(ສພຊ) ໃນວັນທີ 23 ຕຸລາ 2021 ທີ່ສະພາແຫ່ງຊາດ ໄດ້ມີກອງປະຊຸມຄົບຄະນະຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ໃນຮູບແບບວິດີໂອກອງປະຊຸມທາງໄກ ໂດຍການເປັນປະທານ ຂອງທ່ານ ລິນຄຳ ດວງສະຫວັນ ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ; ມີບັນດາທ່ານປະທານ, ຮອງປະທານກຳມາທິການ, ກຳມະການຂອງ ກສຕສ, ຄະນະເລຂາທິການ, ກົງຈັກທີ່ຄະນະປະຈຳສະພາແຫ່ງຊາດສ້າງຕັ້ງ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງ ກໍເພື່ອນຳເອົາເນື້ອໃນເອກະສານຕ່າງໆ ເຂົ້າພິຈາລະນາໃນກອງປະຊຸມຄົບຄະນະຂອງ ກສຕສ ແລະ ກອງປະຊຸມສະໄຫມສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໃຫ້ມີເນື້ອໃນຄົບຖ້ວນ, ຮັດກຸມ ທັງເພື່ອສ້າງຄວາມຮັບຮູ້ ແລະ ຄວາມເຂົ້າໃຈ ໃຫ້ແກ່ສະມາຊິກສະພາແຫ່ງຊາດ ທີ່ເປັນກຳມະການຂອງ ກສຕສ ເຮັດໃຫ້ການພິຈາລະນາບັນຫາດັ່ງກ່າວ ມີຄວາມເປັນເອກະພາບ ແລະ ມີປະສິດທິຜົນດີ.
ເນື້ອໃນທີ່ນຳມາຄົ້ນຄວ້າ ໃນກອງປະຊຸມຄັ້ງນີ້ປະກອບມີ: ຮ່າງວິໄສທັດການພັດທະນາເສດຖະກິດດິຈິຕ້ອນແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ້ອນແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດິຈິຕ້ອນ ໄລຍະ 5 ປີ ຄັ້ງທີ I (2021-2025); ຮ່າງກົດໝາຍ ວ່າດ້ວຍໂທລະຄົມມະນາຄົມ (ສະບັບປັບປຸງ) ແລະ ຮ່າງກົດໝາຍວ່າດ້ວຍຍານພາຫະນະທາງບົກ. ຈາກນັ້ນ, ບັນດາຜູ້ເຂົ້າຮ່ວມໄດ້ສຸ່ມໃສ່ຄົ້ນຄວ້າປະກອບຄຳຄິດຄຳເຫັນຢ່າງມີຈຸດສຸມ ແລະ ສ້າງສັນ ສຳເລັດຕາມຈຸດປະສົງ ແລະ ລຳດັບຄາດໝາຍທີ່ວ່າງໄວ້ ພ້ອມຮັບປະກັນດ້ານເນື້ອໃນໃຫ້ມີປະສິດທິພາບ ແລະ ປະສິດທິຜົນ.
(ອານຸສອນ ພູມີທອນ)