ເພື່ອຮັບປະກັນໃຫ້ການຕິດຕາມ,ກວດກາ ການຈັດຕັ້ງປະຕິບັດກົດໝາຍໃນຂົງເຂດວຽກງານການຕິດຕາມກວດກາຂອງກຳມາທິການແຜນການ, ການເງິນ ແລະ ການກວດສອບ ໃນລະຫວ່າງວັນທີ 22-23 ສິງຫາ 2024 ກໍາມາທິການແຜນການ,ການເງິນ ແລະ ການກວດສອບ ນໍາໂດຍ ທ່ານ ທັນຕາ ກອງຜາລີ ຮອງກຳມາທິການແຜນການ,ການເງິນ ແລະ ການກວດສອບ ພ້ອມດ້ວຍຄະນະ ໄດ້ເຄື່ອນໄຫວວຽກງານຢູ່ ແຂວງຫຼວງນ້ຳທາ ໃນໂອກາດດັ່ງກ່າວ ຄະນະໄດ້ເຂົ້າຂໍ່ານັບການນໍາຂອງແຂວງ ພ້ອມທັງ ເປີດກອງປະຊຸມຮ່ວມກັບສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງຂອງແຂວງ ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານ ທ່ານ ທັນຕາ ກອງຜາລີ ຮອງກຳມາທິການແຜນການ,ການເງິນ ແລະ ການກວດສອບ ແລະ ໂດຍການໃຫ້ກຽດເຂົ້າຮ່ວມຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ເຂົ້າຮ່ວມມີ ຮອງປະທານສະພາປະຊາຊົນແຂວງ,ປະທານຄະນະກຳມະການ,ຄະນະເລຂາທິການ ,ຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງອ້ອມຂ້າງແຂວງ, ທະນາຄານ, ຫົວໜ້າ,ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງ ເຂົ້າຮ່ວມທັງໝົດ 33 ທ່ານ , ໃນກອງປະຊຸມໄດ້ຮັບຟັງການລາຍງານຫຍໍ້ຈາກບັນດາພະແນກການທີ່ກ່ຽວຂ້ອງອ້ອມຂ້າງແຂວງເປັນຕົ້ນແມ່ນຄວາມຄືບໜ້າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງຕາມມະຕິທີ່ສະພາປະຊາຊົນແຂວງຮັບຮອງ, , ການຜະລິດເປັນສິນຄ້າເພື່ອທົດແທນການນຳເຂົ້າ ແລະ ສົ່ງອອກຕ່າງປະເທດທີ່ເປັນພື້ນຖານຂອງແຂວງ,ຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດໂຄງການລົງທຶນຂອງລັດ ແລະ ກາຍລົງທຶນຂອງພາກເອກະຊົນ, ການກະກຽມແຜນການຈັດສັນໂຄງການລົງທືນຂອງລັດປີ 2025, ສະພາບການຈັດຕັ້ງປະຕິບັດແຜນງົບປະມານປະຈຳປີ 2024 ຂອງແຂວງ, ການແບ່ງຂັ້ນຄຸ້ມຄອງໃນການຈັດເກັບລາຍຮັບລະຫວ່າງສູນກາງ ແລະ ທ້ອງຖິ່ນ, ຂໍ້ສະດວກ ແລະ ຂໍ້ຫຍຸ້ງຍາກໃນການນຳໃຊ້ເຄື່ອງມືທີ່ທັນສະໄໝໃນການເກັບລາຍຮັບ ແລະ ຄຸ້ມຄອງລາຍຈ່າຍ, ການຈັດຕັ້ງປະຕິບັດມາດຕະການປະຢັດ ແລະ ຕ້ານການຟຸມເຟືອຍ,ການເຜີຍແຜ່ ແລະ ການຈັດຕັ້ງປະຕິບັດກົດໝາຍອາກອນທີ່ດິນຢູ່ແຂວງ,ການກະກຽມຮ່າງແຜນງົບປະມານແຫ່ງລັດ ແລະ ງົບປະມານການລົງທຶນຂອງລັດປະຈຳປີ 2025,ການຈັດຕັ້ງປະຕິບັດແຜນເງິນຕາປະຈຳປີ 2024 ຂອງແຂວງ,ການຈັດຕັ້ງປະຕິບັດກົດໝາຍຂົງເຂດທະນາຄານ,ການຄຸ້ມຄອງເງິນຕາຕ່າງປະເທດຢູ່ພາຍໃນແຂວງ,ການຄຸ້ມຄອງການແລກປ່ຽນເງິນຕາຕ່າງປະເທດ,ການຕິດລາຄາສີນຄ້າ ແລະ ການຊໍາລະເປັນເງິນກີບ,ການຄຸ້ມຄອງການນຳໃຊ້ເງິນຕາຕ່າງປະທດຢູ່ຊາຍແດນ,ຂໍ້ສະດວກ ແລະ ຂໍ້ຫຍຸ້ງຍາກໃນການສະໜອງສິນເຊື່ອເພື່ອການສົ່ງເສີມການຜະລິດທົດແທນການນຳເຂົ້າສິນຄ້າຈາກຕ່າງປະເທດພາຍໃນແຂວງ.

ຈຸດປະສົງຂອງການລົງເຄື່ອນໄຫວໃນຄັ້ງນີ້ແມ່ນເພື່ອຍົກສູງພາລະບົດບາດຕິດຕາມ,ຊຸກຍູ້, ກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃນຂົງເຂດວຽກງານແຜນການ,ການເງິນ ແລະ ການກວດສອບ, ເພື່ອຊຸກຍູ້ໃຫ້ການເຄື່ອນໄຫວຢູ່ແຂວງຫລວງນ້ຳທາຂອງກຳມາທິການແຜນການ,ການເງິນ ແລະ ການກວດສອບ ສະພາແຫ່ງຊາດ ໃຫ້ບັນລຸຕາມແຜນການທີ່ວາງໄວ້, ເພື່ອເກັບກຳຂໍ້ມູນກ່ຽວກັບຂົງເຂດວຽກງານແຜນການ,ການເງີນ ແລະ ການກວດສອບ ພາຍໃນແຂວງ ເພື່ອກະກຽມເນື້ອໃນໃຫ້ຄະນະປະຈຳສະພາແຫ່ງຊາດ ແລະ ສະເໜີລັດຖະບານຫາວິທີແກ້ໄຂ.

ໂອກາດນີ້ ກຳມາທິການແຜນການ,ການເງິນ ແລະ ກວດສອບ ສະພາແຫ່ງຊາດ ນຳໂດຍທ່ານ  ທັນຕາ ກອງຜາລີ ຮອງກຳມາທິການແຜນການ,ການເງິນ ແລະ ການກວດສອບ ຮ່ວມຄະນະກຳມະການເສດຖະກິດແຜນການ ແລະ ການເງິນ ສະພາປະຊາຊົນແຂວງ ພ້ອມດ້ວຍຄະນະ ໄດ້ເຄື່ອນໄຫວວຽກງານຢູ່ ເຂດເສດຖະກິດພິເສດບໍ່ເຕ່ນແດນງາມ ເພື່ອຮັບຟັງການລາຍງານກ່ຽວກັບສະພາບລວມຂອງຄະນະຄຸ້ມຄອງດ່ານສາກົນບໍ່ເຕ່ນແດນງາມ,ຂໍ້ສະດວກ,ຂໍ້ຫຍຸ້ງຍາກທາງດ້ານເສດຖະກິດ ແລະ ການຈັດເກັບລາຍຮັບຂອງດ່ານບໍ່ເຕ່ນ ແລະ ຮັບຟັງສະພາບລວມການພັດທະນາເຂດເສດຖະກິດບໍ່ເຕ່ນແດນງາມ ຂອງແຂວງຫຼວງນ້ຳທາ ນອກນັ້ນ ຍັງໄດ້ລົງພື້ນທີຕົວຈິງເບີ່ງກິດຈະກຳບາງສ່ວນຂອງເຂດເສດຖະກິດບໍ່ເຕ່ນແດນງາມ.

ໂດຍ ນາງ ອໍາພອນ ສີປະເສິດ