​ ໃນວັນທີ 3 ເມສາ 2024. ທີ່ຫ້ອງປະຊຸມສະພາປະຊາຊົນແຂວງ ກອງປະຊຸມໃຫຍ່ສະມາຊິກພັກ ຄັ້ງທີ I ຂອງຄະນະພັກຮາກຖານສະພາປະຊາຊົນແຂວງ ອັດຕະປື ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານຂອງ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ; ມີບັນດາສະຫາຍເລຂາໜ່ວຍພັກ, ສະມາຊິກພັກສົມບູນ, ບັນດາສະຫາຍຄະນະພັກຮາກຖານຕາງໜ້າຈາກຄະນະຈັດຕັ້ງແຂວງ, ຫ້ອງວ່າການແຂວງ, ກວດກາພັກ-ລັດແຂວງ, ແນວລາວສ້າງຊາດ, ສານປະຊາຊົນ, ອົງການໄອຍະການປະຊາຊົນ, ພະແນກຍຸຕິທໍາ ແລະ ອົງການຈັດຕັ້ງມະຫາຊົນເຂົ້າຮ່ວມ.

ກອງປະຊຸມໃຫຍ່ຄັ້ງນີ້ ສະຫາຍ ແຫວນຄໍາ ປະທຸມມະແສງ  ຄະນະໜ່ວຍພັກສະພາປະຊາຊົນແຂວງ ໄດ້ຜ່ານບົດລາຍງານການເມືອງທີ່ຢັ້ງຢືນເຖິງຜົນງານການເຄື່ອນໄຫວການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງຍາມໃດກໍ່ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກຢ່າງເປັນປົກກະຕິ ໂດຍໄດ້ຖືເອົາການດໍາເນີນຊີວິດການເມືອງປະຈໍາເດືອນພາຍໃນໜ່ວຍ, ຂະແໜງການເປັນບ່ອນຕໍານິສົ່ງຂ່າວ, ກໍ່ສ້າງຊ່ວຍເຫຼືອເຊິ່ງກັນ ແລະກັນ, ຈັດຕັ້ງເຜີຍແຜ່, ຄົ້ນຄວ້າເຊື່ອມຊຶມ ແລະ ຮໍ່າຮຽນມະຕິຄຳສັ່ງ, ກົດລະບຽບຂອງພັກ ແລະລະບຽບກົດໝາຍຂອງລັດ ແນໃສ່ເຮັດໃຫ້ສະມາຊິກພັກ-ພະນັກງານຮັບຮູ້, ເຂົ້າໃຈ ແລະ ກໍາແໜ້ນ ເພື່ອພ້ອມກັນຈັດຕັ້ງປະຕິບັດໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້.

ຂະນະດຽວກັນ, ຍັງໄດ້ຜ່ານ ທິດທາງແຜນການຂອງຄະນະພັກຮາກຖານສະພາປະຊາຊົນແຂວງ (2024-2028), ແຜນການດໍາເນີນງານຂອງຄະນະພັກຮາກຖານ, ແຜນພັດທະນາວຽກງານວິຊາສະເພາະຂອງໜ່ວຍພັກ ແລະ ບົດສໍາຫຼວດນໍາພາລວມຂອງຄະນະໜ່ວຍພັກຊຸກເກົ່າ    ຈາກນັ້ນ, ຜູ້ແທນກອງປະຊຸມໄດ້ປະກອບຄໍາເຫັນ ບົນພື້ນຖານພາຍໃຕ້ຫົວຂໍ້ ການກໍ່ສ້າງພັກ ປອດໃສ, ເຂັ້ມແຂງ, ໜັກ ແໜ້ນ, ເພື່ອຍົກສູງບົດບາດການນໍາພາຂອງພັກ ຕໍ່ກັບອົງການຈັດຕັ້ງມະຫາຊົນ ແລະ ພ້ອມກັນສຸມສະຕິປັນຍາ, ໃຊ້ສິດປະຊາທິປະໄຕ ແລະ ຍົກສູງຄວາມຮັບຜິດຊອບ ເຂົ້າໃນການຄົ້ນຄວ້າພິຈາລະນາບັນຫາຕ່າງໆ ຕາມສິດ ແລະ ໜ້າທີ່ ທີ່ກຳນົດໄວ້ໃນກົດລະບຽບຂອງພັກ, ນອກຈາກນີ້ ຄະນະໜ່ວຍພັກຊຸດເກົ່າກ່າວລາໜ້າທີ່ ແລະ ຄະນະຈັດຕັ້ງແຂວງຜ່ານມະຕິຍຸບໜ່ວຍພັກ ແລະ ສ້າງຕັ້ງເປັນຄະນະພັກຮາກຖານສະພາປະຊາຊົນແຂວງ ຢ່າງເປັນທາງການ,

ກອງປະຊຸມຄັ້ງນີ້, ສະມາຊິກພັກສົມບູນຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານສະພາປະຊາຊົນແຂວງ ອັດຕະປື ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 7 ສະຫາຍ ຍິງ 3 ສະຫາຍ ແລະ ໄດ້ເລືອກເອົາ 5 ສະຫາຍ; ຈາກນັ້ນ, ໄດ້ເປີດກອງປະຊຸມຄັ້ງປະຖົມມະລືກ ເຊິ່ງກອງປະຊຸມໄດ້ເລືອກເອົາສະຫາຍ ແຫວນຄໍາ ປະທຸມແສງ  ເປັນເລຂາຄະນະພັກຮາກຖານສະພາປະຊາຊົນແຂວງ, ສະຫາຍ ນາງ ຈັນທະລີ ສີສຸວົງ ເປັນຮອງເລຂາ ແລະ ປະທານກວດກາພັກ, ສະຫາຍ ແສງປະດິດ ສຸດນາມສຸລີນ   ເປັນຮອງປະທານກວດກາພັກ; ສະຫາຍ ນາງ ແສງອາລຸນ ວົງສາທິການ ແລະ ສະຫາຍ  ຂັນທະລອນ ພອນວັນນາ ເປັນຄະນະພັກຮາກຖານ.

ໂອກາດນີ້, ຍັງໄດ້ຮັບຟັງການໂອ້ລົມໃຫ້ທິດເຍືອງທາງໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກຄັ້ງທີ I ຂອງຄະນະພັກຮາກຖານສະພາປະຊາຊົນແຂວງ ຈາກສະຫາຍ ນາງ ມີນາພອນ ໄຊສົມພູ ເຊິ່ງທ່ານໄດ້ເນັ້້ນໜັກໃຫ້ຄະນະບໍລິຫານງານພັກຮາກຖານ ຊຸດໃໝ່  ສືບຕໍ່ຢືດໝັ້ມອຸດົມການຂອງພັກຢ່າງສະເໝີຕົ້ນສະເໝີປາຍ ກໍາແໜ້ນຫຼັກການ ແລະ ທິດນໍາແຫ່ງການກໍ່ສ້າງພັກ, ໂດຍສະເພາະຕ້ອງຮັກສາລັກສະນະນໍາໜ້າຂອງພັກ ເປັນແບບຢ່າງໃນທຸກໆດ້ານຂອງສະມາຊິກພັກແຕ່ລະຂັ້ນ, ເອົາໃຈໃສ່ນໍາພາ-ຊີ້ນໍາປຸກລະດົມໃນທົ່ວສະມາຊິກພັກ ພະນັກງານ-ລັດຖະກອນ ທົ່ວສັງຄົມ, ໃຫ້ຍົກສູງບົດບາດຄວາມສາມາດນໍາພາຂອງຄະນະພັກຊຸດໃໝ່ ໃຫ້ໄດ້ດີ ແລະ ມີບາດກ້າວອັນໃໝ່ໃນໄລຍະແຫ່ງການປ່ຽນແປງໃໝ່, ໂດຍສະເພາະແມ່ນຕ້ອງໄດ້ນໍາພາການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງນີ້ ໃຫ້ມີຄຸນນະພາບສູງ ແລະ ແທດເຖິງກວ່າເກົ່າ, ປັບປຸງຄະນະພັກຄະນະນໍາສະພາປະຊາຊົນແຂວງ ໃຫ້ມີຄວາມປອດໃສເຂັ້ມແຂງ, ໜັກ ແໜ້ນ ແລະ ນໍາພາສະພາປະຊາຊົນແຂວງອັດຕະປື ໃຫ້ການຫັນປ່ຽນໃໝ່ຢ່າງເລິກເຊິ່ງ ປະຕິບັດຖືກຕ້ອງສອດ ຄອ່ງກັບລັດຖະທໍາມະນູນ ແລະ ກົດໝາຍ

(ວິນັດ ສີສຸລາດ)