ກອງປະຊຸມໄດ້ຮັບຟັງການລາຍງານຕາມຄຳຖາມເຈາະຈິ້ມຂອງກຳມາທິການບັນດາເຜົ່າ ເປັນຕົ້ນ: ການຈັດຕັ້ງປະຕິບັດ 9 ຄາດໝາຍ ຕາມມະຕິ 82/ສພຊ, ລົງວັນທີ 30 ທັນວາ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2022 ແລະ ທິດທາງແຜນການປະຈໍາປີ 2023; ການປະເມີນມາດຕະຖານພົ້ນທຸກ ແລະ ມາດຕະຖານພັດທະນາ ຕາມດຳລັດ 348/ລບ, ລົງວັນທີ 16 ພະຈິກ 2017 ເພື່ອຈັດຕັ້ງປະຕິບັດບັນດາຄາດໝາຍຂອງແຜນປີ 2024 ໃຫ້ສຳເລັດ; ການແກ້ໄຂປາກົດການຫຍໍ້ທໍ້ທາງສາສະໜາ ແລະ ບັນດາເຜົ່າຢູ່ພາຍໃນແຂວງ. ຈາກນັ້ນ, ທ່ານ ຄໍາຈັນ ໂສຕາປະເສີດ ໃນນາມປະທານກອງປະ ຊຸມ ໄດ້ມີຄໍາຊັກຖາມເຈາະຈີ້ມບາງບັນຫາໃນການຈັດຕັ້ງປະຕິບັດວຽກງານ; ບັນດາຜູ້ເຂົ້າຮ່ວມກໍໄດ້ພ້ອມກັນແລກປ່ຽນ ຄໍາຄິດຄໍາເຫັນ ແລະ ຕອບຂໍ້ຊັກຖາມຢ່າງກົງໄປກົງມາ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ໂດຍຍົກໃຫ້ເຫັນເຖິງຂໍ້ສະດວກ ແລະ ດ້ານດີ ທີ່ຄວນເສີມຂະຫຍາຍ, ຂໍ້ຫຍຸ້ງຍາກ ແລະ ຂໍ້ຄົງຄ້າງ ທີ່ຕ້ອງຊອກຫາວິທີການ ແລະ ມາດຕະການປັບປຸງແກ້ໄຂ, ສິ່ງທ້າທາຍຕ່າງໆ ແລະ ບາງບົດຮຽນທີ່ຖອດຖອນໄດ້ ເພື່ອເປັນຂໍ້ມູນພື້ນຖານລາຍງານຕໍ່ ຄປຈສພຊ ມີທິດຊີ້ນໍາໃນຂັ້ນຕໍ່ໄປ ແລະ ເພື່ອເຮັດໃຫ້ການຈັດຕັ້ງປະຕິບັດວຽກງານບັນດາເຜົ່າທົ່ວແຂວງຄໍາມ່ວນ ຖືກ ຕ້ອງຕາມແນວທາງຂອງພັກ ແລະ ລະບຽບກົດໝາຍຂອງລັດ.

ໃນຕອນທ້າຍ, ປະທານກອງປະຊຸມໄດ້ມີຄໍາເຫັນ ແລະ ກ່າວສະແດງຄວາມຍ້ອງຍໍຊົມເຊີຍຕໍ່ສະພາປະຊາຊົນແຂວງຄໍາມ່ວນ ທີ່ປະສານສົມທົບເປັນຂົວຕໍ່ໄປຍັງພາກສ່ວນທີ່ກ່ຽວຂ້ອງຂອງແຂວງ ແລະ ເມືອງ ໃນການເຂົ້າຮ່ວມເຄື່ອນໄຫວຕິດຕາມກວດກາ, ຊຸກຍູ້ວຽກງານໃນຂົງເຂດບັນດາເຜົ່າຄັ້ງນີ້; ສະແດງຄວາມຂອບໃຈບັນດາພະແນກການ, ຂະແໜງການທີ່ກ່ຽວຂ້ອງ ທີ່ໄດ້ໃຫ້ການຮ່ວມມື ແລະ ສະໜອງຂໍ້ມູນຮອບດ້ານ ເຊິ່ງຈະເປັນຂໍ້ມູນພື້ນຖານອັນສຳຄັນ, ເປັນບ່ອນອີງທີ່ຈະສັງລວມລາຍງານຕໍ່ຄະນະປະຈໍາສະພາແຫ່ງຊາດ ພິຈາລະນາ ແລະ ໃຫ້ທິດຊີ້ນໍາໃນການຈັດຕັ້ງປະຕິ ບັດວຽກງານດັ່ງກ່າວໃນຕໍ່ໜ້າ. ພ້ອມນັ້ນ, ກໍຮຽກຮ້ອງໃຫ້ທຸກພາກສ່ວນເຮັດໜ້າທີ່ຕາມພາລະບົດບາດຂອງຕົນດ້ວຍຄວາມເອົາໃຈໃສ່, ຍົກສູງຄວາມຮັບຜິດຊອບໜ້າທີ່ການເມືອງ, ເອົາໃຈໃສ່ສຶກສາອົບຮົມພໍ່ແມ່ປະຊາຊົນໃຫ້ເຊື່ອມຊຶມເຂົ້າ ໃຈແຈ້ງ ແລະ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຂອງກອງປະຊຸມສະພາແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃຫ້ມີປະສິດທິພາບ ແລະ ປະສິດທິຜົນ; ໃກ້ຊິດຕິດແທດ, ພົບປະ-ຮັບຕ້ອນປະຊາຊົນ, ເກັບກໍາ ແລະ ນໍາເອົາຄໍາຄິດຄໍາເຫັນ ແລະ ຄໍາສະເໜີຂອງປະຊາຊົນ ເພື່ອສະເໜີຕໍ່ສະພາແຫ່ງຊາດ, ສະພາປະຊາຊົນແຂວງ ແລະ ພາກສ່ວນອື່ນທີ່ກ່ຽວຂ້ອງ ພິຈາລະນາ, ແກ້ໄຂ ທັງຕິດຕາມຜົນຂອງການແກ້ໄຂ, ສະຫຼຸບລາຍງານການເຄື່ອນໄຫວວຽກງານໃນເຂດເລືອກຕັ້ງຂອງຕົນຢ່າງເປັນປົກກະຕິ, ຕໍ່ເນື່ອງ ແລະ ທັນກຳນົດເວລາ; ເພີ່ມທະວີການພົວພັນ, ປະສານສົມທົບກັນທັງພາຍໃນ ແລະ ພາຍນອກ, ລະຫວ່າງສູນກາງ ແລະ ທ້ອງຖິ່ນ ກັບພາກສ່ວນທີ່ກ່ຽວຂ້ອງ ເພື່ອເປັນທ່າແຮງຕໍ່ການຊຸກຍູ້ ແລະ ຕິດຕາມການປະຕິບັດວຽກງານຂອງຂະແໜງການໃນຂົງເຂດບັນດາເຜົ່າໃຫ້ມີຜົນສຳເລັດ.

ໃນວັນທີ 16-17 ພຶດສະພາ, ຄະນະຍັງໄດ້ລົງຕິດຕາມກວດກາ ແລະ ຊຸກຍູ້ວຽກງານຢູ່ເມືອງບົວລະພາ ແລະເມືອງຫີນບູນ ຕື່ມອີກ.

(ເອື້ອ ມະໂນສິງ)