ເມື່ອບໍ່ດົນມານີ້, ການນຳຂອງແຂວງຈຳປາສັກ ແລະ ການນຳຂອງ ເມືອງໂພນທອງ ໄດ້ເຄື່ອນໄຫວຢ້ຽມຢາມ ນາຍ ແລະ ພົນທະຫານ ຢູ່ 5 ຈຸດພາຍໃນເມືອງໂພນທອງ ແຂວງຈຳປາສັກ ຄື: ກອງຮ້ອຍ 522, ກອງພັນ 22, ກອງພັນ 10, ກອງບັນຊາການທະຫານເມືອງ ແລະ ກອງປັກຫຼັກໝາຍຊາຍແດນລາວ-ໄທ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ, ການລົງເຄື່ອນໄຫວໃນຄັ້ງນີ້ນຳໂດຍ ທ່ານ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ, ມີທ່ານ ຈັນທະວີສຸກ ວັນສີລິ ກຳມະການພັກແຂວງ ຫົວໜ້າພະແນກໂຍທາທິການ ແລະ ຂົນສົ່ງ (ຍທຂ) ແຂວງ ໃຫ້ກຽດຕ້ອນຮັບໂດຍທ່ານ ສຸພາບ ທຳມະຮັກສາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໂພນທອງ ມີຄະນະນຳຂອງແຂວງ-ເມືອງ, ອົງການຈັດຕັ້ງມະຫາຊົນ ຕະຫຼອດຮອດນາຍ ແລະ ພົນທະຫານເຂົ້າຮ່ວມ.

ໃນການລົງເຄື່ອນໄຫວຢ້ຽມຢາມຄັ້ງນີ້ກໍເພື່ອອວຍພອນນາຍ ແລະ ພົນທະຫານ ເນື່ອງໃນໂອກາດວັນສ້າງຕັ້ງ ກອງທັບປະຊາຊົນລາວ ຄົບຮອບ 73 ແລະ ມອບເຄື່ອງຊ່ວຍເຫຼືອໃຫ້ແຕ່ລະກອງ ທີ່ມີທີ່ຕັ້ງຢູ່ພາຍໃນເມືອງໂພນທອງ ຊຶ່ງເຄື່ອງທີ່ນຳໄປມອບໃນຄັ້ງນີ້ມີເຄື່ອງບໍລິໂພກ, ອຸປະໂພກ ເປັນຕົ້ນ: ໝີ່ໄວໆ, ປາກະປ໋ອງ, ນ້ຳດື່ມ, ເຂົ້າສານ, ດອກໄຟໂຊລະເຊວ, ໂປມນ້ຳ, ຄອມພີວເຕີ, ເຄື່ອງກິລາ, ຢາປົວພະຍາດ, ເຈວລ້າງມື ແລະ ອື່ນໆ ລວມມູນຄ່າທັງໝົດ 50 ລ້ານກວ່າກີບ ໂດຍການປະກອບສ່ວນຈາກຫ້ອງວ່າການແຂວງ, ພະແນກ ຍທຂ ແຂວງ, ວິທະຍາໄລສຸຂະພາບແຂວງ, ວິທະຍາໄລເຕັກນິກວິຊາຊີບແຂວງ, ວິທະຍາໄລກະສິກຳ ແລະ ປ່າໄມ້ແຂວງ, ທະນາຄານລາວ-ຫວຽດ ທັງນີ້ກໍເພື່ອເປັນຂວັນກຳລັງໃຈໃຫ້ແກ່ອ້າຍນ້ອງນາຍ ແລະ ພົນທະຫານ ທີ່ປະຈຳການຢູ່ຊາຍແດນ, ເພື່ອປົກປັກຮັກສາເຂດນ້ຳແດນດິນ ແລະ ຄວາມສະຫງົບສຸກຂອງປະຊາຊົນບັນດາເຜົ່າ.

ຂ່າວ-ພາບ: ມະນີທິບ