(ສພຊ) ວັນທີ 16 ກັນຍາຜ່ານມາ, ທີ່ຫໍສະພາແຫ່ງຊາດ ກຳມາທິການຍຸຕິທຳ ສະພາແຫ່ງຊາດ ໄດ້ສຳເລັດກອງປະຊຸມປຶກສາຫາລືວຽກງານຈໍານວນໜຶ່ງ ເພື່ອກະກຽມເນື້ອໃນລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ວຽກການສ້າງນິຕິກໍາຮ່ວມ ລະຫວ່າງ ກໍາມາທິການຍຸຕິທໍາ ກັບ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເພື່ອເປັນບ່ອນອີງໃນການເຄື່ອນໄຫວວຽກງານຮ່ວມກັນໃນຕໍ່ໜ້າ ໃຫ້ມີຄວາມໂລ່ງລ່ຽນ ແລະ ຄ່ອງແຄ້ວກວ່າເກົ່າ ໂດຍການເປັນປະທານກອງປະຊຸມຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ; ເຂົ້າຮ່ວມມີທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ແລະ ທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ; ມີບັນດາຄະນະກົມ, ຄະນະພະແນກ ແລະ ພະນັກງານວິຊາການທີ່ກ່ຽວຂ້ອງຈຳນວນໜຶ່ງ.

ກອງປະຊຸມ ໄດ້ຮັບຟັງບົດສະຫຼຸບການຈັດຕັ້ງ ແລະ ການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການປະຈໍາປີ 2023 ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ; ບົດລາຍງານຜົນການປະເມີນການຈັດຕັ້ງປະຕິບັດ 4 ກົດໝາຍ ໃນຂົງເຂດຍຸຕິທໍາ ແລະ ວຽກການສ້າງນິຕິກໍາຮ່ວມ ລະຫວ່າງ ກໍາມາທິການຍຸຕິທໍາ ກັບສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ; ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ປະ ກອບຄຳຄິດຄຳເຫັນ, ປຶກສາຫາລື ເພື່ອເອກະພາບກັນກະກຽມ ແລະ ຈັດຕັ້ງປະຕິບັດໃຫ້ມີຜົນສໍາເລັດຕາມຄາດໝາຍ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)