ເພື່ອໂຄສະນາເຜີຍແຜ່ ການເຄື່ອນໄຫວຂອງອົງການນິຕິບັນຍັດ ແລະ ເກັບກຳຂໍ້ມູນ ໃນການປັບປຸງກົດໝາຍ ທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະເປີດຂຶ້ນໃນເວລາອັນໃກ້ນີ້. ດັ່ງນັ້ນ, ໃນລະຫວ່າງ ວັນທີ 4-5 ພຶດສະພາ 2022, ກົມສື່ມວນຊົນ ສະພາແຫ່ງຊາດ ນໍາໂດຍ ທ່ານ ຂັນທະລີ ວົງພະຈັນ ຮອງຫົວໜ້າກົມຊື່ມວນຊົນ ພ້ອມດ້ວຍຄະນະ ໄດ້ລົງເຄື່ອນໄຫວສໍາພາດ ການປະເມີນການຈັດຕັ້ງປະຕິບັດກົດໝາຍ 4 ສະບັບ ຄື: ກົດໝາຍ ວ່າດ້ວຍແຮ່ທາດ, ກົດໝາຍ ວ່າດ້ວຍການສົ່ງເສີມການລົງທຶນ, ກົດໝາຍ ວ່າດ້ວຍທີ່ດິນ ແລະ ກົດໝາຍ ວ່າດ້ວຍຊັບສິນຂອງລັດ ຂອງກຸ່ມເປົ້າໝາຍຕາມແຜນສະພາແຫ່ງຊາດ ຢູ່ແຂວງຫຼວງພະບາງ.

ໂອກາດດັ່ງກ່າວ ທາງກົມສື່ມວນຊົນໄດ້ເຂົ້າສຳພາດ ທ່ານ ສົມພອນ ສີອຸດົມພັນ ກໍາມະການພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ຮອງປະທານ ສະພາປະຊາຊົນແຂວງ, ປະທານ ຄະນະກຳມະການເສດຖະກິດ, ແຜນການ ແລະ ການເງິນ ແລະ ທ່ານໄດ້ໃຫ້ສໍາພາດວ່າ: ໃນການຈັດຕັ້ງປະຕິບັດກົດໝາຍ ທີ່ສະພາແຫ່ງຊາດ ໄດ້ຮັບຮອງ ຂອງອົງການທີ່ກ່ຽວຂ້ອງ ໄດ້ນໍາໄປໂຄສະນາເຜີຍແຜ່ ໄດ້ຢ່າງກວ້າງຂວາງ ແລະ ດີພໍສົມຄວນ. ເວົ້າລວມ, ເວົ້າສະເພາະສະພາປະຊາຊົນແຂວງ ກໍຍັງໄດ້ເອົາໃຈໃສ່ ຊຸກຍູ້ພາກສ່ວນກ່ຽວຂ້ອງ ໃນການຜັນຂະຫຍາຍກົດໝາຍ ວ່າດ້ວຍທີ່ດິນ ມາເປັນນິຕິກຳລຸ່ມກົດໝາຍ ໃນຮູບແບບຂໍ້ຕົກລົງ ຂອງເຈົ້າແຂວງ. ຈາກນັ້ນ, ຄະນະທີມງານກໍໄດ້ໄປສຳພາດ ອຳນວຍການບໍລິສັດແມ່ຂອງຈໍາກັດ ຕາງໜ້າໃຫ້ກຸ່ມບໍລິສັດທີເຄື່ອນໄຫວວຽກງານລົງທຶນ ຢູ່ແຂວງຫຼວງພະບາງ ໃນການຈັດຕັ້ງປະຕິບັດກົດໝາຍ ວ່າດ້ວຍແຮ່ທາດ, ໃນການຂຸດຄົ້ນແຮ່ທາດ ແລະ ບັນດາຂັ້ນຕອນ, ຂໍ້ຫຍຸ້ງຍາກໃນການສຳປະທານທີ່ດິນ ຂອງລັດ.

ພ້ອມດຽວກັນນັ້ນ ທາງຄະນະທີມງານສະພາແຫ່ງຊາດ ໄດ້ເດີນທາງໄປເມືອງປາກອູ ເພື່ອສຳພາດຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ແລະ ໄດ້ລົງກວດກາພື້ນທີ່ຕົວຈິງ ເພື່ອເກັບກຳຂໍ້ມູນ ໃນການກຳນົດຄ່າທົດແທນເສຍຫາຍໃຫ້ແກ່ປະຊາຊົນ ຕາມຄວາມເໝາະສົມ ແລະ ຍັງໄດ້ສຳພາດນາຍບ້ານສົມສະໜຸກ ກ່ຽວກັບການເກັບລາຍຮັບພາສີທີ່ດິນ ແລະ ການອະທິບາຍຊີ້ແຈງຕໍ່ປະຊາຊົນໃຫ້ມີຄວາມເຂົ້າໃຈ ຕໍ່່ວຽກງານການລົງທຶນ ຂອງລັດ ເພື່ອຫຼີກລ້ຽງການເກີດປະກົດການຫຍໍ້ທໍ້ໃນສົງຄົມ ແລະ ບັນດາທ່າແຮງຕ່າງໆ ທີ່ສ້າງລາຍຮັບທາງດ້ານເສດຖະກິດໃຫ້ບ້ານ.

                   ຂ່າວ ແລະ ພາບ: ສຸດາກອນ ໂພສະຫວັດ