ຕອນບ່າຍຂອງວັນພະຫັດ, ວັນທີ 1 ກຸມພາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກຮາກຖານສະພາປະຊາຊົນແຂວງ ໄດ້ເປີດກອງປະຊຸມດໍາເນີນຊີວິດການເມືອງ ໜ່ວຍພັກພັກຮາກຖານສະພາປະຊາ ຊົນແຂວງ ປະຈໍາປີ 2023 ຂຶ້ນ, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກສະພາປະຊາຊົນແຂວງ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ບັນດາສະຫາຍຄະນະພັກ, ແຂກເຊີນ, ສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

   

ກອງປະຊຸມ, ສະຫາຍເລຂາໜ່ວຍພັກ ໄດ້ຜ່ານບົດສໍາຫຼວດການນໍາພາລວມ ຂອງຄະນະໜ່ວຍພັກສະພາປະຊາຊົນແຂວງ, ເຊິ່ງຕະຫລອດໄລຍະ 1 ປີທີ່ຜ່ານມາ ຄະນະໜ່ວຍພັກໄດ້ເອົາໃຈໃສ່ຢ່າງຕັ້ງໜ້າໃນການນໍາພາ-ຊີ້ນໍາ ຢ່າງໃກ້ຊິດຕິດແທດສະມາຊິກພັກ, ສຶກສາອົບຮົມການເມືອງແນວຄິດ, ດໍາເນີນຊີວິດພັກເປັນປົກກະຕິ ແລະ ເຊື່ອມຊຶມແນວທາງ-ແຜນນະໂຍບາຍຂອງພັກ, ກົດໝາຍຂອງລັດ ແລະ ເອກະສານສໍາຄັນຕ່າງໆໄດ້ທັງໝົດ 10 ຄັ້ງ, ມີ 22 ສະບັບ, ມີຜູ້ເຂົ້າຮ່ວມ 244 ເທື່ອສະຫາຍ, ຍິງ 100 ເທື່ອສະຫາຍ, ເຮັດໃຫ້ສະມາຊິກພັກມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດວາງອອກ, ມີຄວາມຕື່ນຕົວສູງ ແລະ ມີຄວາມຮັບຜິດຊອບທາງດ້ານການເມືອງ, ມີແນວຄິດອຸ່ນອ່ຽນທຸ່ນທ່ຽງ, ມີທັດສະນະຫຼັກໝັ້ນການເມືອງໜັກແໜ້ນ, ມີຄວາມສາມັກຄີເປັນຈິດ ໜຶ່ງໃຈດຽວ, ສາມາດຈໍາແນກໄດ້ມິດ-ສັດຕູ, ມີຄວາມຈົ່ງຮັກພັກດີຕໍ່ການຈັດຕັ້ງ ແລະ ບໍ່ມີສະມາຊິກພັກ-ພະນັກງານເສຍທາດຂາດຄຸນ ແລະ ນໍາພາວຽກງານດ້ານຕ່າງໆສໍາເລັດຕາມລະດັບຄາດໝາຍ.

ຫຼັງຈາກນັ້ນ, ບັນດາສະຫາຍສະມາຊິກພັກ ໄດ້ປະກອບຄໍາຄິດຄໍາເຫັນໃສ່ຮ່າງບົດສໍາຫຼວດຂອງໜ່ວຍພັກ, ບົດສໍາຫຼວດຂອງບຸກຄົນຄະນະພັກ, ຕໍານິສົ່ງຂ່າວເຊິ່ງກັນ ແລະ ກັນ ຢ່າງຈິງອົກຈິງໃຈ, ກົງໄປກົງມາ ແລະ ໃນຕອນທ້າຍຍັງໄດ້ຮັບຟັງການໂອ້ລົມຈາກສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ,ຕື່ມອີກ.

   ພາບ/ຂ່າວ: ສະພາປະຊາຊົນແຂວງ.