ໃນວັນທີ 3 ຕຸລາ 2024 ນີ້ ທ່ານ ພົທ ສຸວອນ ເລືອງບຸນມີ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ເຊິ່ງປະກອບມີ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ທັງເປັນຮອງປະທານສະພາປະຊາຊົນແຂວງຈໍາປາສັກ, ມີບັນດາທ່ານຫົວໜ້າ-ຮອງຫົວໜ້າກົມຂອງສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ຕາງໜ້າຈາກຫ້ອງວ່າການສູນກາງພັກ, ຕາງໜ້າກະຊວງພາຍໃນ, ຕາງໜ້າກະຊວງປ້ອງກັນປະທດ, ຕາງໜ້າກະຊວງປ້ອງກັນຄວາມສະຫງົບ ແລະ ວິຊາການຈາກສະພາແຫ່ງຊາດ ແລະ ສະພາປະຊາຊົນແຂວງຈໍານວນໜຶ່ງ ໄດ້ເຄື່ອນໄຫວພົບປະຢ້ຽມຢາມ ແລະ ເຮັດວຽກກັບອົງການການປົກຄອງແຂວງຈໍາປາສັກ ໂດຍການຕ້ອນຮັບຂອງ ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ ຕ່າງໜ້າໃຫ້ຄະນະນໍາຂອງອົງການປົກຄອງແຂວງ, ພ້ອມດ້ວຍບັນດາທ່ານຕ່າງໜ້າໃຫ້ພະແນກການ-ກົມກອງອ້ອມຂ້າງແຂວງຈໍາປາສັກ ເຂົ້າຮ່ວມຢ່າງພ້ອມພຽງ.

ການເຄື່ອນໄຫວໄດ້ເປີດກອງປະຊຸມເຮັດວຽກຮ່ວມກັບອົງການປົກຄອງແຂວງຈໍາປາສັກ, ວາລະດໍາເນີນກອງປະຊຸມ, ພາຍຫຼັງທີ່ ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຕ່າງໜ້າອົງການປົກຄອງແຂວງຈໍາປາສັກ ໄດ້ມີຄໍາເຫັນກ່າວຕ້ອນຮັບຄະນະແລ້ວ. ທ່ານ ພົທ ສຸວອນ ເລືອງບຸນມີ ກໍາມະການສູນກາງພັກ ຮອງປະທານສະພາແຫ່ງຊາດ ໄດ້ມີຄໍາເຫັນ ສະເໜີຈຸດປະສົມຂອງການລົງເຄື່ອນໄຫວຄັ້ງນີ້ວ່າ: ເພື່ອຕິດຕາມກວດກາຄວາມຄືບໜ້າຂອງການຈັດຕັ້ງປະຕິບັດ ມະຕິກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VII ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດເຮັດທົດລອງ ວຽກງານ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວ ໜ່ວຍພັດທະນາ ສະບັບເລກທີ 02/ສພຊ, ລົງວັນທີ 28 ມັງກອນ 2016, ເພື່ອຊອກໃຫ້ເຫັນຜົນງານ, ຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ຜ່ານການຈັດຕັ້ງປະຕິບັດຕົວຈິງຂອງ ສູນກາງ ແລະ ທ້ອງຖິ່ນ ໃນໄລຍະຜ່ານມາ; ເກັບກຳຂໍ້ມູນການຈັດຕັ້ງປະຕິບັດການແບ່ງຂັ້ນຄຸ້ມຄອງລະຫວ່າງສູນກາງກັບແຂວງ, ແຂວງກັບເມືອງ ແລະ ເມືອງກັບບ້ານ ເພື່ອກຽມລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ກ່ອນເປີດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ເພື່ອພິຈາລະນາ ຮັບຮອງເອົາການສືບຕໍ່ການຈັດຕັ້ງປະຕິບັດວຽກງານ 3 ສ້າງໃນຕໍ່ໜ້າ.

ຈາກນັ້ນ, ທ່ານ ສະນັ່ນ ສີພາພົມມະຈັນ ຕ່າງໜ້າໃຫ້ຄະນະພັກ-ອົງການປົກຄອງແຂວງຈໍາປາສັກ ໄດ້ລາຍງານໃນທີ່ປະຊຸມວ່າ: ໄລຍະຜ່ານມາ ຄະນະພັກ-ອົງການປົກຄອງແຂວງ ໄດ້ເພີ່ມທະວີຄວາມເອົາໃຈໃສ່ໃນການການນໍາພາ-ຊີ້ນຳວຽກງານ 3 ສ້າງ ໂດຍຖືເອົາວຽກງານດັ່ງກ່າວເປັນວຽກຈຸດສຸມ ແລະ ຈັດຕັ້ງປະຕິບັດຢ່າງເປັນປົກກະຕິຕໍ່ເນື່ອງ, ທັງໄດ້ສຸມໃສ່ວຽກງານການປະເມີນໃນໄລຍະປີ 2021 ຫາ 2024 ຕາມແບບຟອມການປະເມີນຂອງກະຊວງພາຍໃນ ສະບັບເລກທີ 05/ພນ, ເຊິ່ງໃນການຈັດຕັ້ງປະຕິບັດຕົວຈິງນັ້ນ ຄະນະຮັບຜິດຊອບການປະເມີນຂັ້ນແຂວງ ແມ່ນໄດ້ເລັ່ງໃສ່ປະເມີນແຂວງຕາມ 7 ດ້ານ 66 ຕົວຊີ້ວັດ ໃນການສ້າງແຂວງເປັນຫົວໜ່ວຍຍຸດທະສາດ ສາມາດບັນລຸ 63 ຕົວຊີ້ວັດ ເທົ່າກັບ 95,45%;

ຄະນະຮັບຜິດຊອບການປະເມີນຂັ້ນເມືອງ ໄດ້ປະເມີນນະຄອນ, ເມືອງ ຕາມ 5 ດ້ານ 47 ຕົວຊີ້ວັດ ໃນການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ເຊິ່ງແຂວງຈໍາປາສັກ ປະກອບມີ 09 ເມືອງ 1 ນະຄອນ ໃນນັ້ນ, ມີນະຄອນປາກເຊ ແລະ ເມືອງໂພນທອງ ສາມາດຈັດຕັ້ງປະຕິບັດໄດ້ບຸນລຸ 100%(ຮ້ອຍສ່ວນຮ້ອຍ) ສ່ວນທີ່ເຫຼືອອີກ 8 ເມືອງ ຄື: ເມືອງບາຈຽງຈະເລີນສຸກ, ເມືອງຊະນະສົມບູນ, ເມືອງຈໍາປາສັກ, ເມືອງປະທຸມພອນ, ເມືອງປາກຊ່ອງ, ເມືອງສຸຂຸມາ, ເມືອງມຸນລະປາໂມກ ແລະເມືອງໂຂງ ຍັງສືບຕໍ່ຈັດຕັ້ງປະຕິບັດ (ຖືວ່າບໍ່ທັນບັນລຸ); ການສ້າງບ້ານພັດທະນາໄດ້ ຂັ້ນບ້ານຕາມ 4 ດ້ານ, 30 ຕົວຊີ້ວັດ ໄດ້ 515 ບ້ານ ຍັງ 127 ບ້ານ(ເພີ່ມຂື້ນຈາກປີ 2020 ໄດ້ 47 ບ້ານ)

ນອກຈາກນີ້ຍັງມີຜົນສໍາເລັດ ກ່ຽວກັບວຽກງານ 3 ສ້າງ ການແບ່ງຂັ້ນຄຸ້ມຄອງ ແຂວງຈໍາປາສັກ ແມ່ນໄດ້ປະຕິບັດຕາມ ກົດໝາຍ ວ່າດ້ວຍ: ການປົກຄອງທ້ອງຖິ່ນ ເຊິ່ງມີຫຼາຍຂະແໜງການໄດ້ເອົາໃຈໃສ່ ໃນການແບ່ງຂັ້ນຄຸ້ມຄອງ ເຫັນວ່າມີຫຼາຍໜ້າວຽກທີ່ພົ້ນເດັ່ນຢ່າງຕັ້ງໜ້າ ແລະ ຕອບສະໜອງ ເປັນຕົ້ນ: ໃນຂົງເຂດຊັບພະຍາກອນທຳມະຊາດ-ສິ່ງແວດລ້ອມ, ຂົງເຂດອຸດສາກະກຳ ແລະ ການຄ້າ, ຂົງເຂດສາທາລະນະສຸກ, ຂົງເຂດຖະແຫຼງຂ່າວວັດທະນະທຳ ແລະ ທ່ອງທ່ຽວ, ຂົງເຂດແຜນການ ແລະ ການລົງທຶນ, ຂົງເຂດການເງິນ, ຂົງເຂດພາຍໃນ ແລະ ອື່ນໆ. ເຊິ່ງບັນດາຂະແໜງການດັ່ງກ່າວ ໄດ້ເອົາໃຈໃສ່ແບ່ງບັນດາກິດຈະກຳບັນດາໜ້າວຽກ ໃຫ້ແກ່ເມືອງເປັນຜູ້ຄຸ້ມຄອງ ແລະ ເກັບລາຍຮັບເຂົ້າງົບປະມານ ເຫັນວ່າໄດ້ຮັບຜົນເປັນຢ່າງດີ.

ຈາກນັ້ນ, ກອງປະຊຸມໄດ້ມີການປະກອບຄໍາຄິດເຫັນແລກປ່ຽນບົດຮຽນ, ເຈາະຈີ້ມໃສ່ບ່າງບັນຫາໃນການຈັດຕັ້ງປະຕິບັດວຽກງານ ໂດຍສະເພາະຕໍ່ທິດທາງແຜນການໃນຕໍ່ໜ້າຂອງແຂວງຈໍາປາສັກ ຍັງໄດ້ຍົກໃຫ້ເຫັນທິດທາງແຜນການທີ່ແຂວງຈະຫັນພະນັກງານລົງສູ່ຮາກຖານ ເພື່ອສ້າງເປັນພະນັກງານນນຳພາ ຫຼື ກາຍເປັນນັກພັດທະນາກອນຢູ່ຮາກຖານໃຫ້ໄດ້ 70% ຂື້ນໄປ; ສືບຕໍ່ ປັບປຸງກຳນົດຕຳແໜ່ງງານໃຫ້ມີຄວາມເໝາະສົມ ເພື່ອໃຫ້ກົງຈັກກະທັດຮັດ ແລະ ມີຄຸນນະພາບ; ຊຸກຍູ້ ການສຳຫຼວດວັດແທກຂື້ນທະບຽນ ອອກໃບຕາດິນ ໃຫ້ບັນລຸ 100% ຕາມສະພາປະຊາຊົນຮັບຮອງ; ສືບຕໍ່ ຊກຍູ້ ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ຈໍານວນ 02 ເມືອງ ຄື: ເມືອງປາກຊ່ອງ ແລະ ເມືອງ ມຸນລະປາໂມກ; ສືບຕໍ່ ຊຸກຍູ້ ເມືອງ ສຸຂຸມາ ແລະ ເມືອງ ຊະນະສົມບູນ ຈັດຕັ້ງພິທິປະກາດຮັບຮອງເປັນຫົວໜ່ວຍເຂັ້ມແຂງຮອບດ້ານ ແລະ ສືບຕໍ່ ຊຸກຍຸ້ການສ້າງບ້ານເປັນຫົວໜ່ວຍພັດທະນາ ຈໍານວນ 24 ແຕ່ນີ້ ຮອດປີ 2030.

ພາຍຫຼັງເຮັດວຽກຮ່ວມກັບອົງການປົກຄອງແຂວງແລ້ວ, ຄະນະຂອງທ່ານຮອງປະທານສະພາແຫ່ງຊາດ ໄດ້ສືບຕໍ່ເຄື່ອນໄຫວຢ້ຽມຢາມລົງພື່ນທີ່ຈຸດໂຮງໝໍແຂວງຈໍາປາສັກ, ຈຸດຜະລິດກະສິກຳ, ຜະລິດຕະພັນ ແລະ ຢ້ຽມຢາມເຮັດວຽກກັບອົງການປົກຄອງພ້ອມດ້ວຍປະຊາຊົນບ້ານໂນນສະຫວ່າງ, ນະຄອນປາກເຊ ອີກດ້ວຍ.