(ສພຊ) – ໃນໂອກາດແຫ່ງການດໍາເນີນກອງປະຊຸມໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45, ໃນວັນທີ 18 ຕຸລານີ້ ທີ່ຫໍປະຊຸມແຫ່ງຊາດ ໄດ້ມີການພົບປະລະຫວ່າງກຳມາທິການວັດທະນະທຳ-ສັງຄົມ ສະພາແຫ່ງຊາດ ແຫ່ງ ສປປລາວ ກັບ ກຳມາທິການວັດທະນະທຳ ແລະ ສຶກສາ ສະພາແຫ່ງຊາດ ແຫ່ງ ສສ.ຫວຽດນາມ, ຝ່າຍກໍາມາທິການຂອງສະພາແຫ່ງຊາດລາວ ນຳໂດຍສະຫາຍ ບຸນຕາ ເທບພະວົງ ກໍາມະການສໍາຮອງສູນກາງພັັກ, ກຳມະການຄະນະປະຈໍາສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ພ້ອມຄະນະ ແລະ ຝ່າຍ ສສ.ຫວຽດນາມ ນຳໂດຍສະຫາຍ ຫງວຽນ ດັກ ວິງ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານກຳມາທິການວັດທະນະທຳ ແລະ ສຶກສາ ພ້ອມຄະນະ ເຊິ່ງການພົບປະໃນຄັ້ງນີ້ ແມ່ນເພື່ອສືບຕໍ່ຮັດແໜ້ນ ແລະ ເສີີມຂະຫຍາຍສາຍພົວພັນຮ່ວມມືຂອງສອງກໍາມາທິການ ກໍຄືສອງສະພາແຫ່ງຊາດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອຄວາມສາມັກຄີພິເສດ ທີ່ບໍ່ມີປະເທດໃດເໝືອນ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.

ໃນການພົບປະ ແລະ ເຮັດວຽກຮ່ວມກັນໃນເທື່ອນີ້, ສອງຝ່າຍໄດ້ເຫັນດີສືບຕໍ່ຈັດຕັ້ງປະຕິບັດເນື້ອໃນຈິດໃຈ ຂອງບົດບັນທຶກວ່າດ້ວຍການຮ່ວມມືລະຫວ່າງສອງກໍາມາທິການ ກໍຄືສອງສະພາແຫ່ງຊາດ ລາວ-ຫວຽດນາມ ໃຫ້ເປັນຮູບປະທຳຫຼາຍຂຶ້ນຕື່ມ ໂດຍເນັ້ນໜັກໃຫ້ສືບຕໍ່ພົບປະຢ້ຽມຢາມ ແລະ ເຮັດວຽກຮ່ວມກັນໃຫ້ຫຼາຍຂຶ້ນ ເພື່ອແລກປ່ຽນ ແລະ ຖອດຖອນບົດຮຽນເຊິ່ງກັນແລະກັນ ໃນການຄົ້ນຄວ້າ, ວິເຄາະ, ວິໄຈ ໃນຂົງເຂດວັດທະນະທໍາ-ສັງຄົມ ເປັນຕົ້ນວຽກງານສຶກສາ, ສາທາລະນະສຸກ, ແຮງງານ ແລະ ສະຫວັດດີການສັງຄົມ, ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ໃຫ້ໄດ້ຮັບການປັບປຸງໄປສູ່ຄຸນນະພາບໃໝ່ເທື່ອລະກ້າວ; ສືບຕໍ່ຊຸກຍູ້ການຈັດຕັ້ງປະຕິບັດບັນດາສັນຍາ, ສົນທິສັນ ຍາ ແລະ ຂໍ້ຕົກລົງລະຫວ່າງສອງລັດຖະບານ; ສືບຕໍ່ຮ່ວມມື ແລະ ສະໜັບສະໜູນເຊິ່ງກັນແລະກັນ ໃນການເຄື່ອນໄຫວວຽກງານໃນເວທີລະດັບພາກພື້ນ ແລະ ສາກົນ.

(ຂ່າວ: ກຳມາທິການວັດທະນະທຳ-ສັງຄົມ)