ຕອນເຊົ້າ ວັນທີ 3 ເມສາ 2024 ທີ່ຫ້ອງປະຊຸມສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມຕິດຕາມ ກວດກາ ແລະ ເກັບກໍາຂໍ້ມູນ ຂອງກໍາມາທິການບັນດາເຜົ່າ ສະພາແຫ່ງຊາດ ກ່ຽວກັບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ແຂວງຜົ້ງສາລີ. ໂດຍການເປັນປະທານ ຂອງທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ ສະພາແຫ່ງຊາດ, ມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ທີ່ເປັນກຳມະການຂອງກຳມາທິການ ບັນດາເຜົ່າ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງ, ມີບັນດາພະແນກການ, ອົງການກ່ຽວຂ້ອງ, ອົງການແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ທີມງານຈາກສະພາແຫ່ງຊາດ ແລະ ບັນດາຄະນະກໍາມະການ, ພະນັກງານ-ວິຊາການ ທີ່ກ່ຽວຂ້ອງ ຂອງສະພາປະຊາຊົນແຂວງ ເຂົ້າຮ່ວມ.

ຈຸດປະສົງ ກອງປະຊຸມ ເພື່ອເປັນການຮັບຟັງການລາຍງານ ໃນການຕິດຕາມ ກວດກາ ການຈັດຕັ້ງປະຕິບັດກົດ  ໝາຍ, ນິຕິກໍາໃຕ້ກົດໝາຍ ຂອງບັນດາຂະແໜງການທີ່ກ່ຽວຂ້ອງກັບກໍາມາທິການບັນດາເຜົ່າ; ຕິດຕາມກວດກາການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ການຈັດສັນພູມລໍາເນົາ, ຈັດສັນອາຊີບຄົງທີ່, ສ້າງບ້ານພັດທະນາຕິດພັນກັບວຽກງານ 3 ສ້າງ, ການຈັດສັນບັນດາໂຄງການລົງທຶນຂອງລັດຂອງແຂວງ, ການພັດທະນາ ແລະ ຟືນຝູຊີວິດການເປັນຢູ່ທີ່ມີຜົນກະທົບຕໍ່ປະຊາຊົນບັນດາເຜົ່າ, ພ້ອມທັງເກັບກໍາຂໍ້ມູນຕົວຈິງຕາມຄໍາຮ້ອງ ຄໍາສະເໜີຂອງປະຊາຊົນ.

ກອງປະຊຸມ ໄດ້ຮັບຟັງການລາຍງານຈາກພະແນກກະສິກໍາ ແລະ ປ່າໄມ້ແຂວງ ກ່ຽວກັບສະພາບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ພາຍໃນແຂວງ; ຮັບຟັງການລາຍງານ ແລະ ປະກອບຄໍາເຫັນ ຈາກອົງການແນວລາວສ້າງຊາດແຂວງ, ສະຫະພັນແມ່ຍິງແຂວງ, ສະຫະພັນກໍາມະບານແຂວງ, ຄະນະບໍລິຫານງານຊາວໜູ່ມແຂວງ, ພະແນກພາຍໃນແຂວງ, ກອງບັນຊາການ ປກສ ແຂວງ, ທະນາຄານນະໂຍບາຍ ກ່ຽວກັບການປະຕິບັດພາລະບົດບາດຂອງຕົນ ໃນການຕິດຕາມກວດກາ, ການມີສ່ວນຮ່ວມ ໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ພ້ອມທັງມີຂໍ້ສະເໜີຈໍານວນໜຶ່ງ ເພື່ອເຮັດໃຫ້ການປະຕິບັດວຽກງານດັ່ງກ່າວ ໄດ້ຮັບການແກ້ໄຂ, ຖືກຕ້ອງສອດຄ່ອງກັບລະບຽບການ ຮັບປະກັນໃຫ້ມີຜົນສໍາເລັດໃນຕໍ່ໜ້າ. ຈາກນັ້ນ, ຜູ້ແທນກອງປະຊຸມກໍໄດ້ແລກປ່ຽນແລກບົດຮຽນ, ປະກອບຄໍາຄິດຄໍາເຫັນກົງໄປກົງມາ ດ້ວຍຄວາມຮັບຜິດຊອບສູງ,  ເພື່ອເປັນຂໍ້ມູນທີ່ສໍາຄັນ ໃຫ້ກຳມາທິການບັນດາເຜົ່າສະພາແຫ່ງຊາດ ໄດ້ສັງລວມ ແລະ ລາຍງານໃຫ້ຄະນະປະຈຳສະພາແຫ່ງຊາດ ແລະ ມີຄຳເຫັນສະເໜີໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX.

ກອງປະຊຸມໄດ້ດໍາເນີນເປັນເວລາ 1 ຕອນ ດ້ວຍຜົນສໍາເລັດຕາມລະດັບຄາດໝາຍ. ໃນນີ້; ຄະນະທີມງານ ສະພາແຫ່ງຊາດ ແລະ ສະພາປະຊາຊົນແຂວງ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນແຂວງ ຍັງຈະໄດ້ສືບຕໍ່ລົງເຄື່ອນໄຫວຕິດຕາມກວດກາ ບັນດາໂຄງການຈັດສັນເຂົ້າໃນວຽກງານພັດທະນາຊົນນະບົດ ແລະ ແກ້ໄຂຄວາມທຸກ ຕົວຈິງ ແລະ ພາກສະໜາມ ຢູ່ທີ່ເມືອງໃໝ່ ແລະ ເມືອງຂວາ ແຂວງຜົ້ງສາລີ

ພາບ-ຂ່າວ: ສູນທອງ