(ສພຊ) – ຕອນບ່າຍວັນທີ 3 ກັນຍາຜ່ານມາ ທີ່ສະພາແຫ່ງຊາດ, ທ່ານ ສິງ ເລືອງວີຫານ ຫົວໜ້າກົມວຽກງານຊົນເຜົ່າ, ກຳມາທິການບັນດາເຜົ່າ ໄດ້ພົບປະ ແລະ ເຮັດວຽກກັບທ່ານ ເຫຼິນ ຊຽງກວາງ (REN Xianguang) ຫົວໜ້າກົມຮ່ວມມືສາກົນ, ຄະນະກຳມະການຊົນເຜົ່າແຫ່ງຊາດຈີນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຮ່ວມກັບກະຊວງພາຍໃນ ຂອງ ສປປລາວ ລະຫວ່າງວັນທີ 1-5 ກັນຍາ 2024.
ທ່ານ ສິງ ເລືອງວີຫານ ໄດ້ສະແດງຄວາມຍິນດີຕ້ອນຮັບ ທັງແຈ້ງໃຫ້ຊາບໂດຍຫຍໍ້ພາລະບົດບາດ, ສິດ ແລະ ໜ້າທີ່ຂອງກົມວຽກງານຊົນເຜົ່າ; ພ້ອມກັນນັ້ນ, ກໍສະແດງຄວາມຂອບໃຈຕໍ່ການມາພົບປະ ແລະ ເຮັດວຽກໃນຄັ້ງນີ້ ເຊິ່ງຈະເປັນການປະກອບສ່ວນເສີມສ້າງການພົວພັນລະດັບວິຊາການຂອງສອງປະເທດ ລາວ-ຈີນ ໃຫ້ນັບມື້ເກີດດອກອອກຜົນຍິ່ງໆຂຶ້ນ.
ທ່ານ ເຫຼິນ ຊຽງກວາງ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງແຈ້ງໃຫ້ຊາບໂດຍຫຍໍ້ຈຸດປະສົງການມາເຮັດວຽກຮ່ວມກັບກະຊວງພາຍໃນຂອງ ສປປລາວ; ພາລະບົດບາດ, ສິດ, ໜ້າທີ່ ແລະ ໂຄງປະກອບກົງຈັກການຈັດຕັ້ງຂອງກົມຮ່ວມມືສາກົນ, ຄະນະກຳມະການຊົນເຜົ່າແຫ່ງຊາດຈີນ.
(ນາງ ອາລິນ ສຸພິມມະປະດິດ)