ໃນວັນທີ 20 ກັນຍາ 2023  ທ່ານ ສີສູນທອນ ສ.ຜາບມີໄຊຍ‘ ຮອງປະທານກຳມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະໄດ້ລົງຕິດຕາມກວດກາວຽກງານຍຸຕິທຳ ປະຈໍາປີ 2023 ຢູ່ແຂວງຄໍາມ່ວນ, ໂດຍເປັນກຽດເຂົ້າຮ່ວມ ແລະ ເຮັດວຽກຂອງ ທ່ານ ບຸນມີ ພິມມະສອນ ປະທານຄະນະສະມາຊິກສະພາແຫ່ງຊາດ ປະຈໍາເລືອກຕັ້ງທີ 12 ແຂວງຄໍາມ່ວນ, ມີ ຮອງປະທານສະພາປະຊາຊົນແຂວງ ພ້ອມດ້ວຍບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະພາມາຊິກສະພາປະຊາຊົນຂັ້ນແຂວງ, ຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ, ມີບັນດາທ່ານໃນຂົງເຂດຕຸລາການ, ພະແນກການອ້ອມຂ້າງແຂວງ, ຄະນະກອງບັນຊາການ ປກຊ-ປກສ ແຂວງ ແລະ ແຂກຖືກເຊີນເຂົ້າຮ່ວມ.

ໃນການລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຄັ້ງນີ້ ຄະນະໄດ້ຮັບຟັງການລາຍງານການຈັດຕັ້ງປະຕິບັດວຽກງານກ່ຽວກັບການຕິດຕາມກວດກາ ແລະ ຍູ້ຊຸກວຽກງານໃນຂົງເຂດຍຸຕິທຳໃນປີ 2023, ວຽກງານສານປະຊາຊົນແຂວງ, ອົງການໄອຍະການປະຊາຊົນແຂວງ, ພະແນກຍຸຕິທຳແຂວງ, ວຽກງານອົງການສືບສວນ-ສອບສວນ ປກສ ແຂວງ ແລະ ອົງການກວດກາລັດແຂວງ; ເປັນຕົ້ນ: ກ່ຽວກັບການດຳເນີນຄະດີຂອງສານສາມຂັ້ນ ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ແລະ ວຽກງານຂອງອົງການໄອຍະການປະຊາຊົນໃນການນຳໃຊ້ 7 ມາດຕະການສະກັດກັ້ນຂອງອົງການສືບສວນ-ສອບສວນການຈັດຕັ້ງ ສິດໜ້າທີ່ໃນການສືບສວນ-ສອບສວນ, ວຽກງານຂອງພະແນກຍຸຕິທຳໃນການຈັດຕັ້ງປະຕິບັດຄໍາຕັດສິນຂອງສານ ແລະ ໄດ້ຮັບຟັງການຈັດຕັ້ງປະຕິບັດວຽກງານຂອງອົງການກວດກາລັດແຂວງກ່ຽວກັບການແກ້ໄຂຄໍາຮ້ອງ-ຄໍາສະເໜີ, ວຽກງານຕ້ານ ແລະ ສະກັດກັ້ນການສໍ້ລາດບັງຫຼວງ. ພາຍຫຼັງຮັບຟັງການລາຍງານຂອງບັນດາຂະແໜງການທີ່ກ່ຽວຂ້ອງ ກອງປະຊຸມກໍໄດ້ມີການແລກປ່ຽນຄໍາຄິດຄໍາເຫັນ ຢ່າງກົງໄປກົງມາ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ຍົກໃຫ້ເຫັນ ດ້ານດີ ແລະ ຂໍ້ຄົງຄ້າງ ເພື່ອຄົ້ນຄວ້າຊຸກຍູ້ວຽກງານດັ່ງກ່າວໃຫ້ມີປະສິດພາບ ແລະ ປະສິດທິຜົນຂຶ້ນເປັນກ້າວໆ.

ໃນຕອນທ້າຍກອງປະຊຸມ ທ່ານ ສີສູນທອນ ສ.ຜາບມີໄຊຍ‘ ໄດ້ມີຄໍາເຫັນແລກປ່ຽນ ແລະ  ທ່ານຍັງໄດ້ສະແດງຄວາມຂອບໃຈ ບັນດາພະແນກການຂອງແຂວງ ແລະ ຂະແໜງການທີ່ກ່ຽວຂ້ອງ ທີ່ໄດ້ໃຫ້ການຮ່ວມມື, ສະໜອງຂໍ້ມູນຮອບດ້ານໃຫ້ຄະນະທີ່ໄດ້ລົງມາເຄື່ອນໄຫວຕິດຕາມກວດກາ ແລະ ຊຸກຍູ້ເຊິ່ງ ຈະເປັນຂໍ້ມູນພື້ນຖານອັນສຳຄັນ, ເປັນບ່ອນອີງທີ່ຈະສັງລວມລາຍງານຕໍ່ ຄະນະປະຈໍາສະພາແຫ່ງຊາດ ພິຈາລະນາ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ; ພ້ອມນັ້ນທ່ານຍັງໄດ້ເນັ້ນໜັກຕໍ່ ມີບັນດາທ່ານໃນຂົງເຂດຕຸລາການກໍ່ຄື: ສານປະຊາຊົນແຂວງ, ອົງການໄອຍະການປະຊາຊົນແຂວງ, ພະແນກຍຸຕິທຳແຂວງ, ວຽກງານອົງການສືບສວນ-ສອບສວນ ປກສ ແຂວງ ແລະ ອົງການກວດກາລັດແຂວງຕ້ອງເອົາໃຈໃສ່ປັບປຸງກົງຈັກການຈັດຕັ້ງແຕ່ລະຂັ້ນ, ບໍາລຸງສ້າງພະນັກງານໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ, ຈັນຍາທໍາ ໜັກແໜ້ນ ແລະ ສືບຕໍ່ປັບປຸງກົນໄກການດໍາເນີນຄະດີໃຫ້ຮັບປະກັນ ຄວາມຖືກຕ້ອງ, ຮອບດ້ານ, ຄົບຖ້ວນ, ພາວະວິໄສ, ມີຄວາມໂປ່ງໄສ ແລະ ເປັນທໍາ. ພ້ອມທັງຍົກສູງຄວາມຮັບຜິດຊອບໃນການ ປະຕິບັດໜ້າທີ່ວຽກງານ, ສະກັດກັ້ນພະຍາດອາດຍາສິດ, ການສວຍໃຊ້ໜ້າທີ່ຕໍາແໜ່ງໃນການດໍາເນີນຄະດີ ເພື່ອຫາຜົນປະໂຫຍດສ່ວນຕົວ, ແກ້ໄຂຫາງສຽງ ແລະ ປະກົດການຫຍໍ້ທໍ້ ທີ່ເກີດຂຶ້ນພາຍໃນໃຫ້ ເຂັ້ມງວດ ແລະ ເດັດຂາດ.

ໂດຍ: ເອື້ອ ມະໂນສິງ