ໃນວັນທີ 13 ມິຖຸນາ 2023 ຢູ່ທີຫ້ອງປະຊຸມພະແນກແຜນການ ແລະ ການລົງທຶນແຂວງ ໄດ້ເປີດກອງປະຊຸມ ສຳມະນາຍົກສູງພາລະບົດບາດ ຂອງສະພາແຫ່ງຊາດ ປະຈຳເຂດເລືອກຕັ້ງທີ 9 ແລະ ສະພາປະຊາຊົນແຂວງຊຽງຂວາງຂຶ້ນ ພາຍໃຕ້ການເປັນປະທານຂອງທ່ານ ບຸນໂຮມ ເທດທານີ ປະທານສະພາປະຊາຊົນແຂວງ; ເປັນກຽດເຂົ້າຮ່ວມຂອງທ່ານ ບົວເງິນ ຫຸມໄຊຍະພົມ ຮອງເຈົ້າແຂວງໆຊຽງຂວາງ, ມີບັນດາທ່ານຄະນະປະຈຳພັກແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9, ສະມາຊິກສະພາປະຊາຊົນແຂວງ, ບັນດາທ່ານເຈົ້າເມືອງ, ຫົວໜ້າ-ຮອງຫົວໜ້າພະແນກການ, ກົມກອງ, ລັດວິສາຫະກິດ, ອົງການຈັດຕັ້ງມະຫາຊົນ, ພະນັກງານຂອງສະພາປະຊາຊົນແຂວງ ແລະ ພະນັກງານຊ່ວຍວຽກ ເຂົ້າຮ່ວມຢ່າງພ້ອມພຽງ; ຊຶ່ງກອງປະຊຸມໄດ້ຮັບການສະໜັບສະໜູນໂດຍ: ໂຄງການສ້າງຄວາມເຂັ້ມແຂງໃຫ້ແກ່ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ເອກະສານທີ່ນຳມາເຜີຍແຜ່ໃນຄັ້ງນີ້ລວມມີ: ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ການຜັນຂະຫຍາຍ ມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການຈັດຕັ້ງ ແລະ ການເຄື່ອນ ໄຫວຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການເສດຖະ ກິດ, ແຜນການ ແລະ ການເງິນ, ມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະ ການຍຸຕິທຳ ແລະ ປກຊ-ປກສ, ມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະ ການວັດທະນາທຳ, ສັງຄົມ ແລະ ບັນດາເຜົ່າ ມີບັນດາມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະປະຈຳສະພາປະຊາຊົນແຂວງ, ມະຕິວ່າດ້ວຍຈັດຕັ້ງ ແລະ ການເຄື່ອນໄຫວຂອງຄະນະເລຂາທິການສະພາປະຊາຊົນແຂວງ ແລະ ມະຕິວ່າດ້ວຍການຮັບ ແລະ ການພິຈາລະນາຄຳຮ້ອງຂໍຄວາມເປັນທຳ; ໃນທີ່ປະຊຸມ ບັນດາທ່ານທີ່ເຂົ້າຮ່ວມຍັງໄດ້ມີຄຳຄິດເຫັນແລກປ່ຽນບົດຮຽນ ເຊິ່ງກັນ ແລະ ກັນ, ຕໍ່ກັບສິ່ງທີ່ຍັງບໍ່ທັນເຂົ້າໃຈ, ບັນຫາຄວາມຫຍຸ້ງຍາກທີ່ພົບໃນໄລຍະຜ່ານມາ ຢ່າງເລິກເຊິ່ງ ແລະ ກົງໄປກົງມາ ເພື່ອເຮັດໃຫ້ບັນດາທ່ານທີ່ເຂົ້າຮ່ວມ ໄດ້ເຊື່ອມຊືມ ແລະ ກຳໄດ້ກ່ຽວກັບ ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

ໃນຕອນທ້າຍ ປະທານກອງປະຊຸມຍັງໄດ້ສະຫຼຸບສັງລວມ ບັນດາຄຳເຫັນຂອງຜູ້ແທນກອງປະຊຸມ ແລະ ໂອລົມເພື່ອເປັນທິດທາງແກ້ໄຂຕໍ່ກັບວຽກງານທີ່ຍັງບໍ່ທັນສອດຄ່ອງ, ໃຫ້ກຳໄດ້ພາລະບົດບາດ, ສິດ ແລະ ໜ້າທີ່ຂອງຕົນ ໃນການຈັດຕັ້ງປະຕິບັດ ເຄື່ອນໄຫວວຽກງານ ໃຫ້ຖືກຕ້ອງສອດຄ່ອງກັບລະບຽບກົດໝາຍທີ່ໄດ້ກຳນົດໄວ້ ແລະ ມີຄຳເຫັນກ່າວປິດກອງປະຊຸມ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ