ສະພາປະຊາຊົນ ແຂວງໄຊສົມບູນ ໄດ້ຈັດກອງປະຊຸມ ຕິດຕາມກວດກາ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ປະຈຳ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ ຂຶ້ນ ໃນຕອນເຊົ້າຂອງວັນທີ 6 ມິຖຸນາ 2024 ນີ້ ຢູ່ທີ່ສະໂມສອນເມືອງອະນຸວົງ ໂດຍການເປັນປະທານຂອງທ່ານ ແດງ ປະທຸມທອງ ຮອງເລຂາພັກແຂວງ ປະທານສະພາປະຊາຊົນແຂວງ, ມີຮອງເຈົ້າແຂວງ, ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສາມາຊິກສະພາປະຊາຊົນແຂວງ ພ້ອມດ້ວຍບັນດາພະແນກການ, ອົງການ, ກົມກອງ ອ້ອມຂ້າງແຂວງ ເຂົ້າຮ່ວມ.

ໂອກາດກ່າວເປີດກອງປະຊຸມ ທ່ານ ແດງ ປະທຸມທອງ ໄດ້ມີຄຳເຫັນໂອ້ລົມ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນຂອງກອງປະຊຸມໃນຄັ້ງນີ້ ແມ່ນເພື່ອປະຕິບັດຕາມ ກົດໝາຍວ່າດ້ວຍ ສະພາແຫ່ງຊາດ, ປະຕິບັດຕາມ ສິດ ແລະ ໜ້າທີ່ ດ້ານການຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ໂຄງການລະດັບຊາດ ແລະ ໂຄງການຂະໜາດໃຫຍ່ ທີ່ມີຜົນກະທົບຕໍ່ສິ່ງແວດລ້ອມ ແລະ ສັງຄົມ, ຕິດຕາມກວດກາ ການປະຕິບັດໜ້າທີ່ ຂອງບຸກຄະລາກອນ ທີ່ສະພາແຫ່ງຊາດ ແລະ ສະພາປະຊາຊົນແຂວງເລືອກຕັ້ງ ແລະ ບຸກຄະລາກອນທີ່ສະພາແຫ່ງຊາດ ແລະ ສະພາປະຊາຊົນແຂວງ ຮັບຮອງເອົາການແຕ່ງຕັ້ງ. ພ້ອມນັ້ນ ທ່ານຍັງໄດ້ຮຽກຮ້ອງມາຍັງບັນດາທ່ານທີ່ເຂົ້າຮ່ວມກອງປະຊຸມຈົ່ງຍົກສູງຄວາມຮັບຜິດຊອບ ທາງດ້ານການເມືອງຂອງຕົນ ສຸມທຸກສະຕິປັນຍາ ເພື່ອຄົ້ນຄວ້າ ແລະ ປະກອບຄໍາເຫັນທີ່ເປັນປະໂຫຍດ ເພື່ອເຮັດໃຫ້ກອງປະຊຸມສາມາດບັນລຸໄດ້ຕາມລະດັບຄາດໝາຍທີ່ກໍານົດໄວ້. ຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ຮັບຟັງການລາຍງານ ວຽກງານແກ້ໄຂຄວາມທຸກຍາກ, ວຽກງານໂຄງການລົງທຶນຂອງລັດ ທີ່ຕິດພັນແຜນພັດທະນາເສດຖະກິດ-ສັງຄົມ ຂອງແຂວງ ແລະ ພ້ອມກັນປະກອບຄຳຄິດ-ຄຳເຫັນ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ເພື່ອເຮັດໃຫ້ການຈັດຕັ້ງປະຕິບັດວຽກງານຕິດຕາມກວດກາ ມີເນື້ອໃນຄົບຖ້ວນສົມບູນ ແລະ ມີຄວາມເປັນເອກະພາບ. ຊຶ່ງຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອຕິດຕາມກວດກາ ການຈັດຕັ້ງປະຕິບັດບາງວຽກງານທີ່ສຳຄັນ ແລະ ວຽກງານໂຄງການລົງທຶນຂອງລັດ ຕິດພັນກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງອົງການປົກຄອງແຂວງ ເພື່ອເປັນຂໍ້ມູນ ຕົວຈິງ ທີ່ໄດ້ຈັດຕັ້ງປະຕິບັດ ເພື່ອກະກຽມລາຍງານຕໍ່ກອງປະຊຸມສະໄໝສາມັນ ເທືອທີ່ 7 ຂອງສະພາແຫ່ງຊາດ ທີ່ຈະໄຂຂຶ້ນໃນມໍ່ໆນີ້. ພ້ອມດຽວກັນນັ້ນ ປະທານຍັງໄດ້ເນັ້ນໜັກໃຫ້ພະແນກ, ອົງການ, ກົມກອງອ້ອມຂ້າງແຂວງ ເປັນເສນາທິການໃຫ້ກັບຫົວໜ້າອົງການປົກຄອງແຂວງ ໃນດ້ານວິຊາສະເພາະຂອງຂະແໜງການຕົນ ເພື່ອຊ່ວຍໃຫ້ຄໍາແນະນໍາ ແລະ ສະເໜີວິທີທາງແກ້ໄຂບັນຫາໃຫ້ກັບການນໍາຂອງແຂວງ ຄົ້ນຄວ້າ ພິຈາລະນາ, ອອກມະຕິ, ຂໍ້ຕົກລົງ, ຄໍາສັ່ງ, ຄໍາແນະນໍາ ແລະ ແຈ້ງການອື່ນໆ ທີ່ກ່ຽວຂ້ອງກັບການຄຸ້ມຄອງເສດຖະກິດ-ສັງຄົມ ຕິດພັນກັບການລົງທຶນ ໃຫ້ເຂັ້ມງວດ ແລະ ເອົາໃຈໃສ່ຈັດຕັ້ງປະຕິບັດພາລະບົດບາດ ການຄຸ້ມຄອງບໍລິຫານລັດ ດ້ວຍກົດໝາຍ ຢ່າງເຂັ້ມງວດ ແລະ ສັກສິດ, ສືບຕໍ່ແກ້ໄຂບັນຫາທີ່ຍັງຄົງຄ້າງ ເພື່ອໃຫ້ມີການຫັນປ່ຽນໃຫ້ດີຂື້ນເທື່ອລະກ້າວ.

(ແສງຕາວັນ ລັດຕະນະວົງ)