ຕອນເຊົ້າ, ວັນທີ 8 ກຸມພາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມປະຈໍາປີ 2022 ຂອງຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ໂດຍການເປັນປະທານຂອງທ່ານ ສົມຈິດ ຫັບລະກອນ ກໍາມະການປະຈໍາພັກແຂວງ, ຮອງປະທານ ຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ; ມີທ່ານ ຄໍາເຫຼັກ ໃຈອິສານ ຮອງເຈົ້າແຂວງ-ແຂວງຜົ້ງສາລີ, ບັນດາທ່ານສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ, ສະມາຊິກສະພາປະຊາຊົນແຂວງ, ສະມາຊິກອົງການປົກຄອງແຂວງ; ແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ສະຫະພັນນັກຮົບເກົ່າ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ອົງການຈັດຕັ້ງພັກ-ລັດເຂົ້າຮ່ວມ.

ກອງປະຊຸມໄດ້ຮັບຟັງ ທ່ານ ນາງ ຈັນມະນີ ດວງພາສຸກ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ຂຶ້ນຜ່ານລາຍງານການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023; ຮັບຟັງ ທ່ານ ຄໍາມ່ວນ ຊົມສີຫາປັນຍາ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ຂຶ້ນລາຍງານຜົນການຕິດຕາມກວດກາ ແລະ ເກັບກໍາຂໍ້ມູນ ຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າອູ 3 ແລະ ນໍ້າອູ 4 ເມືອງຂວາ ເເຂວງຜົ້ງສາລີ; ຮັບຟັງທ່ານ ຍີນໄຊ ດວງພະຈັນ ຫົວໜ້າພະແນກພະລັງງານ ແລະ ບໍ່ແຮ່ແຂວງ ຂຶ້ນລາຍງານສະພາບການຈັດຕັ້ງປະຕິບັດການຂຸດຄົ້ນ ແລະ ການຄຸ້ມຄອງບໍ່ແຮ່ ພາຍໃນແຂວງຜົ້ງສາລີ ແລະ ພ້ອມທັງຕອບຄໍາຊັດຖາມກັບທີ່ຕໍ່ຄໍາຊັກຖາມຂອງ ສສຊ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ແລະ ສະມາຊິກສະພາປະຊາຊົນແຂວງ; ພ້ອມກັນນັ້ນ, ຜູ້ແທນກອງປະຊຸມກໍໄດ້ຜັດປຽນກັນປະກອບຄໍາເຫັນ, ທັງນີ້ກໍເພື່ອເປັນຂໍ້ມູນໃຫ້ແກ່ການປັບປຸງບັນດາເນື້ອໃນດັ່ງກ່າວໃຫ້ມີຄວາມຮັດກຸມ, ສອດຄ່ອງຕາມຫຼັກການ, ລະບຽບ, ກົດໝາຍ. ຈາກນັ້ນ, ຫົວໜ້າກອງເລຂານຸການ ຂຶ້ນຜ່ານມະຕິກອງປະຊຸມ ແລະ ຮັບຮອງເອົາມະຕິ ເພື່ອບ່ອນອີງໃນການຈັດຕັ້ງປະຕິບັດ.

ມາຕອນທ້າຍຂອງກອງປະຊຸມ ປະທານກອງປະຊຸມໄດ້ສັງລວມຄືນຜົນກອງປະຊຸມໂດຍສະເພາະ ການສະຫຼຸບຕີລາຄາການຈັດຕັ້ງປະຕິບັດວຽກງານ ຂອງຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ໃນໄລຍະໜຶ່ງປີຜ່ານມາ ເປັນຕົ້ນ: ການຕິດຕາມກວດກາ, ເກັບກໍາຂໍ້ມູນຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າອູ 3-4; ການຈັດຕັ້ງປະຕິບັດການຂຸດຄົ້ນ ແລະ ການຄຸ້ມຄອງບໍ່ແຮ່ ພາຍໃນແຂວງຜົ້ງສາລີ ແລະ ດ້ານດີຜົນສຳເລັດ, ດ້ານອ່ອນຂໍ້ຄົງຄ້າງໃນການຈັດຕັ້ງປະຕິບັດວຽກງານທີ່ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ; ພ້ອມກັນນັ້ນ, ປະທານກອງປະຊຸມຍັງຮຽງຮອງໃຫ້ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ເອົາໃຈໃສ່ ແລະ ຍົກສູງຄວາມຮັບຜິດຊອບຂອງຕົນ ໃນການເຄື່ອນໄຫວ, ຕິດຕາມກວດກາ ແລະ ເກັບກໍາຂໍ້ມູນສະພາບການຫ່າງສຽງສັງຄົມທີ່ເກີດຂຶ້ນສັງຄົມ ເພື່ອຮັບປະກັນໃຫ້ມະຕິກອງປະຊຸມໃນຄັ້ງນີ້ໄດ້ຮັບການຈັດຕັ້ງປະຕິບັດ ແລະ ມີຜົນສໍາເລັດ; ຮຽງຮອງມາຍັງທຸກພາກສ່ວນໃຫ້ການຮ່ວມມື ແລະ ເອົາໃຈໃສ່ປະກອບສ່ວນການຈັດຕັ້ງປະຕິບັດວຽກງານຂອງ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 2 ແຂວງຜົ້ງສາລີ ກໍຄືບັນດາມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນແຂວງຜົ້ງສາລີ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ