ຮາກຖານຊາວໜຸ່ມ ສະພາປະຊາຊົນ ແຂວງໄຊສົມບູນ ໄດ້ຈັດກອງປະຊຸມໃຫຍ່ ຄັ້ງທີ II ປະຈຳປີ 2023 ຂຶ້ນ ໃນຕອນເຊົ້າຂອງວັນທີ 24 ຕຸລາ 2023 ນີ້ ທີ່ຫ້ອງປະຊຸມສານປະຊາຊົນແຂວງ ໂດຍການເປັນປະທານຂອງ ສະຫາຍ ເນັ້ງທ່າວ ເພຍຫຼວງ, ເລຂາຮາກຖານຊາວໜຸ່ມສະພາປະຊາຊົນແຂວງ ເປັນກຽດເຂົ້າຮ່ວມຂອງ ສະຫາຍ ນາງເພັດນິຍົມ ພົມມະລິນ ຮອງເລຂາຄະນະບໍລິຫານງານຊາວໜຸ່ມແຂວງ ແລະ ທ່ານ ຄຳພູທອນ ວົງພະຈັນ, ເລຂາໜ່ວຍພັກສະພາປະຊາຊົນແຂວງ, ຄະນະປະຈຳສະພາ, ຮອງປະທານສະພາປະຊາຊົນແຂວງ ພ້ອມດ້ວຍແຂກຖືກເຊີນ ຈາກ ໜ່ວຍຊາວໜຸ່ມ ອ້ອມຂ້າງແຂວງ ຕະຫຼອດຮອດສະມາຊິກຊາວໜຸ່ມ ພາຍໃນໜ່ວຍຮາກຖານ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການຜ່ານບົດລາຍງານການເມືອງ ທັງສອງພາກ ຈາກ ສະຫາຍ ພູວັນ ບຸນທະຍາ, ຮອງເລຂາຮາກຖານຊາວໜຸ່ມ ສະພາປະຊາຊົນແຂວງ ຊຶ່ງສະຫາຍ ໄດ້ຍົກໃຫ້ເຫັນເຖິງຜົນສຳເລັດວຽກງານທີ່ພົ້ນເດັ່ນຫຼາຍດ້ານ ໂດຍສະເພາະດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ຕະຫຼອດໄລຍະ 5 ປີ ຜ່ານມາ ໂດຍຄະນະຮາກຖານຊາວໜຸ່ມ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ເພື່ອເຕົ້າໂຮມຄວາມສາມັກຄີພາຍໃນໝູ່ຄະນະ ເຮັດໃຫ້ສະມາຊິກ ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ, ມີຄວາມອົດທົນພະຍາຍາມ, ມີສະຕິເຄົາລົບປະຕິບັດລະບຽບກົດໝາຍ, ມີຄວາມຮັບຜິດຊອບຕໍ່ໜ້າທີ່ການເມືອງ, ຊື່ສັດຕໍ່ປະເທດຊາດ, ຕໍ່ການຈັດຕັ້ງ, ຮູ້ຈຳແນກມິດ-ສັດຕູ ແລະ ມີຄວາມຫ້າວຫັນເຮັດສຳເລັດຕໍ່ໜ້າທີ່ວຽກງານ ທີ່ຕົນຮັບຜິດຊອບເປັນຢ່າງດີ. ພ້ອມນີ້ ຍັງໄດ້ຮັບຟັງການຜ່ານບົດສໍາຫຼວດການນໍາພາລວມ ຂອງຄະນະຮາກຖານຊາວໜຸ່ມ ແລະ ຜູ້ເຂົ້າຮ່ວມ ຍັງໄດ້ປະກອບຄຳຄິດ-ຄຳເຫັນ ໃສ່ບົດລາຍງານການເມືອງທັງສອງພາກ ເພື່ອໃຫ້ມີເນື້ອໃນຄົບຖ້ວນສົມບູນ. ຈາກນັ້ນ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະຮາກຖານຊາວໜຸ່ມ ຊຸດໃໝ່ ຊຶ່ງມີຜູ້ສະໝັກເລືອກຕັ້ງ ຈໍານວນ 5 ສະຫາຍ ເລືອກເອົາ 3 ສະຫາຍ, ໃນກອງປະຊຸມ ຄັ້ງປະຖົມມະລຶກ ໄດ້ເປັນເອກະສັນເລືອກເອົາ ສະຫາຍ ວັນໄຊເລົ່າ ເປັນເລຂາ, ສະຫາຍ ນ ແກ້ວຕາ ທໍ່ເພຍຫຼວງ ເປັນຮອງເລຂາ, ສະຫາຍ ເຕັ່ງວ່າງ ວ່າງຮົວມົວ ເປັນຄະນະ ທັງເປັນຜູ້ກວດກາຮາກຖານຊາວໜຸ່ມຊຸດໃໝ່.

ໂອກາດນີ້ ຄະນະປະທານ ໄດ້ຜັດປ່ຽນກັນມີຄຳເຫັນໂອ້ລົມຕໍ່ກອງປະຊຸມ ຊຶ່ງແຕ່ລະສະຫາຍ ໄດ້ເນັ້ນໜັກໃຫ້ຄະນະຊຸດໃໝ່ ສືບຕໍ່ເປັນເສນາທິການໃຫ້ແກ່ຄະນະພັກ, ເປັນແບບຢ່າງນຳໜ້າໃຫ້ມະຫາຊົນຜູ້ກ້າວໜ້າ, ສຶກສາອົບຮົມການເມືອງ-ແນວຄິດ ຢ່າງເປັນປົກກະຕິ, ປັບປຸງກົງຈັກການຈັດຕັ້ງ, ແບບແຜນວິທີເຮັດວຽກ ໃຫ້ມີຄວາມເຂັ້ມແຂງ, ເພີ່ມທະວີເຂົ້າຮ່ວມຂະບວນການຕ່າງໆ ໃຫ້ເປັນຂະບວນການຟົດຟື້ນ, ເຕົ້າໂຮມຄວາມສາມັກຄີພາຍໃນໝູ່ຄະນະ ໃຫ້ເປັນປຶກແຜ່ນ , ປັບປຸງແບບແຜນການນຳພາ ໃນການຈັດຕັ້ງປະຕິບັດວຽກງານ ແລະ ສືບຕໍ່ຈັດຕັ່ງປະຕິບັດຂໍ້ແຂ່ງຂັນ 4 ບຸກ ຂອງຊາວຫນຸ່ມປະຊາຊົນປະຕິວັດລາວ ໃຫ້ປະກົດຜົນເປັນຈິງ ແລະ ມີຜົນສຳເລັດຂຶ້ນເທື່ອລະກ້າວ. ຈາກນັ້ນກໍໄດ້ມີການມອບໃບຍ້ອງຍໍສະມາຊິກຊາວຫນຸ່ມ 4 ບຸກ  ໃຫ້ແກ່ສະມາຊິກພາຍໃນໜ່ວຍຮາກຖານ ເພື່ອຍັ້ງຢືນຜົນງານອັນຜົນເດັ່ນຂອງທຸກສະຫາຍ ທີ່ຍາດມາໄດ້ໃນໄລຍະຜ່ານມາຢ່າງເປັນທາງການ.

                                                                                               (ແສງຕາວັນ ລັດຕະນະວົງ)