ວັນທີ 24 ສິງຫາ 2022 ຜ່ານມາ ກໍາມາທິການບັນດາເຜົ່າ ສະພາແຫ່ງຊາດ ນໍາໂດຍ ທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ, ຊຸກຍູ້ ວຽກງານບັນດາເຜົ່າ ຢູ່ແຂວງໄຊຍະບູລີ.
ໂອກາດດັ່ງກ່າວ, ຄະນະໄດ້ຮັບຟັງການລາຍງານກ່ຽວກັບວຽກງານເຜົ່າ ແລະ ສາສະໜາ ຈາກຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ ສະພາປະຊາຊົນແຂວງໄຊຍະບູລີ, ພ້ອມດຽວກັນຍັງໄດ້ຮັບຟັງການລາຍງານບາງວຽກງານຂອງຂະແໜງການກ່ຽວຂ້ອງເປັນຕົ້ນແມ່ນ ການຈັດຕັ້ງປະຕິບັດວຽກງານ 3 ສ້າງ, ການແກ້ໄຂປະກົດການຫຍໍ້ທໍ້ວຽກງານເຜົ່າ ແລະ ສາສະໜາ; ວຽກງານການຈັດສັນ, ຍົກຍ້າຍບ້ານທີ່ຖືກຜົນກະທົບຈາກໂຄງການລົງທຶນຕ່າງໆ. ນອກນັ້ນ, ຍັງໄດ້ຮັບຟັງການເຜີຍແຜ່ບາງມາດຕາຂອງມະຕິຄະນະປະຈໍາສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກໍາມາທິການບັນດາເຜົ່າ; ມະຕິຄະນະປະຈໍາສະພາແຫ່ງຊາດ ວ່າດ້ວຍການພົວພັນວຽກງານລະຫວ່າງ ກໍາມາທິການບັນດາເຜົ່າ ກັບ ບັນດາຂະແໜງການ-ອົງການ ທີ່ກ່ຽວຂ້ອງ ແລະ ຂໍ້ຕົກລົງວ່າດ້ວຍການພົວພັນລະຫວ່າງ ຄະນະປະຈໍາສະພາແຫ່ງຊາດ ກັບ ຄະນະປະຈໍາສູນກາງແນວລາວສ້າງຊາດ.
ທັງນີ້, ກໍເພື່ອເປັນການລົງຕິດຕາມກວດກາ ແລະ ຊຸກຍູ້ ທັງເປັນການລົງເກັບກໍາຂໍ້ມູນ ໃຫ້ແກ່ກອງປະຊຸມຄົບຄະນະປະຈໍາປີຂອງກໍາມາທິການ ແລະ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ.

ພາບ-ຂ່າວ: ນີ່ຕູ່ ປະສິດທິພົງ