ເພື່ອຕິດຕາມກວດກາ, ເກັບກໍາຂໍ້ມູນກ່ຽວກັບການຈັດຕັ້ງປະຕິບັດຄາດໝາຍຂອງວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ການແກ້ໄຂປະກົດການຫຍໍ້ທໍ້ທາງສາດສະໜາ ລະຫວ່າງວັນທີ 27 -30  ພຶດສະພາ 2024 ນີ້ກໍາມາທິການບັນດາເຜົ່າຂອງສະພາແຫ່ງຊາດ ໄດ້ລົງເຄື່ອນໄຫວຕິດຕາມກວດກາກ່ຽວກັບການຈັດຕັ້ງປະຕິບັດຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິ 82/ສພຊ,ລົງວັນທີ30/12/2022 ໂອກາດນີ້ໄດ້ເປີດກອງປະຊຸມຮ່ວມພະແນກການທີ່ກ່ຽວຂ້ອງຂອງແຂວງ, ປະຊຸມຮ່ວມຫ້ອງວ່າການປົກຄອງເມືອງສິງ, ເມືອງລອງ ແລະ ເຂດຈຸດສຸມທັງ 2 ເມືອງ  ນຳໂດຍທ່ານ ແກ້ວຈະເລີນ ເຢ່ຍຢີ້ງຢາງ ຮອງປະທານກຳມາທິການບັນດາເຜົ່າ ສະພາແຫ່ງຊາດ ແລະ ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ພ້ອມດ້ວຍຄະນະ ໃຫ້ກຽດເຂົ້າຮ່ວມມີບັນດາທ່ານເລຂາພັກເມືອງ, ມີສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຫົວໜ້າ,ຮອງຫົວໜ້າຫ້ອງການຂອງເມືອງທີ່ກ່ຽວຂ້ອງ, ຄະນະພັກຮາກຖານກຸ່ມບ້ານ, ພ້ອມດ້ວຍພໍ່ແມ່ປະຊາຊົນເຂົ້າຮ່ວມທັງໝົດ 100 ກວ່າທ່ານ.

ໂອກາດລົງຢ້ຽມຢາມເຄື່ອນໄຫວຕິດຕາມກວດກາ ແຂວງຫລວງນໍ້າທາຄັ້ງນີ້ ໄດ້ຮັບຟັງການລາຍງານສະພາບການພັດທະນາ ແລະ ແກ້ໄຂ ຄວາມທຸກຍາກຕາມມະຕິ 82/ສພຊ,ລົງວັນທີ30/12/2022 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2022 ແລະ ທິດທາງແຜນການປະຈຳປີ 2023 ຂອງບັນດາພະແນກການທີ່ກ່ຽວຂ້ອງແຂວງ, ຫ້ອງການທີ່ກ່ຽວຂ້ອງຂອງເມືອງ, ແລະ ເຂດຈຸດສຸມຂອງເມືອງເປັນຕົ້ນ; ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ການຈັດຕັ້ງປະຕິບັດບັນດາຈຸດສຸມ ບໍລິມະສິດລະຫວ່າງສູນກາງ ແລະ ທ້ອງຖິ່ນ 20 ຈຸດສຸມ ພັດທະນາເພື່ອສ້າງຕົວແບບພັດທະນາ ແລະ 25 ຈຸດສຸມຈັດສັນພູມລໍາເນົາ; ຂອດການປະສານງານລະຫວ່າງສູນກາງ ແລະ ແຂວງ, ກັບພາກສ່ວນທີ່ກ່ຽວຂ້ອງຂອງແຂວງ, ເມືອງ  ແລະ ການແກ້ໄຂປະກົດການຫຍໍ້ທໍ້ທາງສາດສະໜາ ນອກນັ້ນ ຜູ້ເຂົ້າຮ່ວມຍັງໄດ້ລາຍງານຕາມຄຳຖາມເຈາະຈິ້ມຂອງກຳມາທິການທີ່ກ່ຽວຂ້ອງ ຂອງສະພາແຫ່ງຊາດ ເພື່ອເປັນຂໍ້ມູນສໍາຄັນໃຫ້ກຳມາທິການທີ່ກ່ຽວຂ້ອງ ຂອງສະພາແຫ່ງຊາດ ນຳສະເໜີຕໍ່ຄະນະປະຈຳສະພາແຫ່ງຊາດ ເຂົ້າຄົ້ນຄວ້າພິຈາລະນາສົ່ງໃຫ້ລັດຖະບານ ເພື່ອຄົ້ນຄວ້າ, ນຳເຂົ້າໃນກອງປະຊຸມສະພາແຫ່ງຊາດທີ່ຈະໄຂຂື້ນໃນຕໍ່ໜ້າ.

ໂອກາດລົງຕິດຕາມຄັ້ງນີ້ ຍັງໄດ້ລົງຢ້ຽມຢາມເບີ່ງສະພາບຕົວຈິງເຂດຈຸດສຸມໃນການພັດທະນາ ແລະ ບັນດາດ່ານສາກົນ, ດ່ານປະເພນີ, ດ່ານທ້ອງຖິ່ນ ຂອງ ເມືອງສິງ ແລະ ເມືອງລອງ.