ໃນຕອນເຊົ້າຂອງວັນທີ 22 ມິຖຸນາ 2022 ຜ່ານມາ ຢູ່ທີ່ສະໂມສອນສະພາປະຊາຊົນ ແຂວງ ເຊກອງ ໄດ້ຈັດພິທີສະຫຼຸບ ຂະບວນການແຂ່ງຂັນ 5 ເປັນເຈົ້າຂອງກຳມະບານຮາກຖານສະພາປະຊາຊົນແຂວງ ປະຈໍາປີ 2021 ໂດຍການເຂົ້າຮ່ວມເປັນປະທານຂອງທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ, ທ່ານ ສະຫງຽນ ຄຸນນະທິບ ຮອງປະທານຄະນະບໍລິຫານງານສະຫະພັນກຳມະບານແຂວງ, ທ່ານ ສຸກັນ ທັນທະວົງສາ ປະທານກຳມະບານຮາກຖານສະພາປະຊາຊົນແຂວງ, ມີບັນດາຄະນະພັກ, ຄະນະ       ກໍາມະບານຮາກຖານ ພ້ອມດ້ວຍສະມາຊິກ ແລະ ແຂກທີ່ຖືກເຊີນ ເຂົ້າຮ່ວມ.

             ໃນພິທີ ທ່ານ ສຸກັນ ທັນທະວົງສາ ໄດ້ຂຶ້ນຜ່ານ ບົດສະຫຼຸບຕີລາຄາຄືນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານສະພາປະຊາຊົນແຂວງ ປະຈຳປີ 2021 ແລະ ທິດທາງ ແຜນການ ປີ 2022 ເຊິ່ງປະຈຸບັນກຳມະບານ ຮາກຖານສະພາປະຊາຊົນແຂວງ ມີສະມາຊິກກຳມະບານທັງໝົດ 45 ສະຫາຍ, ຍິງ 19 ສະຫາຍ. ໄລຍະຜ່ານມາກຳມະບານຮາກຖານສະພາປະຊາຊົນແຂວງ ໄດ້ຖືເອົາວຽກງານໂຄສະນາສຶກສາອົບຮົມການເມືອງ-ແນວຄິດເປັນກົກ ດ້ວຍການເຜີຍແຜ່, ເຊື່ອມຊືມບັນດາມະຕິ, ຄໍາສັ່ງ, ກົດລະບຽບຂອງພັກ, ກົດໝາຍຂອງລັດ, ໂດຍສະເພາະແມ່ນ ນິຕິກຳຕ່າງໆຂອງສູນກາງສະຫະພັນກຳມະບານວາງອອກແຕ່ລະໄລຍະໃຫ້ສະມາຊິກກຳມະບານ, ພະນັກງານ-ລັດຖະກອນພາຍໃນສະພາປະຊາຊົນແຂວງໄດ້ຮັບຮູ້ ແລະ ເຂົ້າໃຈ ເຊິ່ງພາລະບົດບາດ, ສິດ, ໜ້າທີ່ຂອງຕົນ ໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຕິດພັນກັບການປະຕິບັດວຽກງານວິຊາສະເພາະຢູ່ໃນກົມກອງຂອງຕົນ. ເຊິ່ງແຕ່ລະເນື້ອໃນຂໍ້ແຂ່ງຂັນ 5 ເປັນເຈົ້າ ເຫັນວ່າສາມາດປະຕິບັດໄດ້ 90% ຂຶ້ນໄປ. ພ້ອມນັ້ນ, ຍັງໄດ້ຮັບຟັງກ່ຽວກັບແຜນການສູ້ຊົນຂະບວນການແຂ່ງຂັນ 5 ເປັນເຈົ້າໃນຕໍ່ໜ້າຕື່ມອີກ.

ຈາກນັ້ນ, ໃນພິທີຍັງໄດ້ມອບ-ຮັບ ໃບຢັ້ງຢືນກຳມະບານ 5 ເປັນເຈົ້າ ຂອງປະທານຄະນະບໍລິຫານງານສະຫະພັນກຳມະບານແຂວງ ໃຫ້ກຳມະບານຮາກຖານສະພາປະຊາຊົນແຂວງ ທີ່ບັນລຸຄາດໝາຍການປະເມີນຜົນເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2021 ເປັນກຽດກ່າວມອບໂດຍ ທ່ານ ສະຫງຽນ ຄຸນນະທິບ ຮອງປະທານຄະນະບໍລິຫານງານສະຫະພັນກຳມະບານແຂວງ ແລະ ກ່າວຮັບໂດຍ ທ່ານ ສຸກັນ ທັນທະວົງສາ ປະທານກຳມະບານຮາກຖານ ສະພາປະຊາຊົນແຂວງ.

         ໃນຕອນທ້າຍກອງປະຊຸມ ກໍໄດ້ຮັບຟັງການໂອ້ລົມ ຂອງທ່ານ ສະຫງຽນ ຄຸນນະທິບ ເຊິ່ງທ່ານໄດ້ເນັ້ນໃຫ້ຄະນະກຳມະບານຮາກຖານ ສືບຕໍ່ໂຄສະນາສຶກສາອົບຮົມອົບຮົມ ການເມືອງ-ແນວຄິດ ໃຫ້ສະມາຊິກກຳມະບານ, ພະນັກງານ-ລັດຖະກອນ ພາຍໃນຮາກຖານ, ສືບຕໍ່ຮັກສາມູນເຊື້ອ ພ້ອມທັງຍູ້ແຮງການຈັດຕັ້ງປະຕິບັດຂະບວນການແຂ່ງຂັນເນື້ອໃນ 5 ເປັນເຈົ້າ ຂອງສະຫະພັນກຳມະບານລາວ ໃຫ້ໝັ້ນຄົງ ແລະ ຍືນຍົງ.                                                        #ໂດຍ: ນັກຂ່າວ ສພຂ ເຂດທີ 16.