ການຕິດຕາມກວດກາ ເປັນວຽກງານໜຶ່ງທີ່ສໍາຄັນຢ່າງຍິງຕໍ່ການຈັດຕັ້ງປະຕິບັດວຽກງານຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ. ວັນທີ 8 ເມສາ 2024 ນີ້ ທີ່ຫ້ອງປະຊຸມສະພາປະຊາຊົນແຂວງບໍ່ແກ້ວ ໄດ້ຈັດກອງປະຊຸມຕິດຕາມກວດກາ ແລະ ເກັບກໍາຂໍ້ມູນກ່ຽວກັບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ປະຈໍາປີ 2024 ໂດຍການເປັນປະທານຂອງທ່ານ ຄໍາຈັນ ໂສຕາປະເສີດ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການບັນດາເຜົ່າ ສະພາແຫ່ງຊາດ.
ເຂົ້າຮ່ວມມີທ່ານ ພັ.ອ ຫຸມແພງ ອິນທະຈັກ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ, ຮອງປະທານສະພາປະຊາຊົນແຂວງບໍ່ແກ້ວ ຊຸດທີ II, ມີສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ, ບັນດາພະແນກການ, ອົງການທີ່ກ່ຽວຂ້ອງ, ສອງກອງບັນຊາການ ປກຊ-ປກສ ແຂວງ ພ້ອມດ້ວຍທີມງານຈາກສະພາແຫ່ງຊາດ, ພະນັກງານສະພາປະຊາຊົນແຂວງບໍ່ແກ້ວ ເຂົ້າຮ່ວມຢ່າງພ້ອມພຽງ. ທັງນີ້, ກໍເພື່ອເປັນການຮັບຟັງການລາຍງານສະພາບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ແຂວງບໍ່ແກ້ວ ຕາມກົດໝາຍ ແລະ ນິຕິກໍາໃຕ້ກົດໝາຍຂອງບັນດາຂະແໜງການ, ອົງການທີ່ກ່ຽວຂ້ອງ ໂດຍສະເພາະດໍາລັດ 348/ລບ, ລົງວັນທີ 16 ພະຈິກ 2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ.
ກອງປະຊຸມ ທ່ານ ພັ.ອ ຫຸມແພງ ອິນທະຈັກ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ, ຮອງປະທານສະພາປະຊາຊົນແຂວງບໍ່ແກ້ວ ຊຸດທີ II ໄດ້ມີຄໍາເຫັນກ່າວຈຸດປະສົງ ແລະ ລາຍງານສະພາບການຈັດຕັ້ງປະຕິບັດວຽກງານ ພາຍໃນສະພາປະຊາຊົນແຂວງບໍ່ແກ້ວ ໂດຍຫຍໍ້ຕໍ່ກອງປະຊຸມ.
ຈາກນັ້ນ, ປະທານກອງປະຊຸມໄດ້ມີຄໍາເຫັນເຈາະຈີ້ມ ໃຫ້ບັນດາພະແນກການ, ອົງການທີ່ກ່ຽວຂ້ອງ ລາຍງານສະພາບການຈັດຕັ້ງປະຕິບັດວຽກງານຂອງຕົນ ເຊິ່ງມີ 8 ພາກສ່ວນຂຶ້ນລາຍງານ ແລະ ອີກ 1 ພາກສ່ວນແມ່ນສົ່ງບົດລາຍງານ (ພະແນກພາຍໃນແຂວງ) ເນື່ອງຈາກມີກອງປະຊຸມປະຈໍາປີຂອງຕົນ ຈຶ່ງບໍ່ສາມາດເຂົ້າຮ່ວມກອງປະຊຸມໄດ້, ການລາຍງານຂອງແຕ່ລະພາກສ່ວນແມ່ນຕາມການເຈາະຈີ້ມຂອງປະທານກອງປະຊຸມ ແລະ ພາຍຫຼັງຮັບຟັງການລາຍງານສໍາເລັດມີຄໍາເຫັນເຈາະຈີ້ມບາງບັນຫາທີ່ຍັງບໍ່ທັນຈະແຈ້ງຕື່ມອີກ ເຊິ່ງພະແນກການທີ່ຂຶ້ນລາຍງານປະກອບມີ: ພະແນກກະສິກໍາ ແລະ ປ່າໄມ, ພະແນກສຶກສາທິການ ແລະ ກິລາ, ພະແນກພະລັງງານ ແລະ ບໍ່ແຮ່, ພະແນກສາທາລະນະສຸກ, ພະແນກແຜນການ ແລະ ການລົງທຶນ, ອົງການແນວລາວລາວສ້າງຊາດແຂວງ, ກອງບັນຊາການປ້ອງກັນຄວາມສະຫງົບແຂວງ, ກອງບັນຊາການທະຫານແຂວງ ແລະ ການປະກອບຄໍາເຫັນຂອງທ່ານຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ, ຮອງປະທານສະພາປະຊາຊົນແຂວງບໍ່ແກ້ວ ຊຸດທີ II. ກອງປະຊຸມໄດ້ມີຄໍາເຫັນແລກປ່ຽນ, ສົນທະນາຢ່າງກົງໄປກົງມາ ກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດ, ການລາຍງານສະພາບການຈັດຕັ້ງປະຕິບັດວຽກງານຂອງບັນດາພະແນກການ, ອົງການທີ່ກ່ຽວຂ້ອງຄັ້ງນີ້ ເປັນຂໍ້ມູນພື້ນຖານໃຫ້ແກ່ກໍາມາທິການບັນດາເຜົ່າ ສະພາແຫ່ງຊາດ ເພື່ອລາຍງານຕໍ່ຄະນະປະຈໍາສະພາແຫ່ງຊາດ ກໍຄືກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ທັງເປັນບ່ອນອີງໃນການປຶກສາຫາລື ແລະ ສະເໜີພາກສ່ວນທີ່ກ່ຽວຂ້ອງຂັ້ນສູນກາງຊອກຫາວິທີການຄົ້ນຄວ້າ, ແກ້ໄຂ ແລະ ຕອນທ້າຍທ່ານປະທານກອງປະຊຸມ ຍັງໄດ້ແນະນໍາວິທີການ, ຂັ້ນຕອນການຈັດຕັ້ງປະຕິບັດວຽກງານຕ່າງໆ ເພື່ອເປັນບົດຮຽນໃຫ້ແກ່ພະແນກການ, ອົງການທີ່ກ່ຽວຂ້ອງນໍາໄປຈັດຕັ້ງປະຕິບັດ.
ໃນລະຫວ່າງວັນທີ 9-10 ເມສາ 2024 ຄະນະທີມງານດັ່ງກ່າວ ຍັງຈະສືບຕໍ່ລົງເຄື່ອນໄຫວຕິດຕາມກວດກາ ແລະ ເກັບກໍາຂໍ້ມູນ ຢູ່ເມືອງຕົ້ນເຜີ້ງ ແລະ ເມືອງຜາອຸດົມ ຕື່ມອີກ.
ພາບ ແລະ ຂ່າວ: ສພຂ ບໍ່ແກ້ວ