ໂດຍປະຕິບັດຕາມກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ແຜນການເຄື່ອນໄຫວປະຈໍາປີ. ກໍາມາທິການບັນດາເຜົ່າ ລົງເຄື່ອນໄຫວຕິດຕາມກວດກາ ແລະ ເກັບກໍາຂໍ້ມູນ ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ ຂອງບັນດາຂະແໜງການທີ່ກ່ຽວຂ້ອງ ເປັນຕົ້ນ: ວຽກງານສາສະໜາ, ຊົນເຜົ່າ, ການພັດທະນາຊົນນະບົດ ແລະ ແກ້ໄຂຄວາມທຸກຍາກ, ການປົກຄອງທ້ອງຖີ່ນ, ການຈັດສັນພູມລໍາເນົາ ແລະ ອາຊີບຄົງທີ່, ສ້າງບ້ານພັດທະນາຕິດພັນກັບວຽກງານ 3 ສ້າງ, ໂຄງການລົງທືນ ແລະ ການພັດທະນາທີ່ມີຜົນກະທົບຕໍ່ປະຊາຊົນບັນດາເຜົ່າ. ໃນວັນທີ 28​ ກັນຍາ​ 2022. ທີ່ຫ້ອງປະຊຸມສະພາປະຊາຊົນແຂວງ (ສພຂ), ໂດຍການເປັນປະທານຂອງທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກໍາມາທິການບັນດາເຜົ່າ ສະພາແຫ່ງຊາດ ຮ່ວມກັບທ່ານ ນາງ ພອນມະນີ ຂຽນໄຊຍະວົງ ຮອງປະທານ ສພຂ ຜູ້ຊີ້ນໍາວຽກງານວັດທະນະທໍາ-ສັງຄົມ ແລະ ບັນດາເຜົ່າ ສພຂ, ມີທ່ານ ແຫວນຄໍາ ປະທຸມມະແສງ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ (ຄວສຜ), ຕາງໜ້າຈາກອົງການແນວລາວສ້າງຊາດແຂວງ, ພະແນກພາຍໃນ, ພະແນກກະສີກໍາ ແລະ ປ່າໄມ້, ສະຫະພັນແມ່ຍິງ, ສະຫະພັນກໍາມະບານ, ກອງບັນຊາການ ປກສ ແລະ ພະນັກງານກ່ຽວຂ້ອງ.

​ກອງປະຊຸມໄດ້ຮັບຟັງການລາຍງານ ຕາມຄຳຖາມເຈາະຈິ້ມຂອງ ກຳມາທິການບັນດາເຜົ່າ ຂອງສະພາແຫ່ງຊາດ ເປັນຕົ້ນ: ກ່ຽວກັບການແກ້ໄຂປະກົດການຫຍໍ້ທໍ້ທາງສາສະໜາ ແລະ ບັນດາເຜົ່າ ຢູ່ພາຍໃນແຂວງ; ການຈັດຕັ້ງປະຕິບັດດຳລັດ ວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວຂອງສາສະໜາ ສະບັບເລກທີ 315/ລບ, ລົງວັນທີ 16/8/2016, ວຽກງານການປົກຄອງທ້ອງຖິ່ນ ແລະ ວຽກງານ 3 ສ້າງ ແລະ ວຽກງານພັດທະນາຊົນນະບົດ – ແກ້ໄຂຄວາມທຸກຍາກ, ການຈັດສັນພູມລຳເນົາ ແລະ ອາຊີບຄົງທີ່; ການສ້າງບ້ານພັດທະນາ ທີ່ຕິດພັນກັບຜົນກະທົບຈາກໂຄງການພັດທະນາ ແລະ ການແກ້ໄຂບັນຫາຂອງປະຊາຊົນບັນດາເຜົ່າທີ່ຖຶກຜົນກະທົບຈາກໂຄງການພັດທະນາຕ່າງໆ ພ້ອມດຽວກັນ, ກໍໄດ້ແລກປ່ຽນປະກອບຄຳຄິດເຫັນຕໍ່ກັບວຽກງານບັນດາເຜົ່າພາຍໃນແຂວງ ຢ່າງມີຈຸດສຸມ ເພື່ອເຮັດໃຫ້ການຈັດຕັ້ງປະຕິບັດວຽກງານບັນດາເຜົ່າພາຍໃນແຂວງ, ເມືອງ ຂອງແຂວງອັດຕະປື ຖຶກຕ້ອງຕາມແນວທາງຂອງພັກ ແລະ ລະບຽບກົດໝາຍຂອງລັດ.

​ ໂອກາດດັ່ງກ່າວ ທ່ານ ແກ້ວຈະເລີນ ເຊ່ຍຢີ້ງຢ່າງ ຍັງໄດ້ມີຄຳເຫັນໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງາມອັນພົ້ນເດັ່ນຫລາຍດ້ານຂອງພາກສ່ວນທີ່ກ່ຽວຂ້ອງທີ່ຍາດມາໄດ້ ແລະ ຮຽກຮ້ອງເນັ້ນໃຫ້ສືບຕໍ່ເອົາໃຈໃສ່ຟືນຟູວັດທະນະທໍາ, ສົ່ງເສີມການສືກສາ ແລະ ແກ້ໄຂບັນຫາຮີດຄອງປະເພນີທີ່ບໍ່ຖືກຕ້ອງສອດຄ່ອງ,ເອົາໃຈໃສ່ທ່າແຮງທີ່ເປັນມູນເຊື້ອໃນການສົ່ງເສີມກະສີກໍາ ການປູກ,ການລ່ຽງໃຫ້ປະຊາຊົນບັນດາເຜົ່າ, ຍົກສູງໃນການຕິດຕາມ, ກວດກາ ກ່ຽວກັບວຽກງານເຜົ່າ ແລະ ສາສະໜາ ຢູ່ພາຍໃນແຂວງ ແລະ ລົງໃກ້ຊິດຕິດແທດກັບປະຊາຊົນບັນດາເຜົ່າໃຫ້ຫລາຍຂຶ້ນກວ່າເກົ່າ ເພື່ອນຳເອົາວຽກງານເຜົ່າ ແລະ ສາສະໜານຳເອົາແນວທາງຂອງພັກ, ລະບຽບກົດໝາຍຂອງລັດ ລົງໃຫ້ປະຊາຊົນຮັບຮູ້ເຊື່ອມຊຶມ ແລະ ເຂົ້າໃຈ.
(ນັກຂ່າວ: ສພຂ ອັດຕະປື)