ຕອນເຊົ້າຂອງວັນທີ 18 ທັນວາ 2023 ນີ້ ຢູ່ທີຫ້ອງປະຊຸມສະພາປະຊາຊົນແຂວງຫລວງນ້ຳທາ ກຳມາທິການ ປກຊ-ປກສ ແລະ ກຳມາທິການຍຸຕິທຳ ສະພາແຫ່ງຊາດ ໄດ້ເປີດກອງປະຊຸມຮ່ວມກັບພາກສ່ວນທີກ່ຽວຂ້ອງ ໂດຍການເປັນປະທານຂອງ ທ່ານ ພົຕ ປອ ວົງສັກ ພັນທະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານກຳມາທິການ ປກຊ-ປກສ ສະພາແຫ່ງຊາດ, ໃຫ້ກຽດເຂົ້າຮ່ວມໂດຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານຄະນະປະຈຳສະພາປະຊາຊົນແຂວງ, ປະທານ, ຮອງປະທານສາມຄະນະກຳມະການ, ຫົວຫນ້າ ຮອງຫົວຫນ້າສອງກອງບັນຊາການ ປກຊ-ປກສ ແລະ ພາກສ່ວນທີກ່ຽວຂ້ອງເຂົ້າຮ່ວມທັງໝົດ 32 ທ່ານ, ຍິງ 7 ທ່ານ
ໃນກອງປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດກົດໝາຍຂົງເຂດວຽກງານຂອງກອງບັນຊາການທະຫານແຂວງ, ຮັບຟັງການລາຍງານກ່ຽວກັບວຽກງານການດຳເນີນຄະດີ, ການສືບສວນ-ສອບສວນ ຈາກກອງບັນຊາການ ປກສ ແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຫນື່ງປີ ແລະ ທິດທາງແຜນການຂອງຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທຳ.
ໃນຕອນບ່າຍຂອງວັນດຽວກັນ ທ່ານ ພົຕ ປອ ວົງສັກ ພັນທະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານກຳມາທິການ ປກຊ-ປກສ ສະພາແຫ່ງຊາດ ພ້ອມດ້ວຍຄະນະ ແລະ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ລົງຕິດຕາມກວດກາຢູ່ຄ້າຍຄຸມຂັງ-ດັດສ້າງແຂວງຫລວງນໍ້າທາ ພ້ອມທັງຮັບຟັງການລາຍງານສະພາບຈຸດພິເສດ, ການຈັດຕັ້ງປະຕິບັດວຽກງານໃນໄລຍະຜ່ານມາ, ຂໍ້ສະດວກ, ຂໍ້ຫຍຸ້ງຍາກ ແລະ ແຜນການທີຈະສຸມໃສ່ຈັດຕັ້ງປະຕິບັດໃນຕໍ່ໜ້າ.
ແລະ ໃນຕອນເຊົ້າຂອງວັນທີ 19 ທັນວາ 2023 ກຳມາທິການ ປກຊ-ປກສ ແລະ ກຳມາທິການຍຸຕິທຳ ສະພາແຫ່ງຊາດ, ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງ ຍັງໄດ້ລົງຕິດຕາມກວດກາ, ເກັບກຳຂໍ້ມູນ ແລະ ເປີດກອງປະຊຸມຮ່ວມຄະນະຄຸ້ມຄອງດ່ານສາກົນບໍ່ເຕ່ນ ຢູ່ຫ້ອງປະຊຸມຄະນະຄຸ້ມຄອງດ່ານສາກົນບໍ່ເຕ່ນ ເພື່ອຮັບຟັງການລາຍງານໂດຍຫຍໍ້ໃນການຈັດຕັ້ງປະຕິບັດວຽກງານໃນໄລຍະຜ່ານມາເປັນຕົ້ນ ຈຸດກວດກາການກວດຄົນເຂົ້າ-ອອກເມືອງ, ການກວດກາລົດຂົນສົ່ງສິນຄ້າເຂົ້າ-ອອກ ແລະ ວຽກງານປິ່ນອ້ອມອື່ນໆ ພ້ອມດຽວກັນ ທ່ານ ພົຕ ປອ ວົງສັກ ພັນທະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານກຳມາທິການ ປກຊ-ປກສ ສະພາແຫ່ງຊາດ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຂະແໜງການຄະນະຄຸ້ມຄອງດ່ານສາກົນບໍ່ເຕ່ນ ທີ່ໄດ້ຈັດຕັ້ງປະຕິບັດວຽກງານເຫັນໄດ້ເຖີງຜົນສຳເລັດຫລານຍດ້ານ ແລະ ຮຽກຮ້ອງໃຫ້ສືບຕໍ່ຈັດຕັ້ງປະຕິບັດວຽກງານ, ປະຕິບັດກົດໝາຍ ໃຫ້ມີຄຸນນະພາບຂຶ້ນກວ່າເກົ່າ.
ນັກຂ່າວ ສພຂ ຫຼວງນໍ້າທາ