ໃນວັນທີ 7 ມິຖຸນາ 2023 ທີຜ່ານມານີ້  ສະພາປະຊາຊົນແຂວງວຽງຈັນ ໄດ້ຈັດກອງປະຊຸມກ່ຽວກັບວຽກງານການຕິດຕາມກວດກາໃນວຽກງານຂົງເຂດ ປ້ອງກັນຊາດ-ປ້ອງກັນຄວາມສະຫງົບ ໂດຍການເປັນປະທານຮ່ວມ ຂອງ ທ່ານ ພົຈວ. ປອ. ມາລາ ວິລະຈິດ ຮອງປະທານ ກໍາມາທິການ ປອງກັນຊາດ – ປ້ອງກັນຄວາມສະຫງົບ ສະພາແຫ່ງຊາດ ແລະ ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ ; ເຂົ້າຮ່ວມມີທ່ານ ຮອງປະທານສະພາປະຊາຊົນແຂວງວຽງຈັນ, ຄະນະກໍາມະການ, ຫົວໜ້າການເມືອງກອງບັນຊາການທະຫານແຂວງວຽງຈັນ, ຫົວໜ້າກອງບັນຊາການປ້ອງກັນຄວາມສະຫງົບແຂວງວຽງຈັນ, ປະທານສະຫະພັນນັກຮົບເກົ່າແຂວງວຽງຈັນ, ຫົວໜ້າຂະແໜງ ແລະ ພະນັກງານວິຊາການທີ່ກ້ຽວຂ້ອງພາຍໃນສະພາປະຊາຊົນແຂວງເຂົ້າຮ່ວມ.

ຈຸດປະສົງເພື່ອເປັນການລົງຊຸກຍູ້, ຕິດຕາມກວດກາການເຄົາລົບການຈັດຕັ້ງປະຕິບັດລັດຖະທໍາມະນູນ, ກົດໝາຍ,ນິຕິກໍາໃຕ້ກົດໝາຍ,ມະຕິຂອງກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ ໃນທຸກຂົງເຂດວຽກງານ ເພື່ອສະເໜີວິທີການ, ມາດຕະການໃຫ້ອົງການກ່ຽວຂ້ອງໄດ້ຮັບການປັບປຸງ ແລະ ແກ້ໄຂໃຫ້ມີຄວາມໂປ່ງໃສ, ຍຸຕິທໍາ ແລະ ສາມາດກວດສອບໄດ້.

ໂອກາດທີທາງຄະນະທີມງານ ກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ລົງເຄື່ອນໄຫວຕິດຕາມກວດກາຢູ່ແຂວງວຽງຈັນ ທ່ານ ບຸນສອນ ເພັດລາວັນ ກ່າວຕອບຮັບ ແລະ ຂອບໃຈເປັນຢ່າງສູງ ຄະນະທີມງານ ທີ່ໃຫ້ຄວາມສໍາຄັນ ແລະ ຍາດເວລາອັນມີຄຸນຄ່າມາເຄື່ອນໄຫວເຮັດວຽກ ຢູ່ແຂວງວຽກຈັນຄັ້ງນີ້, ຊື່ງມັນສະແດງເຖິງຄວາມເປັນຫວ່ງ, ເປັນໃຍ ແລະ ທັງເປັນການປຸກລະດົມ ໃຫ້ແກ່ການນໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງກໍຄື ຄະນະສະມາຊິກສະພາປະຊາຊົນແຂວງປະຈໍາເມືອງໃນທົ່ວແຂວງວຽງຈັນ ໂດຍສະເພາະ ການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງວຽງຈັນ.

ໃນຕອນບາຍຂອງວັນດຽວກັນນັ້ນ ຄະນະທີມງານກໍາມາທິການປ້ອງກັນຊາດ ແລະ ປ້ອງກັນຄວາມສະຫງົບ ສະພາແຫ່ງຊາດ, ສະພາປະຊາຊົນແຂວງວຽງຈັນ ແລະ ພາກສ່ວນທີກ່ຽວຂ້ອງໄດ້ລົງເຄື່ອນໄຫວເຮັດວຽກຢູ່ ຄ້າຍຄຸ້ມຂັງ-ດັດສ້າງ ເພື່ອຮັບຟັງການລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານຂອງຄ້າຍ.