ຕອນເຊົ້າຂອງວັນທີ 24 ຕຸລາ 2022 ນີ້, ທ່ານ ລີເບີ ລີບົວປາວ ກໍາມະການສູນກາງພັກ, ຄະນະປະຈໍາ, ປະທານກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ແລະ ທ່ານ ແດງ ປະທຸມທອງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ພ້ອມດ້ວຍທີມງານ ໄດ້ລົງຕິດຕາມກວດກາ ການເຄື່ອນໄຫວວຽກງານ ການຂຸດຄົ້ນແຮ່ທາດທີ່ (ບໍລິສັດພູເບ້ຍມາຍນິງ) ທີ່ບ້ານນໍ້າໂມ້, ເມືອງອະນຸວົງ, ແຂວງໄຊສົມບູນ, ໂດຍ ການຕ້ອນຮັບຂອງ ທ່ານ ສະຕິບ ຈິມໂປ ຜູ້ອໍານວຍການບໍລິສັດ (ພູເບ້ຍມາຍນິ້ງ) ພ້ອມດ້ວຍຄະນະເຂົ້າຮ່ວມຢ່າງພ້ອມພຽງ.

ສະພາແຫ່ງຊາດ ແລະ ສະພາປະຊາຊົນແຂວງ ລົງຕິດຕາມ-ກວດກາ ການເຄື່ອນໄຫວວຽກງານ ຂອງບໍລິສັດທີ່ໄດ້ລົງທຶນພາຍໃນແຂວງໄຊສົມບູນ ປະຈໍາ 6 ເດືອນ ທ້າຍປີ 2022  ໂດຍພາກສ່ວນກ່ຽວຂ້ອງ ໄດ້ລາຍງານ, ອະທິບາຍ ແລະ ຊີ້ແຈງ ໃຫ້ຂໍ້ມູນອັນລະອຽດ ແລະ ຄວາມກະຈາງແຈ້ງ ຕໍ່ສະພາແຫ່ງຊາດ ແລະ ສະພາປະຊາຊົນແຂວງໄຊສົມບູນ ເພື່ອສາມາດຮັບຮູ້ ແລະ ເຂົ້າໃຈ ການຕິດຕາມ-ກວດກາ ໃນຄັ້ງນີ້ ເພື່ອເປັນບ່ອນອີງ ແລະ ເອກະສານ ຮ່າງບົດລາຍງານ ທີ່ມີຄວາມໝາຍອັນສໍາຄັນ ເພື່ອລາຍງານໃຫ້ ຄະນະປະຈໍາສະພາແຫ່ງຊາດ ແລະ ລັດຖະບານລາວ;

ໃນໂອກາດດັ່ງກ່າວນີ້, ທີ່ປະຊຸມໄດ້ຮັບຟັງ ການລາຍງານ ການເຄື່ອນໄຫວ ແລະ ການຈັດຕັ້ງປະຕິບັດວຽກງານ ການຂຸດຄົ້ນແຮ່ທາດ (ຂອງບໍລິສັດພູເບ້ຍມານິ້ງ) ໂດຍທ່ານ ນາງ ມະນີລັດ ອາຣຸນລັງສີ ຜູ້ຈັດການອາວຸໂສຝ່າຍພົວພັນພາຍນອກ ແລະ ທ່ານ ນາງ ວັນນະລີ ພູນສະຫວັດ ຜູ້ຈັດງານຝ່າຍປະສານງານລັດຖະບານ ໂດຍບັນດາທ່ານ ໄດ້ໃຫ້ຮູ້ວ່າ:

(ບໍລິສັດພູເບ້ຍມານິ້ງ) ໄດ້ເລີ່ມເປີດຂຶ້ນໃນປີ ຄສ 1994 ແລະ ໄດ້ດໍາເນີນຈັດຕັ້ງປະຕິບັດມາຮອດປັດຈຸບັນ (ບໍລິສັດພູເບ້ຍມານິ້ງ) ໄດ້ປະກອບສ່ວນຫຼາຍກວ່າ 925 ລ້ານໂດລາສະຫະລັດ ໃຫ້ແກ່ລັດຖະບານລາວ ໂດຍຊັບສິນໃນການຜະລິດຂອງບໍລິສັດ ແພນອອສ ໃນລາວ ມີໂຮງງານຂຸດຄົ້ນ-ປຸງແຕ່ງ ທອງຄໍາ (ພູຄໍາ) ແລະ ໂຮງງານຂຸດຄົ້ນ ປຸງແຕ່ງ ຄໍາ-ເງິນ ບ້ານຫ້ວຍຊາຍ); ທັງສອງໂຮງງານແມ່ນ ດໍາເນີນງານໂດຍບໍລິສັດ (ພູເບ້ຍມາຍນິງ) ໂຮງງານພູຄໍາ ແລະ ບ້ານຫ້ວຍຊາຍ ຕັ້ງຢູ່ໃນເຂດສໍາປະທານພູເບ້ຍຂອງບໍລິສັດ 2,600 ກິໂລຕາແມັດ; ໂຄງການນີ້ ປະກອບມີ ບໍ່ຂຸດຄົ້ນເທິງໜ້າດິນ ຊຶ່ງຈະປ້ອນແຮ່ເຂົ້າໂຮງງານຜະລິດ-ປຸງແຕ່ງ ເພື່ອສະກັດເອົາໂລຫະທອງ ແລະ ວັດຖຸມີຄ່າ ໂດຍນໍາໃຊ້ເຕັກນິກການສະກັດແຮ່ ແບບລະບົບຟູລອຍແຮ່ ໃຫ້ກາຍເປັນຜະລິດຕະພັນແຮ່ທອງເຂັ້ມຂຸ້ນ ເພື່ອສົ່ງອອກຈໍາໜ່າຍ;

(ບໍລິສັດພູເບ້ຍມານິ້ງ) ໃນປີ 2021 ສາມາດຜະລິດໄດ້ດັ່ງນີ້: ສາມາດຜະລິດທອງໄດ້ 32.385 ໂຕນ, ສາມາດຜະລິດຄໍາໄດ້ 126.671ໂຕນ ແລະ ສາມາດຜະລິດເງິນໄດ້ 829.393 ໂຕນ ແລະ ແຜນຜະລິດໃນປີ 2022 ນີ້, ທອງໃຫ້ຜະລິດໄດ້ 33.200 ໂຕນ, ຄໍາໃຫ້ຜະລິດໄດ້  138.200 ໂຕນ ແລະ ເງິນໃຫ້ຜະລິດໄດ້ 810.300 ໂຕນ.

ນອກນັ້ນ ບັນດາທ່ານ ຍັງໃຫ້ຮູ້ຕື່ມອີກວ່າ: ທາງບໍລິສັດ ຍັງໄດ້ມີການພັດທະນາຊຸມຊົນ ຊ່ວຍເຫຼືອ ພໍ່ແມ່ປະຊາຊົນ ທີ່ຢູ່ໃນເຂດບໍລິເວນ ໄດ້ມີວຽກເຮັດງານທໍາ ແລະ ບໍລິສັດຍັງໄດ້ ລົງທຶນຫຼາຍກວ່າ 4.5 ລ້ານໂດລາສະຫະລັດ ເຂົ້າແຜນການພັດທະນາ ຊຸມຊົນຢູ່ລາວ ແລະ ລົງທຶນຫຼາຍກວ່າ 1 ລ້ານໂດລາສະຫະລັດ ເຂົ້າໃນການກໍ່ສ້າງເສັ້ນທາງເບຕົງ ບ້ານນໍ້າໂມ້; ແຜນພັດທະນະຊຸມຊົນ ສຸມໃສ່ພື້ນຖານໂຄງລ່າງ, ສາທາລະນະສຸກ, ສຸຂະອະນາໄມ, ການສຶກສາ, ການພັດທະນາກະສິກໍາ, ການພັດທະນາທຸລະກິດຂະໜາດນ້ອຍ ແລະ ການເງິນຈຸລະພາກ; ລາຍຮັບຫຼາຍກວ່າ 9.1 ລ້ານໂດລາສະຫະລັດ ທີ່ສ້າງໃຫ້ຊຸມຊົນທ້ອງຖິ່ນ ໂດຍຜ່ານການຈັດຊື້ຜົນລະປູກປອດສານພິດຈາກ ພໍ່ແມ່ປະຊາຊົນ ເຂົ້າສູ່ບໍລິສັດ.

ພາຍຫຼັງ, ຮັບຟັງການລາຍງານຂອງ (ບໍລິສັດພູເບ້ຍມາຍນິ້ງ) ສໍາເລັດແລ້ວ ທ່ານ ລີເບີ ລີບົວປາວ ທ່ານ ຍັງໄດ້ມີຄໍາເຫັນຊົມເຊີຍ ບໍລິສັດດັ່ງກ່າວ ທີ່ໄດ້ປະກອບສ່ວນໃຫ້ແກ່ລັດຖະບານລາວ ແລະ ສົມທົບທຶນຊ່ວຍເຫຼືອພໍ່ແມ່ປະຊາຊົນບັນດາເຜົ່າ ທີ່ຢູ່ໃນເຂດບໍລິເວນ ແລະ ທ່ານ ໄດ້ມີຄໍາສະເໜີຕໍ່ (ບໍລິສັດພູເບ້ຍມາຍນິ້ງ) ທີ່ເຄື່ອນໄຫວວຽກງານຂອງຕົນ ໃຫ້ມີຄວາມເປັນລະບຽບຮຽບຮ້ອຍຕາມຫຼັກການ, ພ້ອມປັບປຸງເສັ້ນທາງ ໃຫ້ມີຄວາມສະດວກໃນການນໍໍາໃຊ້ເສັ້ນທາງ ແຂວງໄຊສົມບູນ  ເພື່ອໃຫ້ສອງຝ່າຍ ອໍານວຍຄວາມສະດວກສະບາຍ ໃຫ້ກັນ ແລະ ກັນ ໃນການເຄື່ອນໄຫວ ແລະ ຈັດຕັ້ງປະຕິບັດວຽກງານໃນຕໍ່ໜ້າ.

(ນາງ ອໍາໄພພອນ ແກ້ວວິໄລ)