(ສພຊ) – ກອງປະຊຸມໃຫຍ່ ຄັ້ງທີ I ຂອງໜ່ວຍແມ່ຍິງກົມສື່ມວນຊົນ, ສະພາແຫ່ງຊາດ (ສພຊ) ໄດ້ຈັດຂຶ້ນໃນຕອນບ່າຍວັນທີ 9 ສິງຫາຜ່ານມາ ໂດຍການເປັນປະທານຮ່ວມຂອງສະຫາຍ ນາງ ດາວເພັດ ສີຫາວົງ ຮອງປະທານ ທັງເປັນປະທານກວດກາຄະນະບໍລິຫານ​ງານສະຫະພັນແມ່ຍິງສະພາແຫ່ງຊາດ, ສະຫາຍ ວິລະພັດ ພາບວິໄຊ ຮອງເລຂາໜ່ວຍພັກກົມສື່ມວນຊົນ ແລະ ສະຫາຍ ນາງ ກົງໃຈ ແສງອຳພັນ ຫົວໜ້າໜ່ວຍແມ່ຍິງກົມສື່ມວນຊົນ; ມີບັນດາຕາງໜ້າສະຫະພັນແມ່ຍິງຮາກຖານ ແລະ ໜ່ວຍແມ່ຍິງພາຍໃນ ສພຊ ພ້ອມດ້ວຍອົງການຈັດຕັ້ງມະຫາຊົນພາຍໃນກົມ ເຂົ້າຮ່ວມ 30 ສະຫາຍ, ຍິງ 27 ສະຫາຍ.
ຜູ້ແທນກອງປະຊຸມ 11 ສະຫາຍ ໄດ້ເປັນເອກະສັນຮັບຮອງເອົາບົດລາຍງານການເມືອງການຈັດຕັ້ງປະຕິບັດວຽກງານ ແຕ່ປີ 2018-2024 ແລະ ທິດທາງແຜນການເຄື່ອນໄຫວວຽກງານ 5 ປີຕໍ່ໜ້າ, ບົດສຳຫຼວດການນຳພາລວມຂອງຄະນະໜ່ວຍແມ່ຍິງກົມສື່ມວນຊົນ; ພ້ອມກັນນັ້ນ, ກໍໄດ້​ໃຊ້​ສິດ​ປະຊາທິປະ​ໄຕປ່ອນ​ບັດ​ເລືອກຕັ້ງ​ເອົາຄະນະໜ່ວຍແມ່ ຍິງຊຸດ​ໃໝ່ ບົນ​ພື້ນຖານຫຼັກການ​ລວມສູນປະຊາທິປະ​ໄຕ, ​ຖືກຕ້ອງສອດຄ່ອງ​ກັບມາດຕະຖານ ​ແລະ ​ເງື່ອນ​ໄຂທີ່​​ກຳນົດ​ໄວ້ ​ເຊິ່ງມີຜູ້ອອກ​ສະໝັກ​ຮັບເລືອກ​ຕັ້ງ 5 ສະ​ຫາຍ ເລືອກເອົາ 3 ສະ​ຫາຍ, ກອງ​ປະຊຸມ​ຄັ້ງ​ປະຖົມ​ມະລືກຂອງໜ່ວຍແມ່ຍິງກົມສື່ມວນຊົນ ຊຸດທີ I ໄດ້​ເປັນ​ເອກະພາບ​ເລືອກ​ເອົາສະຫາຍ ນາງ ວັນນາລິນ ສຸລິວົງສັກ ເປັນຫົວໜ້າ, ສະຫາຍ ນາງ ອານິຕາ ມ່ວນສະຫວັດ ເປັນຮອງຫົວໜ້າ ແລະ ສະຫາຍ ນາງ ໄຊໂສພາພອນ ມິ່ງມຸງຄຸນ ເປັນຄະນະ ທັງເປັນຜູ້ກວດກາ.
ສະຫາຍ ວິລະພັດ ພາບວິໄຊ ມີຄຳເຫັນໂອ້ລົມຕໍ່ກອງປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວ ແລະ ສ້າງຂະບວນການຕ່າງໆ ທີ່ບັນດາສະຫາຍສະມາຊິກແມ່ຍິງ ໄດ້ຕັ້ງໜ້າປະກອບສ່ວນຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ທັງເນັ້ນໜັກໃຫ້ຄະນະໜ່ວຍແມ່ຍິງຊຸດໃໝ່ ພ້ອມກັບສະມາຊິກພາຍໃນໜ່ວຍ ຈົ່ງສືບຕໍ່ເສີມຂະຫຍາຍດ້ານດີ, ແກ້ໄຂດ້ານອ່ອນ ແລະ ຂໍ້ຄົງຄ້າງ ພ້ອມທັງປະຕິບັດຕາມມະຕິ, ຄຳສັ່ງ, ກົດລະ ບຽບຕ່າງໆ ທີ່ສະຫະພັນແມ່ຍິງລາວ ກໍຄືສະຫະພັນແມ່ຍິງ​ ສພ​ຊ ວາງອອກ ຢ່າງເຂັ້ມງວດ ແລະ ມີປະສິດທິຜົນສູງ; ມີຄວາມຮັບຜິດຊອບດ້ານໜ້າທີ່ການເມືອງ ແລະ ວິຊາສະເພາະຂອງຕົນ ສູງຂຶ້ນກວ່າເກົ່າ, ຕັ້ງໜ້າປະຕິບັດຂໍ້ແຂ່ງຂັນ 3 ດີ ຕິດພັນກັບຂໍ້ແຂ່ງຂັນ ຮັກຊາດ ແລະ ພັດທະນາ ໂດຍສະເພາະມະຕິກອງປະຊຸມໃຫຍ່ຄັ້ງທີ I ຂອງໜ່ວຍແມ່ຍິງກົມສື່ມວນຊົນ; ສືບຕໍ່ຮັກສາວັດທະນະທຳ ແລະ ຮີດຄອງປະເພນີທີ່ເປັນເອກະລັກເປັນມູນເຊື້ອຂອງແມ່ຍິງລາວ ມີຄວາມອ່ອນນ້ອມຖ່ອມຕົນ, ເຄົາລົບ ແລະ ໃຫ້ກຽດເຊິ່ງກັນແລະກັນ; ພ້ອມກັນນັ້ນ, ກໍເອົາໃຈໃສ່ພັດທະນາຕົນເອງທັງທາງດ້ານຄວາມຮູ້ວິຊາສະເພາະ ແລະ ດ້ານອື່ນທີ່ກ່ຽວຂ້ອງ ໃຫ້ສົມຄູ່ກັບໜ້າທີ່ວຽກງານຂອງຕົນໃນແຕ່ລະໄລຍະທີ່ມີສິ່ງໃໝ່ ໆເກີດຂຶ້ນຢູ່ເລື້ອຍໆ. ນອກຈາກນີ້, ສະຫາຍຍັງຢ້ຳຕື່ມໃຫ້ຄະນະໜ່ວຍແມ່ຍິງຊຸດໃໝ່ ຊ່ວຍຄະນະໜ່ວຍພັກ ສຶກສາອົບ ຮົມການເມືອງ-ແນວຄິດ ແລະ ເປັນເຈົ້າການເຕົ້າໂຮມຄວາມສາມັກຄີສະມາຊິກແມ່ຍິງພາຍໃນໜ່ວຍ.
ກອງປະຊຸມໃຫຍ່ ຄັ້ງທີ I ຂອງໜ່ວຍແມ່ຍິງກົມສື່ມວນຊົນ ຮຽກຮ້ອງບັນດາສະຫາຍສະມາຊິກ ຈົ່ງເຊີດຊູນໍ້າໃຈສາມັກຄີເປັນປຶກແຜ່ນ, ຍົກສູງຄວາມເປັນເຈົ້າຕົນເອງ, ເພີ່ມທະວີຄວາມຮັບຜິດຊອບ, ເສີມຂະຫຍາຍຫົວຄິດປະດິດສ້າງຂອງຕົນ ຜັນຂະຫຍາຍມະຕິກອງປະຊຸມໃຫຍ່ໃນຄັ້ງນີ້ ໝູນໃຊ້ເຂົ້າໃນການພັດທະນາວຽກງານແມ່ຍິງ ໃຫ້ປາກົດຜົນເປັນຈິງ ແລະ ມີຜົນສໍາເລັດຢ່າງຈົບງາມ.
(ຂ່າວ: ນາງ ປາກາລັກ ພົມມີໄຊ, ພາບ: ນາງ ກຸກກິກ ບຸດດາໄຊ)