ເພື່ອຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ ໃນລະຫວ່າງວັນທີ 15-16 ສິງຫາ 2024 ກໍາມາທິການການຕ່າງປະເທດ ສະພາແຫ່ງຊາດ ນໍາໂດຍ ທ່ານ ຈັນທະວົງ ແສນອາມາດມົນຕີ, ຮອງປະທານກໍາມາທິການການຕ່າງປະເທດ ພ້ອມດ້ວຍຄະນະໄດ້ເຄື່ອນໄຫວວຽກງານຢູ່ ແຂວງຫຼວງນ້ຳທາ ໃນໂອກາດນີ້ ຄະນະໄດ້ເຂົ້າຢ້ຽມຂໍ່ານັບການນໍາແຂວງ ແລະ ເປີດກອງປະຊຸມຮ່ວມສະພາປະຊາຊົນແຂວງ, ພາກສ່ວນທີ່ກ່ຽວຂ້ອງຂອງແຂວງ ທີ່ຫ້ອງປະຊຸມສະພາປະຊາຊົນແຂວງ.

​ຈຸດປະສົງຂອງການລົງເຄື່ອນໄຫວໃນຄັ້ງນີ້ ແມ່ນເພື່ອ​ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍໃນຂົງເຂດວຽກງານການຕ່າງປະເທດ ກໍຄື ການຕິດຕາມການຈັດຕັ້ງປະຕິບັດ ບັນດາສົນທິສັນຍາ ແລະ ສັນຍາສາກົນ ທີ່ສາທາລະນະລັດ ປະຊາທິປະໄຕ ປະຊາຊົນລາວ ເປັນພາຄີ ເປັນຕົ້ນ, ການຄຸ້ມຄອງດ່ານສາກົນ, ການຄຸ້ມຄອງຄົນເຂົ້າ-ອອກເມືອງ, ບັນຫາການຄ້າມະນຸດການ, ການແຕ່ງງານທີ່ບໍ່ຖືກຕ້ອງຕາມກົດໝາຍ, ພ້ອມທັງຊຸກຍູ້ການຕິດຕາມກວດກາການຈັດຕັ້ງປະຕິບັດ ແລະ ຄຸ້ມຄອງໂຄງການຊ່ວຍເຫຼືອລ້າ (ODA), ການລົງທຶນຂອງຕ່າງປະ ເທດ, ອົງການທີ່ບໍ່ແມ່ນລັດຖະບານ (NGOs) ແລະ ອື່ນໆ ຢູ່ ສປປ ລາວ; ພ້ອມທັງເກັບກໍາບັນຫາທີ່ພົ້ນເດັ່ນກ່ຽວກັບວຽກງານຂົງເຂດການຕ່າງປະເທດຢູ່ທ້ອງຖິ່ນ ເພື່ອລາຍງານຕໍ່ຄະນະປະຈໍາສະພາແຫ່ງຊາດ.

ໃນກອງປະຊຸມໄດ້ຮັບຟັງການລາຍງານຫຍໍ້ຈາກບັນດາພະແນກການທີ່ກ່ຽວຂ້ອງ ອ້ອມຂ້າງແຂວງ ກ່ຽວກັບວຽກງານການຕ່າງປະເທດ; ພ້ອມດຽວກັນນັ້ນ, ທ່ານ ຈັນທະວົງ ແສນອາມາດມົນຕີ ຮອງປະທານກໍາມາທິການການຕ່າງປະເທດ ໄດ້ເໜັ້ນໜັກໃຫ້ເອົາໃຈໃສ່ຕື່ມບາງບັນຫາເຊັ່ນ:ການຈັດຕັ້ງປະຕິບັດບັນດາກົດໝາຍ ແລະ ນິຕິກໍາໄຕ້ກົດໝາຍໃນການປະຕິບັດວຽກງານໃນຂົງເຂດຕ່າງປະເທດ, ການຄຸ້ມຄອງໂຄງການລົງທຶນຂອງຕ່າງປະເທດ ເປັນຕົ້ນການແກ້ໄຂບັນຫາຜົນກະທົບຕໍ່ສິ່ງແວດລ້ອມ, ການຄຸ້ມຄອງໂຄງການຊ່ວຍເຫຼືອລ້າ ແລະ ການຄຸ້ມຄອງຄົນເຂົ້າ-ອອກເມືອງ, ການຄຸ້ມຄອງຄົນຕ່າງດ້າວ ແລະ ບັນຫາອື່ນໆ ທີ່ສົ່ງຜົນກະທົບເຖິງຊິວິດການເປັນຢູ່ຂອງປະຊາຊົນ. ຕອນແລງຂອງວັນດຽວກັນ ຄະນະຍັງໄດ້ລົງເຄື່ອນໄຫວເຮັດວຽກຮ່ວມກັບຄະນະຄຸ້ມຄອງດ່ານສາກົນບໍ່ເຕ່ນ ແລະ ຄະນະຄຸ້ມຄອງເຂດເສດຖະກິດແຂວງຫລວງນ້ຳທາ ເພື່ອຮັບຟັງການຈັດຕັ້ງປະຕິບັດວຽກງານໃນໄລຍະຜ່ານມາ, ຂໍ້ສະດວກ, ຂໍ້ຫຍຸ້ງຍາກ ແລະ ບັນຫາທີ່ພົ້ນເດ່ນໃນວຽກງານຕ່າງປະເທດ

ພາບຂ່າວ ວັນນີ ແຝງບົວວັນດ