ໃນຕອນບ່າຍວັນທີ 31 ທັນວາ 2024 ກຳມະບານຮາກຖານ ສະພາປະຊາຊົນແຂວງ ໄດ້ເປິດກອງປະຊຸມໃຫຍ່ຄັ້ງທີ VI ໃນຂັ້ນຂອງຕົນຂຶ້ນ, ໂດຍການເຂົ້າຮ່ວມ ຂອງສະຫາຍ ນາງ ສີສະຫວັດ ໂຄດທະວົງສາ ປະທານຄະນະບໍລິຫານງານສະຫະພັນກຳມະບານແຂວງ, ເປັນກຽດເຂົ້າຮ່ວມຕ້ອນຮັບໂດຍ ສະຫາຍ ຄຳຜັນ ຄູນສະຫວັນ ຄະນະປະຈຳພັກແຂວງ, ຮອງເລຂາຄະນະພັກຮາກຖານ ສະພາປະຊາຊົນແຂວງ ຮອງປະທານສະພາປະຊາຊົນແຂວງ, ມີບັນດາສະຫາຍແຂກຮັບເຊີນຈາກກຳມະບານຮາກຖານອ້ອມຂ້າງ, ຄະນະກຳມະບານຮາກຖານ,ຕະຫລອດຮອດພະນັກງານ,ສະມາຊິກກຳມະບານທີ່ເປັນຜູ້ແທນສົມບູນເຂົ້າຮ່ວມພາຍໃນຮາກຖານດັ່ງກ່າວເຂົ້າຮ່ວມ 61 ສະຫາຍ,ຍິງ 27 ສະຫາຍ.

 

ຕໍ່ຈາກນັ້ນ, ສະຫາຍ ນາງ ແກ້ວວຽງໄຊ ຈັນສະໄໝ ຄະນະປະທານກຳມະບານຮາກຖານ ສະພາປະຊາຊົນແຂວງ ກໍ່ໄດ້ຜ່ານບົດລາຍງານການເມືອງ ທັງສອງພາກ ຕີລາຄາການເຄື່ອນໄຫວວຽກງານກຳມະບານຮອບດ້ານໃນຊຸມປີຜ່ານມາ(2018-2023) ແລະ ທິດທາງແຜນການໃນຊຸມປີຕໍ່ໜ້າ 2024-2028 ;ກຳມະບານຮາກຖານຫ້ອງວ່າການແຂວງໄດ້ ເຄື່ອນໄຫວເຮັດໜ້າທີ່ຕາມສິດ ແລະ ພາລະບົດບາດ ຂອບເຂດຄວາມຮັບຜິດຊອບຕາມການມອບໝາຍຂອງຄະນະພັກຂັ້ນເທິງ ທັງສາຍຕັ້ງ ແລະ ສາຍຂວາງ ໄປຄຽງຄູ່ກັບການນຳເອົາຂໍ້ກຳນົດ,ກົດລະບຽບແລະແຈ້ງການຕ່າງໆ ມາຈັດຕັ້ງຜັນຂະຫຍາຍເຂົ້າສູ່ວຽກງານວິຊາສະເພາະຕົວຈິງ; ກອງປະຊຸມຍັງໄດ້ມອບໃບຊົມເຊີຍໃຫ້ແກ່ບຸກຄົນທີ່ມີຜົນງານດີເດັ່ນ ໃນໄລຍະທີ່ຜ່ານມາ ຈຳນວນ 10ສະຫາຍ, ຍິງ 03 ສະຫາຍ, ມອບໃບຍ້ອງຍໍ ຈຳນວນ 61 ສະຫາຍ,ຍິງ 29 ສະຫາຍ ພິເສດແມ່ນຍັງໄດ້ມອບທຸງໄຊແຂ່ງຂັນ5ເປັນເຈົ້າ ແລະ ໃບຮັບຮອງເປັນກຳມະບານຮາກຖານ 5 ເປັນເຈົ້າຢ່າງສົມກຽດອີກດ້ວຍ.

ຈາກນັ້ນກອງປະຊຸມຍັງໄດ້ປ່ອນບັດຄັດເລືອກເອົາຄະນະຮາກຖານຊຸດໃໝ່ ມີຈຳນວນ 05 ສະຫາຍ,ເລືອກເອົາ 03 ສະຫາຍ ແລະ ຜ່ານກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາສະຫາຍ ຈັນສະໝອນ ສອນພົງພັນ ເປັນປະທານກຳມະບານຮາກຖານສະພາປະຊາຊົນແຂວງຊຸດໃໝ່,ເລືອກເອົາສະຫາຍ ຂັນທອງ ຄົມທິລາດ ເປັນຮອງປະທານ ທັງເປັນປະທານກວດກາ ແລະ ເລືອກເອົາສະຫາຍ ນາງ ຍຸພາພອນ ເປັນກຳມະການ.

ພ້ອມນັ້ນຍັງໄດ້ຮັບຟັງການໂອ້ລົມໃຫ້ຄຳຄິດເຫັນຊີ້ນຳ ຈາກສະຫາຍປະທານ ໂດຍເນັ້ນໜັກໃນຫລາຍວຽກງານທີ່ຈະໄດ້ສືບຕໍ່ປະຕິບັດໃນຕໍ່ໜ້າ ພ້ອມດ້ວຍມີການເປີດແຜ່ນປ້າຍນາມມະຍົດ 5 ເປັນເຈົ້າຕື່ມອີກ.