(ສພຊ) ລະຫວ່າງວັນທີ 24-30 ກັນຍາ 2023 ກໍາມາທິການການຕ່າງປະເທດ ສະພາແຫ່ງຊາດ, ນໍາໂດຍ ທ່ານ ສັນຍາ ປຣະເສີດ ກໍາມະການຄະນະປະຈໍາສະພາແຫ່ງຊາດ, ປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ລົງຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍໃນຂົງເຂດວຽກງານການຕ່າງປະເທດ ຮ່ວມກັບສະພາປະຊາຊົນຂັ້ນແຂວງ ຢູ່ 3 ແຂວງຄື: ສະຫວັນນະເຂດ, ຄຳມ່ວນ ແລະ ບໍລິຄຳໄຊ.

ຈຸດປະສົງຂອງການລົງເຄື່ອນໄຫວຄັ້ງນີ້ ແມ່ນເພື່ອຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ລັດຖະທໍາມະນູນ ແລະ ກົດໝາຍໃນຂົງເຂດວຽກງານການຕ່າງປະເທດ; ການຈັດຕັ້ງປະຕິບັດ ແລະ ຄຸ້ມຄອງ ໂຄງການຊ່ວຍເຫຼືອລ້າ (ODA), ການລົງທຶນຂອງຕ່າງປະເທດ, ອົງການທີ່ບໍ່ແມ່ນລັດຖະບານ (NGOs), ອົງການຈັດຕັ້ງທາງສັງຄົມຂອງຕ່າງປະເທດ (CSO) ແລະ ອື່ນໆ ຢູ່ ສປປລາວ; ການຈັດຕັ້ງປະຕິບັດ ບັນດາສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ເປັນຕົ້ນ ບັນຫາການຄ້າມະນຸດ ໂດຍສະເພາະ ແມ່ຍິງ ແລະ ເດັກນ້ອຍ; ບັນຫາການຂຸດຄົ້ນແຮ່ທາດ ແລະ ຈຸດບໍລິການທ່າບົກ; ວຽກງານຊາຍແດນ, ການຄຸ້ມຄອງຫຼັກໝາຍຊາຍແດນແຫ່ງຊາດ, ການຄຸ້ມຄອງ ແລະ ການບໍລິຫານດ່ານສາກົນ, ດ່ານທ້ອງຖິ່ນ, ຄົນເຂົ້າ-ອອກເມືອງ, ການຄ້າຢາເສບຕິດ, ການຄ້າມະນຸດ ແລະ ບັນຫາການຄ້າຂາຍເຖື່ອນຕາມບໍລິເວນຊາຍແດນ; ເກັບກໍາ, ບັນຫາທີ່ພົ້ນເດັ່ນກ່ຽວກັບວຽກງານຂົງເຂດການຕ່າງປະເທດ ຢູ່ທ້ອງຖິ່ນ ເພື່ອລາຍງານຕໍ່ ຄະນະປະຈໍາສະພາແຫ່ງຊາດ.

ໃນໂອກາດດັ່ງກ່າວ, ຄະນະ ໄດ້ເຂົ້າຢ້ຽມພົບປະການນໍາຂອງແຂວງ, ເຮັດວຽກກັບສະພາປະຊາຊົນແຂວງ ແລະ ບັນດາພະແນກການຕ່າງໆ ຂອງແຂວງ ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານໃນຂົງ ເຂດການຕ່າງປະເທດ, ແຜນການ ແລະ ການລົງທຶນ, ປ້ອງກັນຊາດ-ປ້ອງກັນຄວາມສະຫງົບ, ວຽກງານພາຍໃນ ແລະ ອື່ນໆ. ພ້ອມດຽວກັນນັ້ນ, ປະທານກໍາມາທິການການຕ່າງປະເທດ ກໍໄດ້ເນັ້ນໃຫ້ເອົາໃຈໃສ່ຕື່ມບາງບັນຫາ ເຊັ່ນ: ການຄຸ້ມຄອງຫຼັກໝາຍຊາຍແດນແຫ່ງຊາດ, ບັນຫາການຂຸດຄົ້ນແຮ່ທາດ, ໂຄງການສ້າງຕາຝັ່ງກັນເຈື່ອນ. ຈາກນັ້ນ, ຄະນະ ຍັງໄດ້ລົງເຄື່ອນໄຫວພົບປະເຮັດວຽກກັບຄະນະຄຸ້ມຄອງດ່ານສາກົນແດນສະຫວັນ ແຂວງສະຫວັນນະເຂດ, ຢ້ຽມຢາມ ບໍລິສັດ ອາກຣີ ໂປຕາສ ຈໍາກັດ ແຂວງຄຳມ່ວນ ແລະ ຢ້ຽມຢາມໂຄງການກໍ່ສ້າງດ່ານສາກົນຂົວມິດຕະພາບ ລາວ-ໄທ ແຫ່ງທີ 5 ພ້ອມທັງຕິດຕາມຄວາມຄືບໜ້າການກໍ່ສ້າງຕົວຈິງ.