ກຳມະບານຮາກຖານສະພາປະຊາຊົນແຂວງວຽງຈັນ ໄດ້ເປີດກອງປະຊຸມໃຫຍ່ຄັ້ງທີ IV ຂອງຕົນຂື້ນຢ່າງເປັນທາງການ ຢູ່ທີ່ຫ້ອງປະຊຸມຂອງສະພາປະຊາຊົນແຂວງວຽງຈັນ ໂດຍການເປັນປະທານຂອງສະຫາຍ ທອງສູນ ຊາມູນຕຣີ ປະທານກຳມະບານຮາກຖານ ສະພາປະຊາຊົນແຂວງວຽງຈັນ, ເປັນກຽດເຂົ້າຮ່ວມຂອງ ສະຫາຍ ວໍຣະສອນ ສີອັກຄະສອນ ເລຂາໜ່ວຍພັກ ປະທານຄະນະບໍລິຫານງານ ສະຫະພັນກຳມະບານແຂວງວຽງຈັນ, ມີສະຫາຍ ຄຳຫລ້າ ສີສຸວົງ ຄະນະໜ່ວຍພັກ ເລຂາທິການສະພາປະຊາຊົນແຂວງວຽງຈັນ, ຄະນະໜ່ວຍແມ່ຍິ່ງສະພາປະຊາຊົນແຂວງ, ຄະນະຊາວໜຸ່ມສະພາປະຊາຊົນແຂວງ, ພ້ອມດ້ວຍແຂກຖືກເຊີນເຂົ້າຮ່ວມ ແລະ ສະມາຊິກກໍາມະບານພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ດຳເນີນການປ່ອນບັດຄັດເລືອກເອົາຄະນະປະທານກຳມະບານຮາກຖານ ສະພາປະຊາຊົນແຂວງວຽງຈັນ ຊຸດ ໃໝ່, ກອງປະຊຸມໄດ້ເປັນເອກະຊັນເລືອກເອົາສະຫາຍ ທອງສູນ ຊາມູນຕຣີ ເປັນປະທານ, ສະຫາຍ ສາຍສະໝອນ ວໍຣະຈິດ ເປັນຮອງ – ທັງເປັນປະທານກວດກາ ແລະ ເລືອກເອົາ ສະຫາຍ ໄຊຍະພອນ ແສງແກ້ວມີໄຊ ເປັນຄະນະ. ກອງປະຊຸມດັ່ງກ່າວແມ່ນໄດ້ຈັດຂື້ນໃນຕອນເຊົ້າຂອງວັນທີ 27 ມີຖຸນາ 2024.
ໃນຕອນທ້າຍກອງປະຊຸມ ກໍ່ໄດ້ຮັບຟັງການໂອລົມ ຈາກ ສະຫາຍ ວໍຣະສອນ ສີອັກຄະສອນ ເລຂາໜ່ວຍພັກ ປະທານຄະນະບໍລິຫານງານ ສະຫະພັນກຳມະບານແຂວງວຽງຈັນ, ທາ່ນໄດ້ຍ້ອງຍໍຊົມເຊີຍຕໍ່ກັບຜົນງານການເຄື່ອນໄຫວຂອງກໍາມະບານຮາກຖານກໍ່ຄືສະມາຊິກກໍາມະບານ ພ້ອມນັ້ນທ່ານຍັງໄດ້ເນັ້ນໜັກໃຫ້ຄະນະກໍາມະບານຮາກຖານສືບຕໍ່ສຶກສາອົບຮົມການເມືອງນໍາພາແນວຄິດໃຫ້ສະມາຊິກກໍາມະບານຈົ່ງພ້ອມການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າທີຕິດພັນກັບການປະຕິບັດວຽກງານວິຊາສະເພາະຂອງແຕ່ລະສະຫາຍດ້ວຍຄວາມຮັບຜິດຊອບໃຫ້ສໍາເລັດ ແລະ ປະກົດຜົນເປັນຈິ່ງ.
ພາບ-ຂ່າວ ບູລາຕີ ແສນທະວົງ