ໃນຕອນເຊົ້າວັນພຸດ ວັນທີ 15 ມັງກອນ 2025 ຄະນະປະສານງານປົກປ້ອງລະບຽບກົດໝາຍຂັ້ນແຂວງ ໄດ້ຈັດກອງປະຊຸມຂຶ້ນ ທີ່ຫ້ອງປະຊຸມຊັ້ນ 02 ຂອງສະພາປະຊາຊົນແຂວງ ໂດຍການເປັນປະທານຂອງສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານສະພາປະຊາຊົນແຂວງ ທັງເປັນປະທານຄະນະປະສານງານປົກປ້ອງລະບຽບກົດໝາຍຂັ້ນແຂວງ ເຂົ້າຮ່ວມມີບັນດາສະຫາຍທີ່ເປັນຄະນະກຳມະການ ແລະ ກອງເລຂາຄະນະປະສານງານປົກປ້ອງລະບຽບກົດໝາຍຂັ້ນແຂວງ ເຂົ້າຮ່ວມ.
ຄະນະປະສານງານປົກປ້ອງກົດໝາຍຂັ້ນແຂວງ ເປັນອົງການຈັດຕັ້ງສະເພາະກິດໜຶ່ງ ທີ່ເຄື່ອນໄຫວວຽກງານຢູ່ພາຍໃຕ້ການນຳພາ ຊີ້ນໍາ; ໂດຍກົງຂອງສະຫາຍຮອງເລຂາພັກແຂວງແນໃສ່ເຮັດໃຫ້ການປະສານສົມທົບ ລະຫວ່າງ ບັນດາພະແນກການ ແລະ ອົງການປົກປ້ອງລະບຽບກົດໝາຍ ຢູ່ຂັ້ນແຂວງ ໃນການແກ້ໄຂຄໍາຮ້ອງທຸກຂອງປະຊາຊົນໃຫ້ມີຄວາມຖືກຕ້ອງ, ສອດຄ່ອງຕາມລະບຽບກົດໝາຍ ສັກສິດ ແລະ ຍຸຕິທໍາ, ຄົ້ນຄວ້າປຶກສາຫາລືແກ້ໄຂຄໍາຮ້ອງທຸກຂອງປະຊາຊົນ ຜູ້ທີ່ເຫັນວ່າຕົນເອງບໍ່ໄດ້ຮັບຄວາມເປັນທໍາ ຫຼື ຖືກລ່ວງລະເມີດສິດທິຂອງຕົນ ຕາມລະບຽບກົດໝາຍ, ວາງວິທີການ, ມາດຕະການທີ່ຖືກຕ້ອງສອດຄ່ອງ ຕາມລັດຖະ ທໍາມະນູນ ແລະ ກົດໝາຍ ເພື່ອສະກັດກັ້ນ ແລະ ຕ້ານທຸກການກະທໍາທີ່ລະເມີດກົດໝາຍ. ຊຶ່ງກອງປະຊຸມໄດ້ຮັບຟັງການລາຍງານ ການຈັດຕັ້ງປະຕິບັດໃນໄລຍະ 01 ປີຜ່ານມາ ຂອງຄະນະປະສານງານປົກປ້ອງລະບຽບກົດໝາຍຂັ້ນແຂວງໄດ້ປະຕິບັດຕາມພາລະບົດບາດ ສິດ ແລະ ໜ້າທີ່ ໂດຍເນັ້ນໃສ່ແກ້ໄຂບັນຫາທີ່ມີຄວາມຫຍຸ້ງຍາກ, ເຄັ່ງຮ້ອນ ແລະ ບັນຫາທີ່ສັງຄົມໃຫ້ຄວາມສົນໃຈ ໂດຍຖືເອົາກອງປະຊຸມຄະນະປະສານງານປົກປ້ອງລະບຽບກົດໝາຍຂັ້ນແຂວງ ເປັນບ່ອນປຶກສາຫາລື ແລະ ຕິດຕາມກວດກາບັນຫາສໍາຄັນຕ່າງໆພາຍໃນແຂວງ ເຮັດໃຫ້ບັນຫາທີ່ເກີດຂຶ້ນໄດ້ຮັບການແກ້ໄຂທ່ວງທັນກັບສະພາບການ ເເລະ ກໍານົດເວລາ; ຜ່ານມາໄດ້ຈັດກອງປະຊຸມໄດ້ 04 ຄັ້ງ ມີຜູ້ເຂົ້າຮ່ວມ ທັງຫມົດ 88 ເທື່ອຄົນ, ຍິງ 05 ເທື່ອຄົນ ໄດ້ນໍາເອົາຄໍາຮ້ອງທຸກ, ຄໍາສະເໜີ ແລະ ຄໍາຮ້ອງຂໍຄວາມເປັນທໍາ ຈາກພາກສ່ວນຕ່າງໆ ນໍາເຂົ້າມາຄົ້ນຄວ້າ ແລະ ປຶກສາຫາລືໃນກອງປະຊຸມຄະນະປະສານງານປົກປ້ອງລະບຽບກົດໝາຍຂັ້ນແຂວງ ມີທັງຫມົດ 15 ເລື່ອງ, ມອບໃຫ້ພາກສ່ວນກ່ຽວຂ້ອງຈັດຕັ້ງປະຕິບັດສໍາເລັດໄດ້ 03 ເລື່ອງ ແລະ ຍັງສືບຕໍ່ມອບໃຫ້ພາກສ່ວນກ່ຽວຂ້ອງຈັດຕັ້ງ ປະຕິບັດມີ 12 ເລື່ອງ.
ພາຍຫຼັງທີ່ໄດ້ຮັບຟັງການລາຍງານແລ້ວ ປະທານກອງປະຊຸມ ກໍໄດ້ເຈາະຈິ້ມ ແລະ ໃຫ້ທິດຊີ້ນຳ ຊຶ່ງທ່ານໄດ້ເນັ້ນໃຫ້ທຸກທ່ານ ຈົ່ງພ້ອມກັນເປັນເຈົ້າການ ໃນການຈັດຕັ້ງປະຕິບັດສິດ,ພາລະບົກບາດຂອງຕົນໃຫ້ໄດ້ຜົນສຳເລັດ ໂດຍຕິດພັນກັບການປະສານສົບທົບລະຫວ່າງພະແນກການ, ອົງການລັດທຽບເທົ່າພະແນກຂັ້ນແຂວງ ແລະ ອົງການປົກປ້ອງກົດໝາຍຢູ່ຂັ້ນແຂວງ ໃນການແກ້ໄຂ້ຄຳຮ້ອງຂໍຄວາມເປັນທຳຂອງປະຊາຊົນ ໃຫ້ມີຄວາມຖືກຕ້ອງ ມີຄວາມສັກສິດ, ສອດຄ່ອງ ແລະ ຍຸຕິທຳຕາມລະບຽບກົດໝາຍ ເພື່ອຮັບປະກັນຄວາມຍຸຕິທຳໃນສັງຄົມອີກດ້ວຍ.