ຕອນບ່າຍຂອງວັນທີ 26 ມິຖຸນາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ ສະຫະພັນແມ່ຍິງຮາກຖານສະພາປະຊາຊົນແຂວງຄໍາມ່ວນໄດ້ຈັດກອງປະຊຸມໃຫຍ່ ຄັ້ງທີ III, ໂດຍການເປັນປະທານຂອງ ທ່ານ ນາງ ສາທິດ ຈັນສີ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງຮາກຖານສະພາປະຊາຊົນແຂວງຄໍາມ່ວນ ເປັນກຽດເຂົ້າຮ່ວມຂອງ ທ່ານ ນາງ ສຸດທິລົມ ສຸລິວົງ ຮອງປະທານຄະນະບໍລິຫານງານສະຫະພັນແມ່ຍິງແຂວງ, ທ່ານ ຄໍາສຸກ ວັນທະວົງສາ ເລຂາໜ່ວຍພັກ ກຳມະການຄະນະປະຈໍາສະພາປະຊາຊົນແຂວງ, ມີປະທານກຳມະບານຮາກຖານ, ເລຂາໜ່ວຍຊາວໜຸ່ມ ສະພາປະຊາຊົນແຂວງຄໍາມ່ວນ, ແຂກຖືກເຊີນ ແລະ ຕະຫຼອດຮອດສະມາຊິກສະຫະພັນແມ່ຍິງພາຍໃນສະພາປະຊາຊົນແຂວງຄໍາມ່ວນ ເຂົ້າຮ່ວມທັງໝົດ 35 ທ່ານ, ຊາຍ 12 ທ່ານ.
ກອງປະຊຸມໄດ້ຮັບຟັງການຜ່ານບົດລາຍງານການເມືອງ ແລະ ທິດທາງແຜນການຄາດໝາຍສູ້ຊົນໃນ 5 ປີຕໍ່ໜ້າ, ຕະຫຼອດໄລຍະຜ່ານມາ ສະຫະພັນແມ່ຍິງຮາກຖານສະພາປະຊາຊົນແຂວງຄໍາມ່ວນ ໄດ້ເອົາໃຈໃສ່ການສຶກສາອົບຮົມການເມືອງ – ແນວຄິດເປັນບັນຫາສໍາຄັນ ເພື່ອສຶກສາອົບຮົມໃຫ້ສະມາຊິກໃນຮາກຖານມີແນວຄິດອຸ່ນອ່ຽງ, ທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ, ມີຄຸນທາດການເມືອງທີ່ໜັກແໜ້ນ, ມີຄວາມເຂັ້ມແຂງທາງດ້ານການຈັດຕັ້ງ, ຮັກສາໄດ້ມູນເຊື້ອຮັກຊາດ, ມູນເຊື້ອຂະຫຍັນພຽນ, ອານຸລັກຮັກສາຮີດຄອງປະເພນີອັນດີງາມຂອງຊາດ, ຂອງທ້ອງຖິ່ນ, ຮັກສາໄດ້ຄວາມສາມັກຄີເປັນປຶກແຜ່ນຂອງເອື້ອຍນ້ອງແມ່ຍິງໄດ້ເປັນຢ່າງດີ. ສະມາຊິກແມ່ຍິງເຂົ້າຮ່ວມຮັບຟັງການເຜີຍແຜ່, ເຊື່ອມຊຶມແນວທາງນະໂຍບາຍຂອງພັກ-ຂອງຊາດ ທັງໝົດ 68 ຄັ້ງ, ມີຜູ້ເຂົ້າຮ່ວມ 239 ເທື່ອຄົນ, ຍິງ 199 ເທື່ອຄົນ, ປະຈຸບັນມີສະມາຊິກ 25 ສະຫາຍ ມີຄະນະສະຫະພັນແມ່ຍິງ ຮາກຖານ 03 ສະຫາຍ, ແມ່ຍິງເຂົ້າເປັນສະມາຊິກພັກສົມບູນ 18 ສະຫາຍ, ສໍາຮອງ 05 ສະຫາຍ, ເປັນສະມາຊິກຊາວໝຸ່ມ 16 ສະຫາຍ, ສະມາຊິກກໍາມະບານ 25 ສະຫາຍ, ຈາກນັ້ນ, ກອງປະຊຸມໄດ້ຈັດພິທີມອບໃບຍ້ອງຍໍປະເພດ 1 ແລະ ໃບຍ້ອງຍໍປະເພດ 2 ໃຫ້ສະມາຊິກແມ່ຍິງທີ່ມີຜົນງານດີເດັ່ນໃນການເຄື່ອນໄຫວໄລຍະຜ່ານມາ.
ໃນວາລະຂອງກອງປະຊຸມໄດ້ປ່ອນບັດຄັດເລືອກເອົາຄະນະສະຫະພັນແມ່ຍິງຮາກຖານຊຸດໃຫມ່ ເຊິ່ງມີຜູ້ສະໝັກຈໍານວນ 5 ສະຫາຍ, ເລືອກເອົາ 3 ສະຫາຍ, ຜ່ານການຄັດເລືອກໃນກອງປະຊຸມຄັ້ງນີ້ ໄດ້ຕົກລົງເຫັນດີເປັນເອກະພາບເລືອກເອົາ ທ່ານ ນາງ ປັດຕິມາ ພິມມະເສນ ເປັນປະທານ, ທ່ານ ນາງ ໂຊກຊະນະ ເຜື່ອຮັກໄຜ່ ເປັນຮອງ ແລະ ທ່ານ ນາງ ອະປີຍາ ລິຍະຄໍາ ເປັນຄະນະຮາກຖານສະຫະພັນແມ່ຍິງສະພາປະຊາຊົນແຂວງຄໍາມ່ວນຊຸດໃໝ່.
ໂອກາດດັ່ງກ່າວນີ້ ກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ຄໍາສຸກ ວັນທະວົງສາ ແລະ ນາງ ສຸດທິລົມ ສຸລິວົງ ໂດຍໄດ້ເນັ້ນໃຫ້ຄະນະສະຫະພັນແມ່ຍິງຊຸດໃໝ່ ຈົ່ງພ້ອມກັນເອົາໃຈໃສ່ໃນການຈັດຕັ້ງປະຕິບັດວຽກງານແມ່ຍິງໃຫ້ເປັນຂະບວນຟົດຟື້ນກວ້າງຂວາງ, ເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ສະມາຊິກໄດ້ຮັບຮູ້ເຂົ້າໃຈຢ່າງເລິກເຊິ່ງ, ສ້າງແບບແຜນການເຄື່ອນໄຫວວຽກງານແຕ່ລະໄລຍະ, ແບ່ງຄວາມຮັບຜິດຊອບຢ່າງລະອຽດ, ຮັດແໜ້ນຄວາມສາມັກຄີເຮັດວຽກເປັນໝູ່ຄະນະ, ປະຕິບັດຂໍ້ແຂ່ງຂັນ 3 ດີ ຕິດພັນກັບວຽກງານວິຊາສະເພາະ ແລະ ຜັນຂະຫຍາຍມະຕິກອງປະຊຸມໃນຄັ້ງນີ້ໃຫ້ມີຜົນສໍາເລັດ.
ໂດຍ: ເອື້ອ ມະໂນສິງ