ເພື່ອສະຫຼຸບຕີລາຄາ ຜົນງານການເຄື່ອນໄຫວການຈັດຕັ້ງປະຕິບັດວຽກງານ ປະຈໍາເດືອນ ກຸມພາ-ມີນາ 2024 ແລະ ວາງທິດທາງແຜນການ ປະຈໍາເດືອນ ເມສາ 2024, ຕອນບ່າຍ ຂອງວັນທີ 01 ເມສາ 2024 ທີ່ຫ້ອງປະຊຸມ ສະພາປະຊາຊົນແຂວງ (ສພຂ) ໄດ້ຈັດກອງປະຊຸມດໍາເນີນຊີວິດການເມືອງ ກໍາມະບານຮາກຖານສະພາປະຊາຊົນປະຊາຊົນ ປະຈໍາເດືອນ ກຸມພາ-ມີນາ 2024 ໂດຍການເປັນປະທານ ຂອງ ສະຫາຍ ນາງ ຄໍາພອນ ພິມມະຈັນ ຄະນະບໍລິຫານງານສະຫະພັນກໍາມະບານແຂວງ, ປະທານກໍາມະບານຮາກຖານ ສະພາປະຊາຊົນແຂວງ, ມີຄະນະກໍາມະບານ ພ້ອມດ້ວຍສະມາຊິກກໍາມະບານພາຍໃນ ສະພາປະຊາຊົນແຂວງເຂົ້າຮ່ວມ.
ໃນພິທີໄດ້ຜ່ານຮ່າງບົດສະຫຼຸບ ການເຄື່ອນໄຫວວຽກງານປະຈໍາເດືອນ ກຸມພາ-ມີນາ 2024 ແລະ ທິດທາງແຜນການ ປະຈໍາເດືອນ ເມສາ 2024; ຕະຫຼອດໄລຍະສອງເດືອນຜ່ານມາ ຄະນະກໍາມະບານຮາກຖານສະພາປະຊາຊົນແຂວງ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກໍາມະບານເປັນປົກກະຕິ, ໄດ້ເຜີຍແຜ່ເຊື່ອມຊຶມບັນດາເອກະສານສໍາຄັນຕ່າງໆ, ຄົ້ນຄວ້າຮໍ່າຮຽນ, ເຊື່ອມຊຶມກໍາແໜ້ນແນວທາງຂອງພັກ ແລະ ລະບຽບກົດໝາຍ, ສະມາຊິກກໍາມະບານມີແນວຄິດອຸ່ນອ່ຽນທຸ່ນທ່ຽງ, ມີຄວາມສາມັກຄີເປັນຈິດໜຶ່ງໃຈດຽວ, ເປັນເຈົ້າການຈັດຕັ້ງປະຕິບັດໜ້າທີ່ການເມືອງ ຕາມການມອບໝາຍ ຊຶ່ງມີຜົນສໍາເລັດຫຼາຍດ້ານ. ຈາກນັ້ນ, ໄດ້ຜ່ານແຜນການເຄື່ອນໄຫວກະກຽມດໍາເນີນຂໍ້ແຂ່ງຂັນ 5 ເປັນເຈົ້າ ແລະ ດໍາເນີນກອງປະຊຸມໃຫຍ່ ຄັ້ງທີ VII ຂອງກໍາມະບານຮາກຖານ ສະພາປະຊາຊົນແຂວງ, ບົດສະຫຼຸບຖອດຖອນບົດຮຽນກ່ຽວກັບວຽກກອງທຶນພັດທະນາ 3 ອົງການຈັດຕັ້ງມະຫາຊົນ ປະຈໍາປີ 2023 ແລະ ແຈ້ງການ ຂອງກໍາມະບານແຂວງ ສະບັບເລກທີ124/ສກລ, ລົງວັນທີ 27 ກຸມພາ2024. ໃນພິທີ ບັນດາສະມາຊິກກໍາມະບານ ໄດ້ມີຄໍາຄິດຄໍາເຫັນແລກປ່ຽນກັນເຊິ່ງກັນ ແລະ ກັນ ເພື່ອຄົ້ນຄວ້າ, ປຶກສາຫາລື, ຊອກຫາວິທີທາງແກ້ໄຂ ບັນດາຂໍ້ຄົງຄ້າງໃນຕໍ່ໜ້າ ເພື່ອເຮັດວຽກງານການເຄື່ອນໄຫວ ຂອງສະຫະພັນກໍາມະບານຮາກຖານ ສະພາປະຊາຊົນແຂວງ ໃຫ້ມີປະສິດພາບ ແລະ ປະສິດທິຜົນສູງ.
ພາບ ແລະ ຂ່າວ: ສພຂ