ໃນວັນທີ 8 ພຶດສະພາ 2024 ນີ້, ທ່ານ ເພັງນິລັນ ຄຳພັນເພັງ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 7 ແຂວງໄຊຍະບູລີ, ທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ພ້ອມດ້ວຍທີມງານຂອງສູນກາງ ແລະ ທີມງານຂອງແຂວງ ໄດ້ລົງຕິດຕາມ, ກວດກາ ແລະ ຊຸກຍູ້ ການປະຕິບັດນະໂຍບາຍ, ນິຕິກໍາ ທີ່ຕິດພັນກັບການນໍາເຂົ້າ ແລະ ປຸງແຕ່ງນໍ້າມັນເຊື້ອໄຟ ເພື່ອສະໜອງການຊົມໃຊ້, ການຄ້າຊາຍແດນ ແລະ ປັດໄຈການຜະລິດ ຢູ່ເມືອງແກ່ນທ້າວ ແຂວງໄຊຍະບູລີ ເປັນກຽດຕ້ອນຮັບຂອງ ທ່ານ ອໍາຄາ ລັດສະໝີ ກໍາມະການພັກແຂວງ, ເລຂາພັກເມືອງ, ເຈົ້າເມືອງແກ່ນທ້າວ, ມີຮອງເຈົ້າເມືອງ, ສະມາຊິກສະພາປະຊາຊົນແຂວງ, ຫົວໜ້າຫ້ອງການທີ່ກ່ຽວຂ້ອງ, ດ່ານສາກົນ ແລະ ນັກທຸລະກິດ-ຜູ້ປະກອບການເຂົ້າຮ່ວມຢ່າງພ້ອມພຽງ.
ທ່ານ ເພັງນິລັນ ຄຳພັນເພັງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 7 ແຂວງໄຊຍະບູລີ ໄດ້ສະເໜີຈຸດປະສົງໃນການລົງມາເຄື່ອນໄຫວວຽກງານໃນຄັ້ງນີ້. ຈາກນັ້ນ, ໄດ້ຮັບຟັງລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ໃນໄລຍະ 3 ເດືອນຜ່ານມາ, ຮັບຟັງການລາຍງານການສົ່ງເສີມການຜະລິດກະສິກຳ ແລະ ການຄຸ້ມຄອງຊົນລະປະທານຢູ່ພາຍໃນເມືອງ ແລະ ຮັບຟັງການລາຍງານ ກ່ຽວກັບສະພາບການຈັດຕັ້ງປະຕິບັດ ແລະ ຄຸ້ມຄອງ ການນໍາເຂົ້ານໍ້າມັນເຊື້ອໄຟ ແລະ ການຄ້າຊາຍແດນ ຂອງພາສີປະຈໍາດ່ານສາກົນຂົວມິດຕະພາບນໍ້າເຫືອງ ໃນປີ 2024 ໄດ້ຮັບແຜນ ເກັບລາຍຮັບທັງໝົດ 650 ກ່ວາຕື້ກີບ ເຊິ່ງໃນໄລຍະ 4 ເດືອນຜ່ານມາ ສາມາດເກັບລາຍຮັບໄດ້ 170 ກ່ວາຕື້ກີບ ເທົ່າກັບ 26,55 ສ່ວນຮ້ອຍຂອງແຜນການປີ ລາຍຮັບສ່ວນໃຫຍ່ແມ່ນໄດ້ຈາກນໍ້າມັນເຊື້ອໄຟ ກວມເອົາ 95,55 ສ່ວນຮ້ອຍ ຂອງລາຍຮັບທັງໝົດ. ໃນນີ້, ນໍ້າມັນແອັດຊັງ 10,491,000 ກວ່າລິດ ແລະ ນໍ້າມັນກະຊວນ 38,675,000 ກວ່າລິດ ຂັ້ນຕອນການປະກອບເອກະສານໃບແຈ້ງພາສີ ນໍ້າມັນເຊື້ອໄຟ ຜູ້ບໍລິການແຈ້ງພາສີ ຫຼື ຊິບປິ້ງ ໄດ້ປະກອບເອກະສານລໍຖ້າສິນຄ້າແຕ່ຕົ້ນ ຫາປາຍທາງ ເມື່ອສິນຄ້າຮອດສາງ ຜູ້ບໍລິການແຈ້ງພາສີ ຫຼື ຊິບປິ້ງ ໄດ້ສະເໜີໃຫ້ຂະແໜງການຄ້າ (ກວດກາຄຸນນະພາບ ສົມທົບກັບ ພະລັງງານ ແລະ ບໍ່ແຮ່ ຢອດສານມາກເກີ) ກວດການໍ້າມັນຕົວຈິງ ເພື່ອຢັ້ງຢືນຄວາມຖືກຕ້ອງ. ຈາກນັ້ນ, ພາສີໄດ້ກວດຕົວຈິງ ເພື່ອສົມທຽບກັບເອກະສານໃບແຈ້ງພາສີຖືກຕ້ອງແລ້ວມອບເຂົ້າງົບປະມານ. ໃນ 4 ດືອນຜ່ານມານີ້, ຍັງໄດ້ສົ່ງອອກສິນຄ້າ ມູນຄ່າ 34,144,000 ກວ່າໂດລາ ແລະ ສິນຄ້ານໍາເຂົ້າ ມູນຄ່າ 67,388,000 ກວ່າໂດລາ.
ໃນການລົງມາເຄື່ອນໄຫວວຽກງານຢູ່ເມືອງແກ່ນທ້າວໃນຄັ້ງນີ້, ຍັງໄດ້ລົງຕິດຕາມສະພາບ ແລະ ເກັບກໍາຂໍ້ມູນຂອງບໍລິສັດນໍາເຂົ້ານໍ້າມັນເຊື້ອໄຟ, ລົງຕິດຕາມກວດກາການກໍ່ສ້າງຊົນລະປະທານນໍ້າຊາງ ຢູ່ບ້ານຫ້ວຍເລິກ ຕື່ມອີກ.