ວັນທີ 14 ສິງຫາ 2024 ທີ່ຫ້ອງປະຊຸມສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມຕິດຕາມກວດກາ ການຈັດຕັ້ງປະຕິບັດກົດໝາຍ ໃນຂົງເຂດວຽກງານການຕ່າງປະເທດ ຢູ່​ແຂວງ​ຜົ້ງ​ສາ​ລີ. ໂດຍການເປັນປະທານຮ່ວມ ຂອງທ່ານ ຈັນທະວົງ ແສນອາມາດມົນຕີ ຮອງປະທານກໍາມາທິການການຕ່າງປະເທດ ສະພາແຫ່ງຊາດ ແລະ ທ່ານ ສົມຈິດ ຫັບລະກອນ ຮອງປະທານຄະນະປະຈໍາສະພາປະຊາຊົນແຂວງຜົ້ງສາລີ, ມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ມີບັນດາພະແນກການ, ອົງການກ່ຽວຂ້ອງ ແລະ ຄະນະທີມງານຈາກສະພາແຫ່ງຊາດ, ຄະນະກໍາມະການ, ຄະນະເລຂາທິການສະພາປະຊາຊົນແຂວງ, ພະນັກງານ-ວິຊາການ ທີ່ກ່ຽວຂ້ອງ ຂອງສະພາປະຊາຊົນແຂວງ ເຂົ້າຮ່ວມ

ກອງປະຊຸມ ໄດ້ຮັບຟັງຕາງໜ້າຈາກພະແນກພະ​ແນກ​ແຜນການ ແລະ ການລົງທຶນແຂວງ ລາຍງານ ກ່ຽວກັບການຈັດຕັ້ງປະຕິບັດ ແລະ ຄຸ້ມຄອງໂຄງການຊ່ວຍເຫຼືອລ້າ (ODA) ການລົງທຶນຂອງຕ່າງປະເທດ; ກອງບັນຊາການ ປກສ ແຂວງ ລາຍງານ ກ່ຽວກັບການຄຸ້ມຄອງດ່ານສາກົນ (ການຂົນສົ່ງສິນຄ້າຜ່ານແດນ ລາວ-ຈີນ, ລາວ-ຫວຽດນາມ ການຄຸ້ມຄອງຄົນເຂົ້າ-ອອກເມືອງ; ພະແນກການຕ່າງປະ ເທດແຂວງ ລາຍງານ  ກ່ຽວກັບການຕິດຕາມ ແລະ ການຄຸ້ມຄອງ ການເຄື່ອນໄຫວຂອງອົງການທີ່ບໍ່ຂື້ນກັບລັດຖະບານ (INGOs), ອົງການຈັດຕັ້ງທາງສັງຄົມຂອງຕ່າງປະເທດ (CSO); ສະຫະພັນແມ່ຍິງແຂວງ ລາຍງານ ກ່ຽວກັບການຄ້າມະນຸດ ໂດຍສະເພາະ ແມ່ຍິງ ແລະ ເດັກນ້ອຍ; ພະແນກ ພາຍໃນແຂວງ ລາຍງານ ກ່ຽວກັບ ການລັກລອບແຕ່ງງານ ລະຫວ່າງຄົນລາວ ແລະ ຄົນຕ່າງປະເທດ ແບບຜິດກົດໝາຍ; ພະແນກແຮງງານ ແລະ ສະຫວັດດິການສັງຄົມ ລາຍງານ ກ່ຽວກັບ ການຄຸ້ມຄອງຄົນຕ່າງດ້າວ ແລະ ແຮງງານຕ່າງປະເທດ ໃນໄລຍະຜ່ານມາ. ຈາກນັ້ນ, ຜູ້ແທນກອງປະຊຸມກໍໄດ້ແລກປ່ຽນແລກບົດຮຽນ, ປະກອບຄໍາຄິດຄໍາເຫັນກົງໄປກົງມາ ດ້ວຍຄວາມຮັບຜິດຊອບສູງ,  ເພື່ອເປັນຂໍ້ມູນທີ່ສໍາຄັນ ໃຫ້ກຳມາທິການ ໄດ້ສັງລວມ ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ບັນຫາທີ່ຄົງຄ້າງ ທີ່ຈະຕ້ອງຊອກຫາວິທີການແກ້ໄຂ ໃນການຈັດຕັ້ງປະຕິບັດບັນດາກົດໝາຍ ທີ່ພົວພັນກັບວຽກງານດັ່ງກ່າວ.

ນອກຈາກນີ້, ຄະນະທີມງານ ສະພາແຫ່ງຊາດ ແລະ ສະພາປະຊາຊົນແຂວງ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນແຂວງ ຍັງໄດ້ລົງເຄື່ອນໄຫວຢ້ຽມຢາມໂຮງງານຢາງພາລາ ຂອງບໍລິສັດ ຊີຊຸຍຢົງອີ້ ຢູ່ເຂດບ້ານນໍ້າແພ ເມືອງບຸນເໜືອ ແຂວງຜົ້ງສາລີ.

ພາບ-ຂ່າວ: ສູນທອງ