 ກໍລະກົດ 2024 ຢູ່ຫ້ອງປະຊຸມສະພາປະຊາຊົນແຂວງ ໃຫ້ກ່ຽດເຂົ້າຮ່ວມໂດຍ ທ່ານ ເລື່ອນວິໄລ ຈັນທະລາພັນ ຮອງປະທານສະພາປະຊາຊົນແຂວງບໍລິຄຳໄຊ ມີຄະນະປະຈຳສະພາປະຊາຊົນແຂວງ, ພະແນກການ ແລະ ພະນັກງານນຳພາ-ຄຸ້ມຄອງ ໃນຂົງເຂດວັດທະນະທຳ-ສັງຄົມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຂັນທອງ ພັນທະຈັກ ປະທານຄະນະກຳມະການວັດທະນະທໍາສັງຄົມ ແລະ ບັນດາເຜົ່າ ໄດ້ຂຶ້ນສະເໜີບົດສະຫຼຸບຕີລາຄ້າການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ເປັນຕົ້ນແມ່ນສະພາບລວມ, ການປັບປຸງລັດຖະທຳມະນູນ ແລະ ດ້ານດີ-ຜົນສໍາເລັດ ເຊີ່ງລັດຖະທໍາມະນູນສະບັບທໍາອິດຂອງ ສປປລາວ ໄດ້ປະກາດໃຊ້ໃນວັນທີ 15 ສິງຫາ 1991, ໄດ້ປັບປຸງລັດຖະທໍາມະນູນ ສະບັບປີ 2003 ໃນປີ 2015, ຊຶື່ງເປັນການປັບປຸງຄັັ້ງທີ 2 ແລະ ໄດ້ຖືກຮັບຮອງຈາກກອງປະຊຸມສະໄໝສາມັນ ເທື່ອທີ10 ຂອງສະພາແຫ່ງຊາດ ຊຸດທີ VII, ຊຶ່ງປະກອບມີ 14 ໝວດ ແລະ 119 ມາດຕາ, ເພີ່ມຂຶ້ນ 3 ໝວດ, ຜັນຂະຫຍາຍລັດຖະທໍາມະນູນ ສະບັບປີ 2015 ເປັນກົດໝາຍ ໃນຂົງເຂດຕ່າງໆ ຈໍານວນ 139 ສະບັບ, ໃນນີ້ຂົງເຂດເສດຖະກິດ 61 ສະບັບ, ຂົງເຂດວັດທະນະທໍາ-ສັງຄົມ 36 ສະບັບ, ຂົງເຂດການປົກຄອງ ແລະ ຍຸຕິທໍາ 28 ສະບັບ, ຂົງເຂດປ້ອງກັນຊາດ-ປ້ອງກັນຄວາມສະຫງົບ 9 ສະບັບ ແລະ ຂົງເຂດຕ່າງປະເທດ 5 ສະບັບ ແລະ ຮອດປັດຈຸບັນ ກໍ່ໄດ້ຜັນຂະຫຍາຍລັດຖະທໍາມະນູນ ເປັນກົດໝາຍໃນຂົງເຂດຕ່າງໆ ມີຈໍານວນທັງໝົດ 167 ສະບັບ, ລັດຖະທໍາມະນູນ ແລະ ກົດໝາຍເຫຼົ່ານັ້ນ ໄດ້ກາຍເປັນພາຫະນະອັນແຫຼມຄົມໃນການດັດປັບການພົວພັນສັງຄົມ ຕາມແນວທາງປ່ຽນແປງໃໝ່ຢ່າງຮອບດ້ານ ມີຫຼັກການຂອງພັກ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ – ສັງຄົມ ດ້ວຍກົດໝາຍມີຄວາມເຂັ້ມງວດ ແລະ ສັກສິດເປັນກ້າວໆ, ສະຕິເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ໃນທົ່ວສັງຄົມ ໄດ້ຮັບການຍົກສູງຂຶ້ນ ໄດ້ສ້າງເງື່ອນໄຂພື້ນຖານ ໃຫ້ແກ່ການສ້າງລັດ ສປປ ລາວ ໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ.

ຈາກນັ້ນ ບັນດາທ່ານທີ່ເຂົ້າຮ່ວມກອງປະຊຸມ ກໍ່ໄດ້ປະກອບຄຳຄິດເຫັນໃສ່ບົດສະຫຼຸບຕີລາຄາ ການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ໃນຫຼາຍເນື້ອໃນສໍາຄັນ ເປັນຕົ້ນແມ່ນການປັບປຸງບາງໝວດ, ບາງໝາດຕາ ໃຫ້ສອດຄ່ອງ ແລະ ຄົບຖ້ວນຂຶ້ນຕື່ມ, ການໂຄສະນາເຜີຍແຜ່ບັນດາກົດໝາຍ ໃຫ້ວ່ອງໄວ ແລະ ກວ້າງຂວາງຂຶ້ນ, ການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍ ຍັງເຮັດບໍ່ທັນໄດ້ດີເທົ່າທີ່ຄວນ, ການພົວພັນກັນຂອງແຕ່ລະພາກສ່ວນ ໃນການສ້າງນິຕິກຳ, ສ້າງກົດໝາຍ ຍັງບໍ່ທັນກົມກຽວ, ບາງນິຕິກຳບາງກົດໝາຍຍັງຊ້ຳຊ້ອນກັນ ແລະ ອື່ນໆ ທັ້ງນີ້ກໍ່ເພື່ອເຮັດໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນ ໃຫ້ແກ່ການຄົ້ນຄວ້າ,​ ປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ,​ ຮັດກຸມ, ​ເພື່ອ​ເປັນ​ຂໍ້​ມູນ​ໃຫ້​ຄະນະ​ລະດັບ​ຊາດ​ນໍາ​ໄປ​ປັບປຸງ ໃນຕໍ່ໜ້າ.

ຂ່າວ ແລະ ພາບ: ໂສລະຢ໋າ