ປະຕິບັດຕາມມະຕິຂອງຄະນະປະຈຳສະພາປະຊາຊົນແຂວງຫຼວງພະບາງ ເລກທີ 22 /ຄປຈ, ລົງວັນທີ 24 ກຸມພາ 2023; ສະນັ້ນ, ໃນຕອນເຊົ້າ ຂອງວັນທີ 27 ກຸມພາ 2023 ຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນໍ້າບາກ ຈຶ່ງໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປີ 2022 ແລະ ທິດທາງແຜນການ ປີ 2023 ຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນໍ້າບາກຂຶ້ນ ໂດຍການໃຫ້ກຽດເປັນປະທານຂອງ ທ່ານ ສົມພອນ ສີອຸດົມພັນ ກຳມະການພັກແຂວງ, ຮອງປະທານສະພາປະຊາຊົນແຂວງ ແລະ ເປັນປະທານຮ່ວມຂອງ ທ່ານ ຫຸມເພັງ ໂທທິທໍາຮອງເລຂາພັກເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນໍ້າບາກ, ເຂົ້າຮ່ວມມີ ສະມາຊິກສະພາປະຊາຊົນແຂວງ,
ຫົວໜ້າ ແລະ ຮອງຫົວໜ້າຫ້ອງການ–ອົງການທຽບເທົ່າຂັ້ນເມືອງ ລວມທັງໝົດ 34 ທ່ານ, ຍິງ 6 ທ່ານ; ກອງປະຊຸມໄດ້ຮັບຟັງການລາຍງານຈາກ ທ່ານ ບຸນທັນ ສີລິລັດກຳມະການພັກເມືອງ, ສະມາຊິກສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ປີ 2022 ແລະ ທິດທາງແຜນການ ປີ2023 ຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນໍ້າບາກ ເຊິ່ງສະແດງໃຫ້ເຫັນການຈັດຕັ້ງປະຕິບັດພາລະບົດບາດຂອງສະພາປະຊາຊົນແຂວງຢູ່ຂັ້ນເມືອງ, ການພົບປະ ແລະ ໃຫ້ຄໍາປຶກສາແກ່ຜູ້ມີສິດເລືອກຕັ້ງ ແລະ ການສ້າງຄວາມເຂັ້ມແຂງໃຫ້ແກ່ພະນັກງານຊ່ວຍວຽກ; ໃນຕອນທ້າຍກອງປະຊຸມ ທ່ານ ສົມພອນ ສີອຸດົມພັນ ຍັງໄດ້ມີຄຳເຫັນຍ້ອງຍໍຊົມເຊີຍຕໍ່ກັບຜົນງານທີ່ຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນໍ້າບາກ ຍາດມາໄດ້ໃນໄລຍະ 1 ປີນີ້, ຄຽງຄູກັນນັ້ນ ກໍໃຫ້ຍົກສູງຄວາມຮັບຜິດຊອບທາງດ້ານການເມືອງ ເພື່ອຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ທີ່ກຳນົດໄວ້ໃນກົດໝາຍ ໃຫ້ມີປະສິດທິພາບສູງ, ໂດຍສະເພາະ ການໂຄສະນາເຜີຍແຜ່ໃຫ້ແກ່ຜູ້ມີສິດເລືອກຕັ້ງ ໃຫ້ມີຄວາມເຂົ້າໃຈຢ່າງເລິກເຊິ່ງ ແລະກວ້າງຂວາງ.
ໃນຕອນແລງຂອງວັນດຽວກັນ, ທ່ານ ສົມພອນ ສີອຸດົມພັນພ້ອມດ້ວຍສະມາຊິກສະພາປະຊາຊົນແຂວງ 2 ທ່ານ, ກໍໄດ້ນໍາເອົາວັດຖຸປັດໄຈ (ຜ້າຫົ່ມ) ມອບໃຫ້ໂຮງຮຽນສາມັນກິນນອນຊົນເຜົ່າເມືອງນໍ້າບາກ ຈໍານວນ 165 ຜືນ, ລວມມູນຄ່າ 10.850.000 ກີບຕາງໜ້າຮັບໂດຍ ທ່ານ ສົມພອນ ສິດທິພອນ ອຳນວຍການໂຮງຮຽນສາມັນກິນນອນຊົນເຜົ່າເມືອງນໍ້າບາກ ເພື່ອແຈກຢາຍໃຫ້ແກ່ນັກຮຽນ ຜູ້ທີ່ທຸກຍາກ ແລະ ຍັງຂາດເຂີນເຄື່ອງອຸປະໂພກດັ່ງກ່າວ.
ພາບ: ນາງ ຄໍາຫຼ້າ ສະວະບຸດ: ຂ່າວ: ສຸດາກອນ ໂພສະຫວັດ