ໃນວັນທີ 8 ມັງກອນ 2024 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ກອງປະຊຸມ ຕິດຕາມ​ກວດກາ ການຈັດຕັ້ງປະຕິບັດ ໂຄງການທົດລອງຂຸດຄົ້ນແຮ່ທາດ ຂອງກໍາມະທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ຂຶ້ນໂດຍການເປັນທານຮ່ວມຂອງທ່ານ ຮສ ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ປະທານຄະນະກໍາມາທິການເສດຖະກິດ, ເຕັກໂນໄລຊີ ແລະ ສິ່່ງແວດລ້ອມສະພາແຫ່ງຊາດ ແລະ ທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ບົວເງິນ ຫຸມໄຊຍະພົມ ຮອງເຈົ້າແຂວງ ຜູ້ຊີ້ນໍາວຽກງານຂົງເຂດເສດຖະກິດ, ຕ່າງໜ້າຈາກບັນດາພະແນກການທີ່ກ່ຽວຂ້ອງ, ພະນັກງານຂອງສະພາແຫ່ງຊາດ ແລະ ພະນັກງານ​ທີ່​ສັງກັດ​ຢູ່ຄະນະ​ກໍາ​ມະ​ການ​ເສດຖະກິດ, ​ແຜນການ ​ແລະ ການ​ເງິນ​ສະພາ​ປະຊາຊົນ​ແຂວງ ​ເຂົ້າຮ່ວມ.

ເພື່ອຕິດຕາມກວດກາ  ​ແລະ ຊຸກຍູ້ ວຽກງານການ ຂຸດຄົ້ນ ແລະ ປຸງແຕ່ງແຮ່ທາດ ແບບທົດລອງ ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ດ້ານອ່ອນ-ຂໍ້ຄົງຄ້າງ ທີ່ຈະຕ້ອງ ຊອກຫາວິທີການ ແກ້ໄຂ ໃນການຈັດຕັ້ງປະຕິບັດ ການຂຸດຄົ້ນ ແລະ ປຸງແຕ່ງແຮ່ທາດ ແບບທົດລອງ, ເປັນຂໍ້ມູນພື້ນຖານ ແລະ ບ່ອນອີງໃນການສ້າງ  ແລະ ປັບປຸງ ກົດໝາຍ ວ່າດ້ວຍແຮ່ທາດ ສະບັບປັບປຸງ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນທີ່ປະຊຸມໄດ້ຮັບຟັງການລາຍງານຈາກບັນດາພະແນກການກ່ຽວກັບສະພາບການລົງທຶນດ້ານພະລັງງານ ແລະ ບໍ່ແຮ່ ຢູ່ແຂວງຊຽງຂວາງ, ລາຍງານກ່ຽວກັບ ການຫັນປ່ຽນທີ່ດິນປ່າໄມ້, ການຟື້ນຟູປ່າ ແລະ ປູກປ່າທົດແທນຄືນພື້ນທີ່ປ່າໄມ້ທໍາມະຊາດ ຂອງໂຄງການພັດທະນາໄຟຟ້າ, ​ໂຄງການຂຸດຄົ້ນບໍ່ແຮ່  ແລະ ໂຄງການພັດທະນາອື່ນໆ, ລາຍງານກ່ຽວກັບການຂື້ນ​ທະບຽນອອກໃບຕາດິນ, ຜົນ​ກະທົບ​ຕໍ່​ສິ່ງ​ແວດ​ລ້ອມ, ການຟື້ນຟູຊິວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນທີ່ຖືກຜົນກະທົບ ຈາກໂຄງການພັດທະນາພະລັງງານໄຟຟ້າ ແລະ ບໍ່ແຮ່, ລາຍງານສະພາບການຈັດຕັ້ງປະຕິບັດ ການປຸ່ງແຕ່ງແຮ່ທາດ ແລະ ໂຄງການໂຮງກັ່ນນໍ້າມັນ ຂອງບໍລິສັດຍອດງື່ມ ພາວເວີ້ ແລະ ວຽກງານອື່ນທີ່ກ່ຽວຂ້ອງ ແລະ ຮັບຟັງການລາຍງານການເກັບລາຍຮັບ ຈາກໂຄງການໄຟຟ້າ, ໂຄງການຂຸດຄົ້ນບໍ່ແຮ່ປົກກະຕິ ແລະ ລາຍຮັບຈາກການທົດລອງຂຸດຄົ້ນແຮ່ທາດ. ໃນທີ່ປະຊຸມບັນດາຜູ້ແທນກອງປະຊຸມຍັງໄດ້ມີຄໍາເຫັນແລກປ່ຽນເຊິ່ງກັນ ແລະ ກັນລະຫວ່າງ ບັນດາພະແນກການ, ສະພາປະຊາຊົນແຂວງ ແລະ ສະພາແຫ່ງຊາດ ເພື່ອພິຈາລານາແກ້ໄຂບັນຫາທີ່ມີຄວາມສອດຄ່ອງ ແລະ ໃທັນກັບເວລາ.

ໃນຕອນທ້າຍທ່ານທ່ານ ຮສ ປອ ລິນຄໍາ ດວງສະຫວັນ ໄດ້ມີຄໍາເຫັນຕໍ່ກັບບັນດາພະແນກການ ກໍຄືສະພາປະຊາຊົນແຂວງ ຈົ່ງພ້ອມກັນລົງຕິດຕາມກວດກາ ແລະ ແກ້ໄຂບັນຫາທີ່ມີຜົນກະທົບຕໍ່ສິ່ງແວດລ້ອມ ແລະ ປະຊາຊົນແຂວງ ຂອງບັນດາໂຄງການລົງທຶນຂອງລັດ, ການຂຸດຄົ້ນແຮ່ທາດພາຍໃນແຂວງຈະຕ້ອງໄດ້ມີການຄຸ້ມຄອງຢ່າງມີຈຸດສຸມ ແລະ ຕາມລະບຽບກົດໝາຍ. ນອກ​ນັ້ນ, ທ່ານຍັງມອບຄອມພິວເຕີໃຫ້ ສະພາປະຊາຊົນຈໍານວນ 1 ຊຸດ ລວມມູນຄ່າທັງໝົດ 5.400.000ກີບ ເພື່ອເປັນການປະກອບສ່ວນເຂົ້າໃນການເຄື່ອນໄຫວວຽກງານຂອງສະພາປະຊາຊົນແຂວງໃຫ້ມີຄວາມສະດວກ ແລະ ວ່ອງໄວຂຶ້ນກວ່າເກົ່າ.

ສະພາປະຊາຊົນແຂວງຊຽງຂວາ

ຂ່າວໂດຍ: ນາງສຸກສະຫວັນ ອິນທະແສງ