(ສພຊ) – ກອງປະຊຸມໃຫຍ່ຄັ້ງທີ II ຂອງສະຫະພັນແມ່ຍິງຮາກຖານກໍາມາທິການກົດໝາຍ (ກກໝ) ໂດຍການເປັນປະທານຮ່ວມຂອງສະຫາຍ ອໍາໄພ ຈິດມານົນ ກໍາມະການຄະນະບໍລິຫານງານພັກສະພາແຫ່ງຊາດ, ຮອງເລຂາໜ່ວຍພັກຮາກຖານກໍາມາທິການກົດໝາຍ, ສະຫາຍ ນາງ ກິ່ງນະຄອນ ຈັນທະກຸມມານ ກຳມະການຄະນະບໍລິຫານງານສະຫະພັນແມ່ຍິງສະພາແຫ່ງຊາດ (ສພຊ) ແລະ ສະຫາຍ ນາງ ຖະໜອມຈິດ ໂຄດພູທອນ ຫົວໜ້າໜ່ວຍແມ່ຍິງຮາກຖານກໍາມາທິການກົດໝາຍ ໄດ້ຈັດຂຶ້ນໃນຕອນບ່າຍວັນທີ 12 ກໍລະກົດ 2024 ທີ່ຫ້ອງຖະແຫຼງຂ່າວຂອງ ສພຊ ເຊິ່ງມີບັນດາສະຫາຍຕາງໜ້າສະຫະພັນ ແລະ ໜ່ວຍແມ່ຍິງຮາກຖານພາຍໃນ ສພຊ, ອົງການຈັດຕັ້ງມະຫາຊົນຮາກຖານ ກກໝ ເຂົ້າຮ່ວມ.
ກອງປະຊຸມໄດ້ພ້ອມກັນຄົ້ນຄວ້າ, ພິຈາລະນາ ແລະ ຮັບຮອງເອົາບົດລາຍງານການເມືອງ, ທິດທາງຄາດໝາຍສູ້ຊົນແຕ່ລະດ້ານ ແລະ ບົດສຳຫຼວດການນຳພາລວມຂອງຄະນະໜ່ວຍແມ່ຍິງຮາກຖານກໍາມາທິການກົດໝາຍຊຸດເກົ່າ ໃນນັ້ນ, ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບາງບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ແລະ ການ ຈັດຕັ້ງປະຕິບັດວຽກງານໄລຍະຜ່ານມາ (2018-2024) ເພື່ອຮັບປະກັນໃຫ້ການເຄື່ອນໄຫວວຽກງານຂອງຄະນະສະ ຫະພັນແມ່ຍິງຮາກຖານຊຸດໃໝ່ ດີຂຶ້ນກວ່າເກົ່າ; ພ້ອມນີ້, ຍັງໄດ້ຮັບຮອງເອົາທິດທາງແຜນການນັບແຕ່ປີ 2024-2030 ແລະ ມາດຕະການຈັດຕັ້ງປະຕິບັດໃນຕໍ່ໜ້າ.
ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະສະຫະພັນແມ່ຍິງຮາກຖານຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງສອດຄ່ອງກັບມາດຕະຖານ ແລະ ເງື່ອນໄຂທີ່ກຳ ນົດໄວ້ ເຊິ່ງມີຜູ້ສະໝັກ 5 ສະຫາຍ, ເລືອກໄດ້ 3 ສະຫາຍ; ກອງປະຊຸມຄັ້ງປະຖົມມະລືກຂອງຄະນະສະຫະພັນແມ່ຍິງຮາກຖານກໍາມາທິການກົດໝາຍ ຊຸດທີ II ໄດ້ເປັນເອກະພາບເລືອກເອົາສະຫາຍ ນາງ ຖະໜອມຈິດ ໂຄດພູທອນ ເປັນປະທານ, ສະຫາຍ ນາງ ອະພິສອນ ພົງສາ ເປັນຮອງປະທານ ທັງເປັນປະທານກວດກາ ແລະ ສະຫາຍ ນາງ ຄຳຜາຍ ທຳມະວົງ ເປັນຄະນະ.
ກອງປະຊຸມໄດ້ຟັງການໂອ້ລົມ ແລະ ທິດຊີ້ນໍາຂອງສະຫາຍ ອໍາໄພ ຈິດມານົນ ເຊິ່ງໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວ ແລະ ການສ້າງຂະບວນການຕ່າງໆ ທີ່ບັນດາສະຫາຍສະມາຊິກແມ່ຍິງ ໄດ້ຕັ້ງໜ້າປະ ກອບສ່ວນຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ. ພ້ອມກັນນີ້, ກໍໄດ້ເນັ້ນໜັກຕໍ່ສະມາຊິກແມ່ຍິງ ເອົາໃຈໃສ່ເຕົ້າໂຮມຄວາມສາມັກຄີ, ເຂົ້າຮ່ວມຂະບວນການຂອງອົງການຈັດຕັ້ງຢ່າງເປັນເຈົ້າການ; ດໍາເນີນຊີວິດການເມືອງເປັນປະຈໍາ ໂດຍຖືເອົາການຕໍານິຕິຊົມຕົນເອງ, ຕິຊົມເຊິ່ງກັນແລະກັນ ເປັນປັດໄຈສໍາຄັນ; ຕັ້ງໜ້າເຄື່ອນໄຫວປະຕິບັດຂໍ້ແຂ່ງຂັນ3 ດີ ຂອງແມ່ຍິງລາວ ໂດຍຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ໃຫ້ເປັນຂະບວນຟົດຟື້ນ. ນອກຈາກນີ້, ຍັງຢ້ຳຕື່ມໃຫ້ຄະນະສະຫະພັນແມ່ຍິງຮາກຖານຊຸດໃໝ່ ຈົ່ງເສີມຂະຫຍາຍດ້ານດີ ແລະ ຜັນຂະຫຍາຍມະຕິ, ຄໍາສັ່ງ ຂອງຂັ້ນເທິງ ໃຫ້ມີປະສິດທິຜົນ.
(ນາງ ອາລິນ ສຸພິມມະປະດິດ)