(ສພຊ) – ຕອນເຊົ້າວັນສຸກທີ 18 ຕຸລາຜ່ານມາ ທີ່ຫໍປະຊຸມແຫ່ງຊາດ ໄດ້ມີການພົບປະສອງຝ່າຍລະຫວ່າງຄະນະຜູ້ແທນສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ, ຝ່າຍລາວນຳໂດຍສະຫາຍ ນາງ ທຸມມາລີ ວົງພະຈັນ ປະທານກຳມາທິການຍຸຕິທໍາ ແລະ ຝ່າຍຫວຽດນາມນຳໂດຍສະຫາຍ ເຢື່ອງ ແທັງ ບິ່ງ (Dương Thanh Bình) ຫົວໜ້າຄະນະຄຳຮ້ອງຂອງປະຊາຊົນ.

ສະຫາຍ ນາງ ທຸມມາລີ ວົງພະຈັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຜົນສຳເລັດການຮ່ວມມື 2 ຝ່າຍ ແລະ ແຈ້ງສະພາບການພົ້ນເດັ່ນຂອງ ສປປລາວ ແລະ ຂອງສະພາແຫ່ງຊາດລາວ ໂດຍຫຍໍ້; ຈາກນັ້ນ, ສະຫາຍຍັງໄດ້ຢັ້ງຢືນຕໍ່ການຕີລາຄາຂອງສອງປະທານສະພາແຫ່ງຊາດລາວ ແລະ ປະທານສະພາແຫ່ງຊາດຫວຽດນາມ ຕໍ່ການພົວພັນຮ່ວມມືລະຫວ່າງສອງປະເທດ ກໍຄືສອງອົງການນິຕິ ບັນຍັດ ນັບມື້ນັບໜັກແໜ້ນ, ເຂົ້າສູ່ລວງເລິກ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.

ໃນໂອກາດທີ່ໄດ້ພົບປະກັນຄັ້ງນີ້, ທັງສອງຝ່າຍໄດ້ມີຄໍາເຫັນປຶກສາຫາລື ແລະ ແລກປ່ຽນບົດຮຽນເຊິ່ງກັນແລະກັນ ກ່ຽວກັບວຽກງານແກ້ໄຂຄໍາຮ້ອງຂອງປະຊາຊົນ ເຊິ່ງຍັງຈະໄດ້ສືບຕໍ່ແລກປ່ຽນຂໍ້ມູນຂ່າວສານ ແລະ ບົດຮຽນກ່ຽວກັບວຽກງານດັ່ງກ່າວລະອຽດນໍາກັນໃນຕໍ່ໜ້າ.

ສະຫາຍ ເຢື່ອງ ແທັງ ບິ່ງ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ທັງແຈ້ງໃຫ້ຊາບການຈັດຕັ້ງປະຕິບັດວຽກງານຂອງຕົນ ແລະ ສະພາແຫ່ງຊາດຫວຽດນາມ ທັງຢັ້ງຢືນຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືລະຫວ່າງສອງອົງການນິຕິບັນຍັດ ຫວຽດນາມ-ລາວ ເວົ້າລວມ, ເວົ້າສະເພາະແມ່ນລະຫວ່າງຄະນະຄຳຮ້ອງຂອງປະຊາຊົນ ແລະ ກໍາມາທິການຍຸຕິທໍາ ໃຫ້ໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ເປັນຮູບປະທໍາ.

(ນາງ ອາລິນ ສຸພິມມະປະດິດ)