ກອງປະຊຸມ ພົບປະລະຫວ່າງຄະນະຜູ້ແທນສະພາປະຊາຊົນ ແຂວງດັ້ງນາຍ ສສ ຫວຽດນາມ ແລະ ຄະນະຜູ້ແທນສະພາປະຊາຊົນ ແຂວງຈຳປາສັກ ຈັດຂຶ້ນໃນວັນທີ 3 ເມສາ 2024 ທີ່ຜ່ານມາ ຢູ່ທີ່ຫ້ອງປະຊຸມຂອງສະພາປະຊາຊົນແຂວງຈໍາປາສັກ ຝ່າຍແຂວງ ຈຳປາສັກ ມີ ສະຫາຍ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈຳປາສັກ ພ້ອມຄະນະ, ຝ່າຍຄະນະຜູ້ແທນແຂວງດົ້ງນາຍ ນຳໂດຍ ສະຫາຍ ຖ່າຍບ້າວ ຄະນະປະຈຳພັກແຂວງ ປະທານສະພາປະຊາຊົນ ແຂວງ ດົ້ງນາຍ ພ້ອມຄະນະ.

ກອງປະຊຸມ ພົບປະລະຫວ່າງສອງສະພາປະຊາຊົນ ແຂວງດົ້ງນາຍ ແລະ ແຂວງຈຳປາສັກ ໃນຄັ້ງນີ້, ໄດ້ທົບທວນການພົວພັນຮ່ວມມືຂອງສອງສະພາປະຊາຊົນໃນໄລຍະຜ່ານມາ, ຕີລາຄາສູງຕໍ່ສາຍພົວພັນຄວາມສາມັກຄິພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ – ຫວຽດນາມ, ຫວຽດນາມ – ລາວ ໂດຍສະເພາະ ສອງຄະນະພັກ, ອົງການປົກຄະຄອງ ກໍຄືສອງສະພາປະຊາຊົນແຂວງ ທີ່ນັບມື້ໜັກແໜ້ນ ແລະ ເກີດດອກອອກຜົນຢ່າງບໍ່ຢຸດຢັ້ງ. ໃນໂອກາດທີ່ມາເຄື່ອນໄຫວຢ້ຽມຢາມແຂວງຈໍາປາສັກ ໃນຄັ້ງນີ້ ກໍ່ຄືເນື່ອງໃນໂອກາດບຸນປີໃໝ່ລາວ ພ.ສ 2567 ທີ່ຈະມາເຖິງ ສະຫາຍ ຖ່າຍ ບ້າວ ຄະນະປະຈຳພັກແຂວງ ປະທານສະພາປະຊາຊົນ ແຂວງ ດົ້ງນາຍ ສສ ຫວຽດນາມ ຫົວໜ້າຄະນະ ຍັງໄດ້ອວຍພອນໃຫ້ຄະນະນໍາຂອງສະພາປະຊາຊົົນແຂວງ ແລະ ອົງການປົກຄອງແຂວງຈໍາປາສັກ ຕະຫຼອດປະຊາຊົນລາວບັນດາເຜົ່າ ໃຫ້ມີສຸຂະພາບເຂັ້ມແຂງ, ດຳລົງຊີວິດດ້ວຍຄວາມຜາສຸກ ເຮັດສຳເລັດໜ້າທີ່ວຽກງານຍາດໄດ້ຜົນງານໃໝ່ໃຫຍ່ຫຼວງກ່ວາເກົ່າ ແລະ ພິເສດໃນໂອກາດນີ້ ຄະນະນຳສະພາປະຊາຊົນ ແຂວງດົ້ງນາຍ ຍັງໄດ້ມອບເງິນໃຫ້ສະພາປະຊາຊົນແຂວງຈຳປາສັກ ຈຳນວນ 550 ລ້ານດົ້ງ ສະກຸນເງິນຫວຽດນາມ ເພື່ອຊຸກຍູ້ການເຄື່ອນໄຫວຈັດຕັ້ງປະຕິບັດວຽກງານຂອງສະພາປະຊາຊົນແຂວງຈໍາປາສັກ. ໂອກາດດຽວກັນ, ສະຫາຍ ສາຍທອງ ໄຊຍະວົງ ໄດ້ສະແດງຄວາມຂອບໃຈ ຕໍ່ການມາຢ້ຽມຢາມ ແລະ ຄຳອວຍພອນ ຂອງ ຄະນະຜູ້ແທນສະພາປະຊາຊົນແຂວງດົ່ງນາຍ ໃນຄັ້ງນີ້ ທີ່ໄດ້ສະແດງໃຫ້ເຫັນເຖິງ ໄມຕີຈິດ ມິດຕະພາບ, ພ້ອມນັ້ນ ທ່ານໄດ້ຕີລາຄາສູງ ຕໍ່ ການພົວພັນ ຮ່ວມມືມິດຕະພາບ ລະຫວ່າງ ແຂວງຈຳປາສັກ ແລະ ແຂວງດົງນາຍ, ໂດຍສະເພາະ ການຊ່ວຍເຫຼືອກໍ່ສ້າງຊັບພະຍາກອນມະນຸດ, ຊຸກຍູ້ການພົວພັນຮ່ວມມື ແລກປ່ຽນຄະນະຜູ້ແທນ, ແລກປ່ຽນດ້ານວັດທະນະທໍາ ແລະ ສອງຝ່າຍຍັງໄດ້ ອວຍພອນ ແດ່ ສາຍພົວພັນມິດຕະພາບ, ຄວາມສາມັກຄີພິເສດ ແລະການຮ່ວມມືຮອບດ້ານ ຂອງສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ແຂວງຈໍາປາສັກ ແລະແຂວງດົງນາຍ ໃຫ້ຂຽວສົດງົດງາມ ຕະຫຼອດໄປ.

ນອກນີ້, ຄະນະຜູ້ແທນສະພາປະຊາຊົນ ແຂວງດົ້ງນາຍ ໄດ້ເຄື່ອນໄຫວທັດຊະນະຢ້ຽມຢາມແຫຼ່ງທ່ອງທ່ຽວທີ່ສໍາຄັນຂອງແຂວງຈຳປາສັກ ຫຼາຍຈຸດເຊັ່ນ: ນໍ້າຕົກຕາດຄອນພະເພັງ, ຕາດເຍືອງ, ຕາດຝານ, ສວນຜັກອາໂກ ເຂດເມືອງປາກຊ່ອງ ແລະ ມໍລະດົກໂລກວັດພູຈໍາປາສັກ. ເຊິ່ງຄະນະໄດ້ສໍາເລັດການເຄື່ອນໄຫວ ແລະ ເດີນທາງກັບຄືນປະເທດໃນວັນທີ 5 ເມສາ 2024 ດ້ວຍຄວາມສະຫວັດດີພາບ.

(ພາບ-ຂ່າວ: ສົມພອນ ໄຊປັນຍາ ແລະ ສົມວິຈິດ ໄຊມົນຕີ)