ຕອນເຊົ້າ ວັນທີ 29 ກໍລະກົດ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ຂອງຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ (ຄວສຜ) ໂດຍການເປັນປະທານ ທ່ານ ສົມຈິດ ລາວຈຸງ ປະທານ ຄວສຜ; ເປັນກຽດເຂົ້າຮ່ວມໂດຍທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ (ກຳມະການສັງກັດ ຄວສຜ); ມີບັນດາທ່ານປະທານ, ຮອງປະທານຄະນະກໍາການ ສພຂ, ຮອງເລຂາທິການ ສພຂ, ຫົວໜ້າ, ຮອງຫົວໜ້າຂະແໜງ ແລະ ພະນັກງານ-ລັດຖະກອນພາຍໃນ ຄວສຜ ເຂົ້າຮ່ວມ.
ທີ່ກອງປະຊຸມໄດ້ຮັບຟັງ ທ່ານ ນາງ ລຸນ ຄໍາວົງໃຈ ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ຂອງ ຄວສຜ; ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາເຫັນຕໍ່ເນື້ອໃນ ດັ່ງກ່າວຢ່າງກົງໄປກົງລັກສະນະສ້າງສັນ ເພື່ອຮັບປະກັນໃຫ້ແກ່ການເນື້ອໃນມີຄວາມຮັດກຸມ, ສອດຄ່ອງຕາມຄວາມຈິງ.
ໃນໂອກາດດຽວກັນນີ້ ທ່ານ ທອງສີ ເສົາສຸລິພົມ ໃຫ້ກຽດໂອລົມຕໍ່ກອງປະຊຸມ ເຊິ່ງກ່ອນອື່ນທ່ານ ກໍໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ ຄວສຜ ຍາດມາໄດ້ໃນໄລຍະຜ່ານມາ ແລະ ທ່ານໄດ້ ແໜ້ນບາງຄຳເຫັນ ເພື່ອເປັນທິດທາງໃນການປະຕິບັດວຽກງານໃນຕໍ່ໜ້າ ເປັນຕົ້ນ: “ພະນັກງານນໍາພາ, ຄຸ້ມຄອງ ຕ້ອງຍົກສູງຄວາມຮັບຜິດຊອບການເມືອງໃຫ້ສູງຂຶ້ນ ເພື່ອຕອບສະໜອງຄວາມຮຽກຮ້ອງຕ້ອງການໜ້າທີ່ວຽກງານ ໃນໄລຍະໃໝ່; ເພີ່ມທະວີຄວາມເອົາໃຈໃສ່ ໃນການຫັນປ່ຽນຈີນຕະນາການ ແບບຄົງເດີມ ຂອງພະນັກງານ-ລັດຖະກອນ ໄປສູ່ການຫັນປ່ຽນທີ່ຕັ້ງໜ້າ ແລະ ມີປະສິດທິພາບທີ່ດີ ເພື່ອສາມາດເປັນເສນາທິການໃຫ້ແກ່ຄະນະນໍາຂອງຕົນ ດ້ວຍຄວາມຮັບຜິດຊອບສູງ ເປັນທີ່ຍອມຮັບຂອງມະຫາຊົນທີ່ແທ້ຈິງ; ສືບຕໍ່ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍ່ຄື ທິດທາງໜ້າທີ່ກອງປະຊຸມໃຫຍ່ຄັ້ງທີ XI ຂອງພັກ, ຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ II ຂອງໜ່ວຍພັກສະພາປະຊາຊົນແຂວງ ວາງອອກ ແລະ ມະຕິກອງປະຊຸມຄັ້ງປະຖົມມະລຶກ, ສະໄໝສາມັນເທື່ອທີ 2 ຂອງສະພາປະຊາຊົນແຂວງຊຸດທີ II; ປັບປຸງແບບແຜນວິທີເຮັດວຽກ; ເພີ່ມທະວີການປະສານສົມທົບກັບຂະແໜງການ ແລະ ເຂົ້າຮ່ວມແຕ່ຫົວທີໃນການ ກະກຽມສ້າງ, ປັບປຸງນິຕິກຳໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກໍາ ທີ່ກໍານົດໄວ້; ເພີ່ມທະວີ ການຕິດຕາມກວດກາ, ຊຸກຍູ້ການຈັດຕັ້ງປະຕິບັດ ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ, ເອົາໃຈໃສ່ຕິດຕາມກວດກາ ຜົນການຈັດຕັ້ງປະຕິບັດມະຕິ ຂອງກອງປະຊຸມສະພາປະຊາຊົນແຂວງ ທີ່ໄດ້ຮັບຮອງ”.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ