ຕອນເຊົ້າວັນທີ 21 ສິງຫາ 2023 ນີ້ ກຳມາທິການຍຸຕິທຳຂອງສະພາແຫ່ງຊາດ ໄດ້ລົງເຄື່ອນໄຫວເຜີຍແຜ່ກົດໝາຍວ່າດ້ວຍ ການແກ້ໄຂຄຳຮ້ອງທຸກສະບັບປັບປຸງປີ 2022 ຢູ່ແຂວງຫລວງນ້ຳທາ  ໂອກາດນີ້ ໄດ້ເຂົ້າພົບ ທ່ານ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງຫລວງນ້ຳທາ ເພື່ອເຂົ້າລາຍງານຈຸດປະສົງການລົງເຄື່ອນໄຫວເຮັດວຽກໃນຄັ້ງນີ້ ພ້ອມທັງ ໄດ້ຮັບຟັງບັນຫາທີ່ພົ້ນເດັ່ນ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດກົດໝາຍ, ວຽກງານໃນຂົງເຂດຍຸຕິທຳຂອງແຂວງໂດຍຫຍໍ້ ຕອນເຊົ້າວັນດຽວກັນໄດ້ເປີດກອງປະຊຸມຢູ່ທີ່ສະໂມສອນຂອງແຂວງ ໂດຍການເປັນປະທານຮ່ວມຂອງທ່ານ ຄຳແພງ ວິລະພັນ ຄະນະປະຈຳສະພາແຫ່ງຊາດ ປະທານກຳມາທິການຍຸຕິທຳ ສະພາແຫ່ງຊາດ ແລະ ທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າຮອງຫົວໜ້າພະແນກການອ້ອມຂ້າງແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 90 ກວ່າຄົນ.

               ກົດໝາຍວ່າດ້ວຍການແກ້ໄຂຄຳຮ້ອງທຸກ ໄດ້ສ້າງຂື້ນ ແລະ ປະກາດໃຊ້ໃນປີ 2005 ແລະ ໄດ້ຮັບການປັບປຸງມາແລ້ວ 03 ຄັ້ງຄື; ຄັ້ງທີ1 ປັບປຸງໃນປີ 2014, ປີ 2016 ແລະ ສະບັບລ່າສຸດແມ່ນປີ 2022; ວາລະດຽວກັນກອງປະຊຸມໄດ້ຮັບຟັງການເຜີຍແຜ່ກົດໝາຍວ່າດ້ວຍ ການແກ້ໄຂຄໍາຮ້ອງທຸກສະບັບປັງປຸງປີ 2022 ທັງໝົດ 8 ພາກ, 49 ມາດຕາ ທັງນີ້ກໍ່ເພື່ອຄວາມຮັບຮູ້, ຄວາມເປັນເອກະພາບ, ໃນການນໍາໃຊ້ກົດໝາຍ ໃຫ້ແກ່ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ເຂົ້າໃຈຕໍ່ເນື້ອໃນຂອງກົດໝາຍ ພ້ອມດຽວກັນ ບັນດາຜູ້ແທນກອງປະຊຸມໄດ້ປະກອບຄຳຄິດເຫັນຕໍ່ວຽກງານຂົງເຂດຍຸຕິທຳ ເວົ້າລວມເວົ້າສະເພາະ ວຽກງານຂົງເຂດຍຸຕິທຳຂອງແຂວງ ຢ່າງມີຈຸດສຸມ ເພື່ອເຮັດໃຫ້ວຽກງານຂົງເຂດຍຸຕິທຳ ໄດ້ຮັບການຈັດຕັ້ງປະຕິບັດຖຶກຕ້ອງສອດຄ່ອງຕາມລະບຽບກົດໝາຍຢ່າງເຂັ້ມງວດ ແລະ ສາມາດປົກປ້ອງສິດ, ຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າຢ່າງແທ້ຈິງ, ຕອນແລງຂອງວັນດຽວກັນຄະນະທິມງານກຳມາທິການຍຸຕິທຳ ສະພາແຫ່ງຊາດ ຍັງໄດ້ເປີດກອງປະຊຸມຮ່ວມ ສະພາປະຊາຊົນແຂວງ ເພື່ອປຶກສາຫາລືວຽກງານຂົງເຂດຍຸຕິທຳຂອງແຂວງ ເປັນຕົ້ນການຊູກຍູ້, ຕິດຕາມກວດກາ ການຈັດຕັ້ງປະຕິບັດກົດໝາຍ ໃຫ້ມີຄວາມຖຶກຕ້ອງ, ຍຸຕິທຳ ພ້ອມທັງ ໃຫ້ໄດ້ຮັບການຈັດຕັ້ງປະຕິບັດໃຫ້ມີຄຸນນະພາບດີຂຶ້ນເປັນກ້າວໆ.

ຂຊ

ຂ່າວ: ວັນນີ ແຝງບົວວັນ