ໃນວັນທີ 16 ກຸມພາ 2024 ນີ້. ທີ່ຫ້ອງປະຊຸມສະພາປະຊາຊົນແຂວງ (ສພຂ), ກໍາມະບານຮາກຖານ ສພຂ ໄດ້ຈັດກອງປະຊຸມສະຫຼຸບເນື້ອໃນຂະບວນການແຂ່ງຂັນ 5 ເປັນເຈົ້າປະຈໍາປີ2023 ແລະ ເປີດຂະບວນການແຂ່ງຂັນ 5ເປັນເຈົ້າປະຈໍາປີ 2024. ໂດຍການເປັນປະທານຂອງສະຫາຍ ແສງປະດິດ ສຸດນາມສຸລີນ ປະທານກໍາມະບານຮາກຖານ ສພຂ ເຂົ້າຮ່ວມມີສະຫາຍ ແຫວນຄໍາ ປະທຸມມະແສງ ຄະນະພັກ, ຄະນະປະຈໍາ ສພຂ , ສະຫາຍ ພູສຽງ ເຫຼຶ່ອມມະໄລສີ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີບັນດາສະຫາຍຮອງປະທານກໍາມະບານຮາກຖານ ສພຂ, ກໍາມະບານຮາກຖານອ້ອມຂ້າງແຂວງທີ່ຖືກເຊີນ ພ້ອມດ້ວຍສະມາຊິກກໍາມະບານຮາກຖານ ສພຂ ເຂົ້າຮ່ວມຢ່າງພ້ອມພຽງ.
ກອງປະຊຸມ, ສະຫາຍ ແສງປະດິດ ສຸດນາມສຸລີນ ຂື້ນຜ່ານບົດສະຫຼຸບການເຄື່ອນໄຫວການຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າປະຈໍາປີ 2023 ຂອງກໍາມະບານຮາກຖານ ສພຂ ໄດ້ຕິລາຄາສູງຕໍ່ການຈັດຕັ້ງເຄື່ອນໄຫວຂອງກໍາມະບານຮາກຖານ ສພຂ ໃນໄລຍະຜ່ານມາ ເຊິ່ງມີບາດກ້າວຂະຫຍາຍຕົວມີຜົນສໍາເລັດໃນຫຼາຍດ້ານ,ໄດ້ເອົາໃຈໃສ່ຜັນຂະຫຍາຍແນວທາງຂອງໜ່ວຍພັກສະພາປະຊາຊົນແຂວງ, ແຜນການຂອງສະຫະພັນກໍາມະບານແຂວງວາງອອກ, ເຄື່ອນໄຫວນໍາພາວຽກງານໄດ້ຢ່າງສອດຄ່ອງກັບຄວາມຮຽກຮ້ອງຕ້ອງການຂອງສະພາບການປ່ຽນແປງໃນໄລຍະໃໝ່, ເຊີດຊູບົດບາດເປັນຕົວແທນ ໃນການສືກສາອົບຮົມ ແລະປຸກລະດົມພະນັກງານ ເສີມຂະຫຍາຍມູນເຊື້ອຮັກຊາດ,ມູນເຊື້ອແຫ່ງຄວາມສາມັກຄີເດັດດ່ຽວຜ່ານຜ່າຄວາມຫຍຸ້ງຍາກນາໆປະການ, ພະນັກງານສະມາຊິກກໍາມະບານ ຍາມໄດກໍ່ມີຄວາມຈົ່ງຮັກພັກດີ,ສາມັກຄີເປັນເອກະພາບພາຍໃນ ສູ້ຊົນປະຕິບັດມະຕິກອງປະຊຸມໃຫ່ຍຂອງອົງຄະນະພັກແຂວງ,ແຜນພັດທະນາເສດຖະກິດ-ສັງຄົມ, ແຜນການຂອງສະພາປະຊາຊົນແຂວງ, ປຸກລະດົມສະມາຊິກຕັ້ງໜ້າປະຕິບັດພັນທະໜ້າທີ່ຂອງຕົນ ແລະ ບຸກຄົນດີເດັ່ນໄດ້ຮັບການຍ້ອງຍໍຈາກສູນກາງສະຫະພັນກໍາມະບານລາວ,ສະຫະພັນກໍາມະບານແຂວງ,ອົງການປົກຄອງແຕ່ລະຂັ້ນ, ເປັນຕົ້ນແມ່ນການປົກປ້ອງສິດແລະຜົນປະໂຫຍດອັນຊອບທໍາຂອງຊາວຜູ້ອອກແຮງງານ,ຂະຫຍາຍສະມາຊິກກອງທຶນຊ່ວຍເຫຼືອເຊິ່ງກັນແລະກັນ,ສ້າງຂະບວນການແຂ່ງຂັນ5ເປັນເຈົ້າຢ່າງເປັນຂະບວນຟົດຟື້ນ ເພື່ອປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄື ແຂວງອັດຕະປື.
ຈາກນັ້ນ, ກໍໄດ້ຜ່ານຂໍ້ຕົກລົງຂອງສະຫະພັນກໍາມະບານແຂວງວ່າດ້ວຍການອະນຸມັດມອບໃບຍ້ອງຍໍ ແລະ ໃບຢັ້ງຢືນ ໃຫ້ກົມກອງ, ອະນຸມັດທຸງໄຊແຂ່ງຂັນ5ເປັນເຈົ້າສະໄໝທີ II. ໃຫ້ກໍາມະບານຮາກຖານ ສພຂ. ຜ່ານແຜນການເຄື່ອນໄຫວການຈັດຕັ້ງປະຕິບັດຂະບວນການແຂ່ງຂັນ 5 ເປັນເຈົ້າປະຈໍາປີ 2024 ຂອງກໍາມະບານຮາກຖານ ສພຂ.
ຕອນທ້າຍ ສະຫາຍ ແຫວນຄໍາ ປະທຸມມະແສງ ແລະ ສະຫາຍ ພູສຽງ ເຫຼຶ່ອມມະໄລສີ ໄດ້ໂອ້ລົມ ເຊິ່ງໄດ້ຍ້ອງຍໍຊົມເຊີຍຕໍ່ກັບຜົນງານການເຄື່ອນໄຫວຂອງກໍາມະບານຮາກຖານກໍ່ຄືສະມາຊິກກໍາມະບານ ສະພາປະຊາຊົນ ພ້ອມນັ້ນຍັງໄດ້ເນັ້ນໜັກໃຫ້ຄະນະກໍາມະບານຮາກຖານສືບຕໍ່ສຶກສາອົບຮົມການເມືອງນໍາພາແນວຄິດໃຫ້ສະມາຊິກກໍາມະບານ, ຈົ່ງພ້ອມການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າທີຕິດພັນກັບການປະຕິບັດວຽກງານວິຊາສະເພາະຂອງແຕ່ລະສະຫາຍດ້ວຍຄວາມຮັບຜິດຊອບໃຫ້ສໍາເລັດ ແລະ ປະກົດຜົນເປັນຈິ່ງ.