ໃນວັນທີ 5 ມິຖຸນາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມໃຫຍ່ຄັ້ງທີ III ຂອງ3 ອົງການຈັດຕັ້ງມະຫາຊົນສະພາປະຊາຊົນແຂວງຂື້ນ ໂດຍການເປັນປະທານຂອງທ່ານ ແສງເດືອນ ຈັນທະລັງສີ ເລຂາໜ່ວຍພັກສະພາປະຊາຊົນແຂວງ, ໃຫ້ກຽດເຂົ້າຮ່ວມມີ ທ່ານ ບຸນໂຮມ ເທດທານີ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ມີ ທ່ານ ເພັດສະໝອນ ດາວົງສອນ ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງ, ມີຕາງໜ້າຈາກ 03 ອົງການຈັດຕັ້ງມະຫາຊົນຂັ້ນແຂວງ, ແຂກຖືກເຊີນຈາກພະແນກການ ແລະ ສະມາຊິກ 3 ອົງການຈັດຕັ້ງມະຫາຊົນຂອງສະພາປະຊາຊົນແຂວງ ເຂົ້າຮ່ວມ.
ໃນກອງປະຊຸມໄດ້ຜ່ານຮ່າງບົດລາຍງານການເມືອງ ຂອງ 3 ອົງການຈັດຕັ້ງມະຫາຊົນ ສະພາປະຊາຊົນ ແຂວງຊຽງຂວາງ, ແຂວງ ໄດ້ເອົາໃຈໃສ່ສຶກສາອົບຮົມດ້ານເມືອງ-ແນວຄິດ ໃຫ້ສະມາຊິກ3 ອົງການຈັດຕັ້ງມະຫາຊົນ ໄດ້ຖືເອົາວຽກງານການເມືອງ-ແນວຄິດເປັນບັນຫາສໍາຄັນໂດຍຕິດພັນກັບວຽກງານວິຊາສະເພາະແຕ່ລະດ້ານ ແລະ ໄດ້ຈັດຕັ້ງປະຕິບັດແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆຢ່າງເຂັ້ມງວດ, ດ້ານວິຊາສະເພາະ ໄດ້ເປັນເສນາທິການອໍານວຍຄວາມສະດວກດ້ານເນື້ອໃນ, ງົບປະມານ, ພາຫະນະ, ອຸປະກອນ, ສະໜອງຂໍ້ມູນ, ກະກຽມບັນດາເອກະສານຕ່າງໆ ໃຫ້ແກ່ສະພາປະຊາຊົນແຂວງ, ເປັນເສນາທິການໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນການປະຕິບັດ 3 ພາລະບົດບາດຂອງສະພາປະຊາຊົນຂັ້ນແຂວງເປັນຕົ້ນ: ດ້ານນິຕິກໍາ, ດ້ານການຕົກລົງບັນຫາສໍາຄັນພື້ນຖານຂອງແຂວງ ແລະ ດ້ານການຕິດຕາມກວດກາ; ນອກຈາກນັ້ນ ຍັງໄດ້ນຳພາ-ຊີ້ນຳ ສະມາຊິກພາຍໃນໜ່ວຍ ໃນດ້ານ ຂະບວນການຕ່າງໆ, ດ້ານການສົ່ງເສີມວິຊາຊີບ ແລະ ອື່ນໆ. 
ທິດທາງແຜນການໃນຕໍ່ໜ້າ ຈະສືບຕໍ່ສຶກສາອົບຮົມດ້ານການເມືອງ-ແນວຄິດໃຫ້ສະມາຊິກ 3 ອົງການຈັດຕັ້ງມະຫາຊົນສະພາປະຊາຊົນແຂວງ, ສືບຕໍ່ປັບປຸງສະມາຊິກພາຍໃນໃຫ້ເຂັ້ມແຂງເພື່ອກຽມພ້ອມຮັບໃຊ້ໜ້າທີ່ການເມືອງທີ່ພັກ-ລັດມອບໝາຍໃຫ້, ພ້ອມກັນຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ຂໍ້ແຂ່ງຂັນ 3 ດີ, ຂໍ້ແຂ່ງຂັນ 4 ບຸກ ຂອງ 3 ອົງການຈັດຕັ້ງມະຫາຊົນຂອງສະພາປະຊາຊົນແຂວງຕ້ອງສູ້ຊົນໃຫ້ໄດ້ 90% ຂຶ້ນໄປ, ສືບຕໍ່ຈັດຕັ້ງປະຕິບັດວຽກງານດ້ານວິຊາສະເພາະ, ດ້ານຂະບວນການ ແລະ ອື່ນໆ ຕາມການຊີ້ນຳ ຂອງຄະນະພັກ, ຄະນະປະຈຳ. ໃນກອງປະຊຸມໄດ້ມອບ-ຮັບ ໃບຍ້ອງຍໍ ນາມມະຍົດ 5 ເປັນເຈົ້າ ກໍາມະບານຮາກຖານາສະພາປະຊາຊົນແຂວງ ສະໄໝທີ I ຈຳນວນ 1 ໃບ, ໃບຍ້ອງຍໍໜ່ວຍແມ່ຍິງສະພາປະຊາຊົນ ໃນການປະຕິບັດໜ້າທີ່ວຽກງານ 5 ປີ ຈຳນວນ 1 ໃບ; ນອກຈາກນັ້ນ ຍັງໄດ້ມອບຮັບໃບຍ້ອງຍໍ ໃຫ້ແກ່ສະມາຊິກກໍາມະບານ, ຊາວໜຸ່ມ ແລະ ແມ່ຍິງ ສະພາປະຊາຊົນແຂວງ ຜູ່ທີ່ມີຜົນງານດີເດັ່ນ ໃນການເຄື່ອນໄຫວວຽກງານ ໄລຍະ 5 ປີ ທັງໝົດຈຳນວນ ຈໍານວນ 83 ໃບ. ກອງປະຊູມ ໄດ້ປ່ອນບັດຄັດເລືອກເອົາ ຄະນະຊຸດ ໃໝ່ຂອງ 3 ອົງການຈັດຕັ້ງມະຫາຊົນ ແລະ ໄດ້ດຳເນີນກອງປະຊຸມຄັ້ງປະຖົມມະລຶກຂອງຕົນຂື້ນ.
ໃນຕອນທ້າຍຂອງກອງປະຊຸມ ທ່ານ ເພັດສະໝອນ ດາວົງສອນ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ ແລະ ທ່ານ ວຽງໄຊ ສີວິໄລ ກຳມະການພັກແຂວງ, ຮອງປະທານສະພາປະຊາຊົນແຂວງ ໄດ້ມີຄໍາເຫັນໂອ້ລົມຕໍ່ກັບການເຄື່ອນໄຫວວຽກງານຂອງ 3 ອົງການຈັດຕັ້ງມະຫາຊົນກໍ່ຄືພະນັກງານ-ລັດຖະກອນພາຍໃນສະພາປະຊາຊົນແຂວງ ທ່ານໄດ້ຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້, ມີຄວາມຕັ້ງໜ້າ, ຫ້າວຫັນໃນການປະກອບສ່ວນເຂົ້າໃນວຽກງານຂອງ 3 ອົງການຈັດຕັ້ງມະຫາຊົນ ກໍ່ຄືການເຮັດວຽກງານຢູ່ໃນສະພາປະຊາຊົນແຂວງ ທີ່ໄດ້ໃຊ້ວິຊາສະເພາະຂອງຕົນປະກອບສ່ວນເຂົ້າໃນວຽກງານທີ່ຕົນຮັບຜິດຊອບ ແລະ ທ່ານຍັງໄດ້ເນັ້ນໜັກໃນການຮັກສາ ແລະ ເສີມຂະຫຍາຍຄວາມສາມັກຄີທີ່ມີຢູ່ນັນໃຫ້ແໜ້ນແຟ້ນຂຶ້ນກວ່າເກົ່າ, ພະນັກງານ-ລັດຖະກອນ ທຸກຄົນຕ້ອງມີຄຸນສົມບັດ, ສິນທໍາປະຕິວັດ ແລະ ຈັນຍາບັນຂອງການເປັນພະນັກງານ-ລັດຖະກອນສະພາປະຊາຊົນແຂວງ, ສືບຕໍ່ຄົ້ນຄວ້າຮໍ່າຮຽນດ້ວຍຕົນເອງໃຫ້ດີຂຶ້ນກວ່າເກົາ, ຕ້ານ ແລະ ສະກັດກັ້ນແນວຄິດແລະ ການກະທໍາທີ່ເປັນການທີ່ເຊື່ອມເສຍຕໍ່ສະພາປະຊາຊົນແຂວງມີການຕໍານິກັນ, ສົ່ງຂ່າວ, ຊ່ວຍເຫຼືອ ເຊິ່ງກັນ ແລະ ກັນ ຢູ່ພາຍໃນກໍ່ສະພາປະຊາຊົນ ແຂວງຊຽງຂວາງ.
ສະພາປະຊາຊົນແຂວງຊຽງຂວາງ
ຂ່າວໂດຍ: ສຸກສະຫວັນ ອິນທະແສງ